1 Corintios 3

Pablo jín Apolos táꞌán sátíñú ráa nu̱u̱nꞌ Ndiosíꞌ

1Jee ñaniꞌ jín ku̱ꞌva, káchíꞌ ni̱ꞌ nu̱u̱nꞌ ránoꞌó ya̱ ntu̱ví nkúvi kaꞌanꞌ ni̱ꞌ jín rán kuéntáꞌ káꞌánꞌ ni̱ꞌ jín rá ñɨvɨ ya̱ yɨ́ꞌɨ́ xi̱ntíín Ta̱chi̱ꞌ Ííꞌ Ndiosíꞌ, chisaꞌ íyó kaꞌanꞌ ni̱ꞌ jín rán kuéntáꞌ ñɨvɨ ya̱ jiáni iniꞌ kuéntáꞌ rá ñɨvɨ ñɨ̱vɨ́. Íyó kaꞌanꞌ ni̱ꞌ jín rán kuéntáꞌ jín rá súchí lúlí ya̱ ntiáꞌan kujia iniꞌ rán jín tu̱ꞌun Cristo. 2Chi kuéntáꞌ ntaji ni̱ꞌ xu̱kui nu̱u̱nꞌ rán kuéntáꞌ kúvi rán súchí lúlí ya̱ síkáxínꞌ i̱i̱ꞌ ka̱ꞌ, jee kuéntáꞌ ntu ntaji ni̱ꞌ i̱xta̱ꞌ nu̱u̱nꞌ rán, chi ntiáꞌan kujia iniꞌ rán jín Tu̱ꞌun Ndiosíꞌ jee ntiáꞌan kuvi tɨɨn rán ka̱ꞌ tu̱ꞌun ya̱ kéne ichinúúnꞌ ka̱ꞌ ya̱ kuvi kujia iniꞌ rán jín tu̱ꞌun re̱ꞌ. Jee ne̱ vitan ntiáꞌan kuvi ki̱ku̱ꞌun iniꞌ rán maa, 3chi jiáꞌnu i̱i̱ꞌ ránú sáni níyo iniꞌ rá ñɨvɨ ñɨ̱vɨ́ ya̱ ntu yɨ́ꞌɨ́ ráa nu̱u̱nꞌ Ndiosíꞌ, chi íyó rán jín tu̱ꞌun kuíñɨ́ iniꞌ, jín tu̱ꞌun tuntíxín, [jee tásáva rán kúsɨ́ɨ́n rán nu̱u̱nꞌ táꞌán rán]. Jee saáva, ¿á nsáꞌ kúvi rán kuéntáꞌ rá ñɨvɨ ñɨ̱vɨ́ ya̱ ntu yɨ́ꞌɨ́ ráa xi̱ntíín Ndiosíꞌ jee jiáꞌnu rán sáni níyo iniꞌ rá ñɨvɨ ñɨ̱vɨ́ rúja? 4Chi sáá ɨɨn rán káchíꞌ: “Nuꞌuꞌ chi íñɨ́ ni̱ꞌ jín Pablo”, jee inka rán ka̱ꞌ káchíꞌ: “Nuꞌuꞌ chi íñɨ́ ni̱ꞌ jín Apolos.” Jee saáva, ¿á nsáꞌ jiáꞌnu rán sánikua̱ꞌ jiáꞌnu rá ñɨvɨ íyó iniꞌ ñɨ̱vɨ́ yaꞌá ya̱ ntu yɨ́ꞌɨ́ ráa xi̱ntíín Ta̱chi̱ꞌ Ndiosíꞌ rúja?

5¿Né ɨɨn kúvi nuꞌuꞌ Pablo rúja? Jee, ¿né ɨɨn kúvi Apolos rúja? Chi kúvi ráníꞌ musúꞌ ya̱ yɨ́tíñú ráníꞌ nu̱u̱nꞌ Ndiosíꞌ. Jee kúneí iniꞌ ránú ínúꞌ iniꞌ rán Tu̱ꞌun Ndiosíꞌ jie̱ꞌe̱ꞌ nkachitu̱ꞌún ráníꞌ maa nu̱u̱nꞌ ránoꞌó sáni tiñu ntaji I̱toꞌoꞌ‑ó nu̱u̱nꞌ ta ɨɨn ránuꞌuꞌ saꞌá ráníꞌ maa. 6Chi núvíꞌ ráníꞌ nste̱kútu̱ꞌún ránꞌ Tu̱ꞌun Ndiosíꞌ, jee nuꞌuꞌ chi kuéntáꞌ ntaji ni̱ꞌ tataꞌ sáꞌá jee Apolos chi nxi̱náváꞌ re̱ꞌ nute nu̱u̱nꞌ rá nikɨn, soo Ndiosíꞌ ví ya̱ síkuéꞌnu ránoꞌó jín tu̱ꞌun re̱ꞌ. 7Jee saáva ni ntu̱náꞌ kúñáꞌnú te̱e ya̱ tée nikɨn, ni jín te̱e ya̱ chíꞌi nute nu̱u̱nꞌ nikɨn, chisaꞌ kúñáꞌnú maá Ndiosíꞌ ya̱ kúvi maáréꞌ ya̱ síkuéꞌnu maa. 8Jee saáva, te̱e ya̱ tée tataꞌ sáꞌá jín te̱e ya̱ chíꞌi nute nu̱u̱nꞌ tataꞌ sáꞌá vá, jee ɨɨn ni̱ꞌ kúvi ráa. Soo tanu̱u̱nꞌ ráa ni̱ꞌi̱nꞌ rá ya̱ꞌvi ráa ya̱ nachunáán Ndiosíꞌ nu̱u̱nꞌ ráa sánikua̱ꞌ tanu̱u̱nꞌ tiñu nsa̱ꞌá ráa. 9Chi kúvi ránuꞌuꞌ ñɨvɨ ya̱ táꞌán sátíñú ránꞌ tiñu nu̱u̱nꞌ maá Ndiosíꞌ. Jee ránoꞌó kúvi ránú kuéntáꞌ ñuꞌun Ndiosíꞌ nu̱u̱nꞌ káá tataꞌ sáꞌá re̱ꞌ. Jee suni kúvi ránú kuéntáꞌ veꞌi re̱ꞌ.

10Sánikua̱ꞌ ni̱yo maniꞌ iniꞌ Ndiosíꞌ néꞌyá re̱ꞌ nuꞌuꞌ jee saáva ntaji re̱ꞌ tiñu sáꞌá ni̱ꞌ nu̱u̱nꞌ rán ya̱ kúvi ni̱ꞌ kuéntáꞌ mestrúꞌ ya̱ jiáni veꞌi jee sáꞌá ni̱ꞌ nu̱u̱nꞌ kájiéꞌé jie̱ꞌe̱ꞌ ve̱ꞌí. Jee inka te̱e kua̱ꞌa̱nꞌ náchisó no̱ꞌo nu̱u̱nꞌ nsamaꞌ ni̱ꞌ vá, soo ta ɨɨn ta ɨɨn vá íyó kumí sáá sikuéꞌnu tiñu sáꞌá vá. 11Chi Jesús ya̱ kúvi Cristo chi métúꞌún maáréꞌ ví jie̱ꞌe̱ꞌ ve̱ꞌí Ndiosíꞌ. Jee nkúvi nachisó ni ɨɨn ñɨvɨ inka ka̱ꞌ nu̱u̱nꞌ nsamaꞌ jie̱ꞌe̱ꞌ ve̱ꞌí Ndiosíꞌ, chisaꞌ Jesús kúvi métúꞌún jie̱ꞌe̱ꞌ ve̱ꞌí ya̱ ya nsamaꞌ Ndiosíꞌ, jee maáréꞌ kúvi Cristo. 12Jee rá tiñu sáꞌá néni ɨɨn ñɨvɨ kúvi kuéntáꞌ náchisó‑o no̱ꞌo nu̱u̱nꞌ jie̱ꞌe̱ꞌ ve̱ꞌí vá ya̱ nsamaꞌ Ndiosíꞌ. Jee na̱sa sátíñú ɨɨn ñɨvɨ nu̱u̱nꞌ Ndiosíꞌ kúvi kuéntáꞌ sámáꞌ‑a no̱ꞌo ya̱ kúvi ka̱a kuáán yɨ́yáꞌvi ya̱ kúvi oro, áxí ka̱a kuíjín yɨ́yáꞌvi ya̱ kúvi plata, áxí jín rá yu̱u̱ꞌ maa viiꞌ xiñúꞌ yɨ́yáꞌvi, áxí jín yutun, áxí jín iteꞌ, áxí jín nayóꞌo, 13jee rá tiñu ya̱ nsa̱ꞌá ta ɨɨn ta ɨɨn ñɨvɨ jee kenta natu̱vi nijinꞌ‑i, chi ki̱vɨ̱ꞌ ya̱ koo juisiúꞌ ya̱ kenta keꞌneꞌ Ndiosíꞌ rá tiñu nsa̱ꞌá ñɨvɨ jee tu̱vi kájí na̱ nu̱u̱nꞌ tiñu kúvi ráa. Kototúníꞌ Ndiosíꞌ rá tiñu sáꞌá ta ɨɨn ta ɨɨn ñɨvɨ jín ñuꞌunꞌ sáva stúvi na̱ nu̱u̱nꞌ tiñu kúvi tiñu nsa̱ꞌá‑a. 14Jee retú nka̱yúꞌ tiñu ya̱ nsa̱ꞌá néni ɨɨn ñɨvɨ ya̱ nna̱chisó‑o nu̱u̱nꞌ nsamaꞌ vá jee kino̱o‑o, jee yukuán re ni̱ꞌi̱nꞌ ñɨvɨ vá ta̱ꞌvi̱ꞌ ya̱ nachunáán Ndiosíꞌ nu̱u̱nꞌ‑u. 15Jee retú tiñu nsa̱ꞌá ñɨvɨ vá nɨꞌɨ ka̱yu̱ꞌ, nsáꞌ kino̱o‑o ka̱ꞌ, jee sukuíta‑a ta̱ꞌvi̱ꞌ nachunáán Ndiosíꞌ nu̱u̱nꞌ‑u nékúvi, soo sikáku‑u ánímaꞌ‑a ya̱ nkɨ̱ꞌɨ́nꞌ‑ɨ nu̱u̱nꞌ ñúꞌúnꞌ, kuéntáꞌ nkaku‑u nu̱u̱nꞌ ñúꞌúnꞌ.

16¿Á ntu̱ví jíníꞌ ránú ya̱ kúvi rán veñu̱ꞌun maá Ndiosíꞌ jín ya̱ yɨ́ꞌɨ́ Ta̱chi̱ꞌ Ííꞌ Ndiosíꞌ iniꞌ ánímaꞌ rán rúja? 17Jee retú néni ɨɨn ñɨvɨ ya̱ stívɨ́‑ɨ veñu̱ꞌun Ndiosíꞌ, jee maá Ndiosíꞌ xináánꞌ ñɨvɨ vá. Chi nsa̱ꞌá sɨ́ɨ́n Ndiosíꞌ veñu̱ꞌun re̱ꞌ ya̱ yɨ́tíñú nu̱u̱nꞌ re̱ꞌ, jee veñu̱ꞌun re̱ꞌ vá kúvi ránoꞌó.

18Jee koto xínáꞌví ni ɨɨn rán maárán, chi retú ɨɨn ñɨvɨ nteñu rán jiáni iniꞌ‑i ya̱ níchí xíniꞌ‑i sáni jiáni iniꞌ ñɨvɨ iniꞌ ñɨ̱vɨ́ yaꞌá tiempúꞌ yaꞌá, jee íyó saꞌá‑a maáa ɨɨn ñɨvɨ ya̱ káchíꞌ rá ñɨvɨ ñɨ̱vɨ́ yaꞌá ya̱ jiáni naanꞌ xi̱ni̱ꞌ‑i sáva kenta‑a kuꞌun kájí nijia xi̱ni̱ꞌ‑i sáni kuíni Ndiosíꞌ. 19Chi ya̱ níchí ya̱ jiáni iniꞌ ñɨvɨ ñɨ̱vɨ́ yaꞌá, jee kua̱chi jiáni naanꞌ iniꞌ ráa káchíꞌ Ndiosíꞌ. Chi nu̱u̱nꞌ Tutuꞌ níso Tu̱ꞌun Ndiosíꞌ káchíꞌ: “Chi maá Ndiosíꞌ chi tɨ́ɨn re̱ꞌ ñɨvɨ ya̱ jiáni iniꞌ ráa ya̱ níchí xi̱ni̱ꞌ ráa nu̱u̱nꞌ ya̱ máñáꞌ maáráa sáva xínínkava re̱ꞌ ráa nu̱u̱nꞌ máñáꞌ maáráa.” 20Jee suni káchíꞌ tuku nu̱u̱nꞌ Tutuꞌ níso Tu̱ꞌun Ndiosíꞌ: “Jíníꞌ va̱ꞌa maá I̱toꞌoꞌ‑ó Ndiosíꞌ ya̱ jiáni iniꞌ antúníꞌ rá ñɨvɨ níchí ñɨ̱vɨ́ yaꞌá, ya̱ kúvi tu̱ꞌun ya̱ jiáni ka̱ꞌá iniꞌ ráa ni.” 21Saáva koto káꞌánꞌ téyɨ́ɨ́ iniꞌ ni ɨɨn ñɨvɨ jie̱ꞌe̱ꞌ ya̱ íñɨ́‑ɨ jín rá ñɨvɨ, chi nɨꞌɨ ya̱ íyó kúvi nantíñú ránú, 22va̱ kúvi nuꞌuꞌ Pablo, áxí Apolos, áxí Pedro #3:22 Tu̱ꞌun yaꞌá ví: Cefas, ya̱ kúvi Pedro tu̱ꞌun arameo. ya̱ xínéꞌénꞌ ránoꞌó Tu̱ꞌun Ndiosíꞌ. Áxí nɨꞌɨ ya̱ íyó ñɨ̱vɨ́ yaꞌá, jee vasúꞌ kutekuꞌ rán áxí vasúꞌ kuviꞌ rán iniꞌ ñɨ̱vɨ́ yaꞌá, vá ya̱ íyó tiempúꞌ vitan áxí vá kiji koo tiempúꞌ ichinúúnꞌ, jee nɨꞌɨ ya̱ íyó kúvi nantíñú rán. 23Jee ránoꞌó chi yɨ́ꞌɨ́ rán xi̱ntíín Cristo, jee Cristo chi yɨ́ꞌɨ́ re̱ꞌ xi̱ntíín Ndiosíꞌ.

Currently Selected:

1 Corintios 3: meh

Highlight

Copy

Compare