1 Juan 1

Tu̱ꞌun ya̱ sáꞌá ya̱ kutekuꞌ‑ó jín Ndiosíꞌ

1Táji ráníꞌ ya̱ naáꞌ nu̱u̱nꞌ ránú jie̱ꞌe̱ꞌ Cristo ya̱ íyó re̱ꞌ ne̱ sáá ntiáꞌan kiko̱o ñɨ̱vɨ́ yaꞌá, ya̱ nteso̱ꞌo ráníꞌ ya̱ káꞌánꞌ re̱ꞌ, jín ya̱ niniꞌ ránꞌ jín nchinúún ránꞌ yaꞌá, jín ya̱ nne̱ꞌyá noo ránꞌ re̱ꞌ, jín ya̱ ntɨɨn ránꞌ jín naꞌá ránꞌ. Jee suvire̱ꞌ vá kúvi Tu̱ꞌun Ndiosíꞌ ya̱ sáꞌá re̱ꞌ ya̱ kutekuꞌ‑ó nɨ́ɨ́nkání jín Ndiosíꞌ. 2Jee maáréꞌ vá sáꞌá ya̱ kutekuꞌ‑ó, jee nkiji nijinꞌ re̱ꞌ. Jee niniꞌ jínúunꞌ ráníꞌ maa, jee jiáꞌa ránꞌ ya̱ naáꞌ jie̱ꞌe̱ꞌ re̱ꞌ jee káchítu̱ꞌún ráníꞌ nu̱u̱nꞌ ránú jie̱ꞌe̱ꞌ ya̱ sáꞌá re̱ꞌ kutekuꞌ‑ó nɨ́ɨ́nkání jín re̱ꞌ. Jee suvire̱ꞌ vá nneeꞌ re̱ꞌ jín Tátáꞌ‑ó Ndiosíꞌ, jee nstúvi Ndiosíꞌ maa nu̱u̱nꞌ ráníꞌ. 3Jee ya̱ niniꞌ jínúunꞌ ráníꞌ, jín ya̱ nteso̱ꞌo ránꞌ ya̱ nkaꞌanꞌ re̱ꞌ, jee suvi‑i vá káchítu̱ꞌún ránꞌ nu̱u̱nꞌ ránú, sáva unuún koo iniꞌ ránú jín ránuꞌuꞌ. Jee íyó unuún nijia iniꞌ‑ó jín Tátáꞌ‑ó Ndiosíꞌ jín Se̱ꞌya re̱ꞌ Jesús ya̱ níso re̱ꞌ tiñu Cristo. 4Tée ráníꞌ rá tu̱ꞌun yaꞌá nu̱u̱nꞌ ránú sáva chuchítú ya̱ kúsɨ́ɨꞌ iniꞌ ánímaꞌ ránú.

Ndiosíꞌ kúvi ñuꞌunꞌ nu̱u̱nꞌ‑ó

5Yaꞌá ví tu̱ꞌun ya̱ nteso̱ꞌo ránꞌ ya̱ nxi̱néꞌénꞌ Jesús ránuꞌuꞌ, jee yaꞌá káchítu̱ꞌún ránꞌ nu̱u̱nꞌ ránoꞌó ya̱: Ndiosíꞌ ví ñuꞌunꞌ nu̱u̱nꞌ‑ó, chi na̱a̱ꞌ nasɨ́kuitɨꞌ re̱ꞌ, jee ntu̱ví íyó ni ɨɨn tiñu neenꞌ jín re̱ꞌ chi ntu̱ví íyó re̱ꞌ jín ni ɨɨn ya̱ niváꞌa. 6Jee retú káchíꞌ‑ó ya̱ íyó ɨnuún iniꞌ‑ó jín re̱ꞌ, soo retú jiáꞌnu‑ó kuéntáꞌ nu̱u̱nꞌ neenꞌ, jee kátúꞌún‑ó, jee ntu̱ví sáꞌá‑ó sáni káchíꞌ tu̱ꞌun na̱a̱ꞌ. 7Soo retú na̱a̱ꞌ jiáꞌnu‑ó kuéntáꞌ nu̱u̱nꞌ túúnꞌ ñuꞌunꞌ sánikua̱ꞌ íyó maáréꞌ nu̱u̱nꞌ túúnꞌ ñuꞌunꞌ ya̱ kúvi ya̱ na̱a̱ꞌ íyó maáréꞌ, saájee íyó ɨnuún‑ó jín ɨɨn inka táꞌán‑ó, jee nónoo‑ó nu̱u̱nꞌ re̱ꞌ chi ni̱ꞌi̱ꞌ maá Se̱ꞌya re̱ꞌ Jesús jee ñatɨ ni̱ñɨ̱ꞌ vá sáva nasánoo‑o yó nu̱u̱nꞌ nta̱ká kua̱chi‑ó. 8Jee ré kachiꞌ‑ó ya̱ ntu̱ví íyó kua̱chi‑ó, jee xínáꞌví‑ó maáó, chi ntu̱ví ñúꞌún tu̱ꞌun na̱a̱ꞌ iniꞌ‑ó. 9Soo retú nanaꞌmaꞌ‑ó nu̱u̱nꞌ Ndiosíꞌ jie̱ꞌe̱ꞌ rá kua̱chi sáꞌá‑ó, jee kunekáꞌnú iniꞌ re̱ꞌ jie̱ꞌe̱ꞌ kua̱chi‑ó, jee nasaꞌá noo re̱ꞌ yó nu̱u̱nꞌ ntáká ya̱ niváꞌa sáꞌá‑ó, chi suvire̱ꞌ vá síkúnkuvi na̱a̱ꞌ re̱ꞌ ya̱ káchíꞌ re̱ꞌ chi na̱a̱ꞌ kúvi re̱ꞌ. 10Jee ré káchíꞌ‑ó ya̱ ntu nsáꞌá‑ó kua̱chi, jee nátatúꞌún‑ó re̱ꞌ, jee ntu̱ví ñúꞌún tu̱ꞌun re̱ꞌ iniꞌ‑ó.

Currently Selected:

1 Juan 1: meh

Highlight

Copy

Compare