1 Timoteo 2

Xínéꞌénꞌ Pablo jie̱ꞌe̱ꞌ ya̱ káꞌánꞌ rá ñɨvɨ jín Ndiosíꞌ

1Xíꞌnañúꞌún ka̱ꞌ nu̱u̱nꞌ nɨꞌɨ, náxiníꞌvɨ́ꞌ ni̱ꞌ iniꞌ ñanitáꞌán‑ó ya̱ yɨ́ꞌɨ́ ráa nu̱u̱nꞌ Cristo, ya̱ kaꞌanꞌ‑ó jín Ndiosíꞌ jie̱ꞌe̱ꞌ nɨꞌɨ ñɨvɨ, jee ka̱ka̱nꞌ táꞌvíꞌ‑ó ya̱ jíniñúꞌún ráa, jee ka̱ka̱nꞌ táꞌvíꞌ‑ó ya̱ chineí Ndiosíꞌ ráa, jee ku̱ꞌva‑ó ya̱ kútaꞌviꞌ nu̱u̱nꞌ Ndiosíꞌ jie̱ꞌe̱ꞌ ráa. 2Jee suni sukuán náxiníꞌvɨ́ꞌ ni̱ꞌ iniꞌ ñanitáꞌán‑ó ya̱ kaꞌanꞌ‑ó jín Ndiosíꞌ jie̱ꞌe̱ꞌ rá te̱e, #2:2 Tu̱ꞌun yaꞌá kúvi: rey. ya̱ tátúníꞌ nu̱u̱nꞌ rá ñuunꞌ, jín jie̱ꞌe̱ꞌ nta̱ká rá te̱e nísotíñú, sáva kuvi kuneeꞌ ñunkúún‑ó jee kuneeꞌ va̱ꞌa‑ó, ni jiáꞌnu‑ó ichi na̱a̱ꞌ sáni kuíni Ndiosíꞌ jee jiáꞌnu ñáꞌnú‑ó. 3Íyó va̱ꞌa ya̱ saꞌá‑ó suꞌva jee kúváꞌa iniꞌ Ndiosíꞌ néꞌyá re̱ꞌ tiñu yaꞌá. Jee maáréꞌ ví ya̱ nna̱tavaꞌ re̱ꞌ yó nu̱u̱nꞌ kua̱chi‑ó nánitáꞌvíꞌ‑ó, 4jee kuíni re̱ꞌ ya̱ nɨꞌɨ ñɨvɨ ni̱ꞌi̱nꞌ ráa ya̱ natavaꞌ re̱ꞌ ráa nu̱u̱nꞌ kua̱chi ráa nanitáꞌvíꞌ ráa, jín ya̱ kenta kukáꞌnú iniꞌ ráa ya̱ naáꞌ. 5Chi kua̱chi ɨɨn Ndiosíꞌ ni íyó. Jee íyó kua̱chi ɨɨn ni ya̱ saꞌá‑a ya̱ nakama̱ni̱ꞌ ñɨvɨ jín Ndiosíꞌ. Máá Cristo Jesús ví te̱e vá. 6Jee suvire̱ꞌ nso̱ko̱ꞌ maáréꞌ jee ni̱ꞌi̱ꞌ re̱ꞌ, sáva nchu̱náán nkáꞌnú re̱ꞌ nu̱u̱nꞌ Ndiosíꞌ jie̱ꞌe̱ꞌ kua̱chi nɨꞌɨ ñɨvɨ. Suꞌva nstúvi Ndiosíꞌ tiempúꞌ nka̱ji re̱ꞌ, ya̱ kuíni re̱ꞌ saꞌá re̱ꞌ ya̱ nanitáꞌvíꞌ nɨꞌɨ ñɨvɨ. 7Jee ñani Ndiosíꞌ nuꞌuꞌ sáva stekútu̱ꞌún ni̱ꞌ ya̱ nsa̱ꞌá Cristo, jee sáva kunisotíñú ni̱ꞌ tiñu apóstol. Ya̱ nááꞌ ví ya̱ káchíꞌ ni̱ꞌ, jee ntu̱ví kátúꞌún ni̱ꞌ. Ñani re̱ꞌ nuꞌuꞌ sáva xinéꞌénꞌ ni̱ꞌ rá ñɨvɨ ntu kúvi Israel tu̱ꞌun nááꞌ Ndiosíꞌ, jín ya̱ íyó kuneí iniꞌ ráa Cristo.

8Saáva kuíni ni̱ꞌ, ya̱ kaꞌanꞌ rá te̱e jín Ndiosíꞌ né ni ví nkuvi, jee naneꞌen ráa naꞌá ráa, #2:8 Tiempúꞌ yukuán, ni̱yo costumbre ya̱ naneꞌen rá ñɨvɨ naꞌá ráa, sáá nákuetu ráa nu̱u̱nꞌ Ndiosíꞌ. ya̱ ntu yɨ́ꞌɨ́ ráa jín ya̱ níváꞌa, ya̱ nkóo tu̱ꞌun kítɨ́ꞌ iniꞌ ɨɨn inka ráa, jín ya̱ nkóo tu̱ꞌun kántátúꞌun ɨɨn inka ráa.

9Jee suni sukuán kuíni ni̱ꞌ, ya̱ rá ñaꞌan kani kájí iniꞌ ráa sáá kuꞌun ráa saꞌma ráa. Jee kuꞌun ninuꞌun ráa saꞌma ráa, jee kuꞌun ñáꞌnú ráa saꞌma ráa. Jee kuíni ni̱ꞌ, ya̱ nsáꞌ nakoto vi̱xi̱ꞌ ráa ixi xíníꞌ ráa, jín ya̱ nsáꞌ sikútú ráa maáráa jín rá nantíñú ya̱ꞌvi, kuéntáꞌ su oro, áxí jín rá perla, áxí jín saꞌma ya̱ꞌvi. 10Soo sikútú ráa maáráa jín rá tiñu váꞌa sáꞌá ráa, na̱kua̱ꞌ sáꞌá ɨɨn ñaꞌan ya̱ jiáꞌayuꞌú ña yɨ́tíñú ña nu̱u̱nꞌ Ndiosíꞌ.

11Sáá kútútú rá ñɨvɨ sukuáꞌa ráa Tu̱ꞌun Ndiosíꞌ, jee ɨɨn ñaꞌan íyó kutu̱ꞌva yuꞌuꞌ iniꞌ ña Tu̱ꞌun Ndiosíꞌ. Jee íyó chiꞌi ña maáña xi̱ntíín rá te̱e kúñáꞌnú nu̱u̱nꞌ rá ñɨvɨ kúneí iniꞌ ráa Cristo, ni kútúꞌva ña. 12Chi ntu jiáꞌa ni̱ꞌ ya̱ ɨɨn ñaꞌan xinéꞌénꞌ ña te̱e, ni ya̱ kunisotíñú ña nu̱u̱nꞌ te̱e, chisaꞌ níín koo ña. 13Chi nsa̱ꞌá Ndiosíꞌ xíꞌnañúꞌún Adán. Jee kuíre nsa̱ꞌá re̱ꞌ Eva. 14Jee ntu nxínáꞌví ko̱o̱ꞌ Adán. Chisaꞌ nxi̱náꞌví ti̱ꞌ ñaꞌan vá, jee nkininkava ña ya̱ njia̱ꞌa ña nu̱u̱nꞌ ya̱ nta̱túníꞌ Ndiosíꞌ. 15Soo sáá xtaꞌvíꞌ ráña se̱ꞌya, jee natavaꞌ Cristo rá ñaꞌan nu̱u̱nꞌ rá kua̱chi ráña sikáku re̱ꞌ ráña, retú kuni̱ꞌin ráña kuneí iniꞌ ráña Cristo, jee kunu̱u̱nꞌ ráña ñɨvɨ, jee sasɨ́ɨ́n ráña maáráña nu̱u̱nꞌ ya̱ níváꞌa, jee kaka ñáꞌnú ráña.

Currently Selected:

1 Timoteo 2: meh

Highlight

Copy

Compare