રોમનોનેં પત્ર 6

પાપ હારુ મરણ અનેં ઇસુ મસીહ મ જીવતું થાવું

1હું એંનું અરથ ઇયુ હે કે આપડે પાપ કરતું રેંવું જુગે, એંતરે કે અનુગ્રહ વદતું જાએ? 2ના, બિલકુલ ના ઝર આપું પાપ હારુ મરેંજ્ય તે ફેંર આપડે પાપ મ જીવન નેં જીવવુ જુગે. 3આપું જાણન્યે હે કે આપેં ઇસુ મસીહ મ બક્તિસ્મ લેંદું, વેયુ હેંનેં હાતેં મરવા નેં બરુંબર હેંતું. 4એંતરે હારુ ઝીવી રિતી ઇસુ મસીહ મરેંજ્યો અનેં ડાટવા મ આયો, હિવીસ રિતી આપું હુંદં, બક્તિસ્મ દુવારા હેંનેં હાતેં મરેંજ્ય, અનેં ડટાએંજ્ય, અનેં ઝેંમ ઇસુ મસીહ, બા પરમેશ્વર ની સામ્રત દુવારા મરેંલં મહો પાસો જીવાડવા મ આયો, વેમેંસ આપું હુંદં એક નવું જીવન જીવહું.

5કેંમકે અગર આપું બક્તિસ્મ લેંવા ને લેંદે હીની મોત મ એક થાએંજ્ય હે, તે જરુર આપું હુંદં હેંનેં જુંગ મરેંલં મહં પાસં જીવતં થાએંનેં હેંનેં હાતેં એક થાએં જહું. 6કેંમકે આપું જાણન્યે હે કે આપડો જુંનો પાપી સોભાવ ઇસુ મસીહ નેં હાતેં ક્રૂસ ઇપેર સડાવા મ આયો, એંતરે કે આપડા શરીર મ પાપી સોભાવ મટેં જાએ, અનેં આપું હેંનેં પસી પાપ ની ગુલામી મ નેં રેંજ્યે. 7કેંમકે ઝી મનખ મરેં જાએ વેયુ પાપ ના કબજા મ નહેં રેંતું. 8એંતરે હારુ અગર આપું ઇસુ મસીહ નેં હાતેં મરેંજ્ય હે, તે આપનેં ઇયો વિશ્વાસ હે કે હેંનેં હાતેં જીવતં હુંદં રેંહું. 9કેંમકે આપું જાણન્યે હે કે ઇસુ મસીહ મરેંલં મહો જીવતો થાએંજ્યો હે, અનેં હાવુ પાસો ફેંર કેંરં યે નેં મરહે, મોત નો હાવુ હેંનેં ઇપેર કઇ અધિકાર નહેં. 10કેંમકે વેયો પાપ હારુ એકેંસ વખત મરેંજ્યો, પુંણ હાવુ વેયો જીવતો હે તે પરમેશ્વર હારુસ જીવતો હે. 11એંમેંસ તમું હુંદં પુંતાનેં પાપ ના સબંધ મ મરેંજ્ય હે, પુંણ ઇસુ મસીહ મ પરમેશ્વર હારુસ જીવતં હમજો.

12એંતરે હારુ પાપ ની અસ્યાવં નેં પુંતાના જીવન ઇપેર રાજ નેં કરવા દો, એંતરે કે તમારા શરીર ના પાપ ની અસ્યાવં નેં પરમણે કામ નહેં કરો. 13અનેં તમારા શરીર ન અંગં નેં ભુંડા કામ નું હતિયાર થાવા હારુ પાપ નેં નહેં હુંપો, પુંણ પુંતાનેં મરેંલં મહં પાસં જીવતં થાએંલં હમજેંનેં, પુંતાનું જીવન પરમેશ્વર નેં હુંપેં દો. અનેં પુંતાના શરીર ન અંગં નેં ધાર્મિકતા ન કામં ન હતિયાર થાવા હારુ પુંતાનં જીવનં નેં પૂરી રિતી થી પરમેશ્વર નેં હુંપેં દો. 14તર તમારી ઇપેર પાપ નો અધિકાર નેં રેંહે, કેંમકે તમું મૂસા ના નિયમ ના કબજા મ નહેં, પુંણ પરમેશ્વર ના અનુગ્રહ ના કબજા મ જીવો હે.

ધાર્મિકતા ની ગુલામી મ

15આપું મૂસા ના નિયમ ની ગુલામી મ નહેં પુંણ પરમેશ્વર ના અનુગ્રહ ની ગુલામી મ હે, એંતરે હારુ આપડે પાપ નેં કરવો જુગે. 16તમું જાણો હે કે ઝર તમું પુંતે કેંનાક અધીન મ રેંવા હારુ તમારી જાત નેં ગુલામ તરિકે હુંપો હે, તર તમું ઝેંના માલિક ના કબજા મ થો હે હેંનસ તમું ગુલામ હે, સાહે પાપ ન ગુલામ ઝી મોત મએં લેં જાએ હે, કે સાહે પરમેશ્વર ની આજ્ઞા પાળવા ન ગુલામ ઝી ધાર્મિક જીવન મએં લેં જાએ હે. 17તમું પેલ પાપ ન ગુલામ હેંતં પુંણ તમું હાવુ વેયુ શિક્ષણ પાળો હે ઝી તમનેં આલવા મ આયુ હેંતું, એંતરે હારુ હૂં પરમેશ્વર નું ધનેવાદ કરું હે. 18પરમેશ્વરેં તમનેં પાપ ની ગુલામી મહં સુંડાય હે, અનેં હાવુ પરમેશ્વર ની ધાર્મિકતા ન ગુલામ બણેંજ્ય. 19હૂં તમારી હમજવા ની કમજોરી ને લેંદે, તમનેં મનખ ની રિત પરમણે કું હે, ઝેંમ તમવેં તમારી જાત નેં ભુંડં અનેં ખરાબ કામં ન ગુલામી હારુ હુંપેં દીદી હીતી, વેમેંસ હાવુ તમારી જાત નેં પવિત્ર જીવન જીવવા હારુ ધાર્મિકતા ની ગુલામી મ હુંપેં દો.

20ઝર તમું પાપ ની ગુલામી મ હેંતં, તે ધાર્મિકતા થી આજાદ હેંતં. 21ઝી કામં કરવા ની તમનેં હમણં હરમ આવે હે, વેય કામ હેંને ટાએંમેં કરવા થી તમનેં હું ફાએંદો થાતો હેંતો? કેંમકે હેંનનો બદલો તે મોત હે. 22પુંણ હાવુ તમું પાપ થી આજાદ થાએંનેં અનેં પરમેશ્વર ન ગુલામ બણેંનેં તમનેં ઇયો ફાએંદો થાયો હે, કે ઝેંનેં થી પવિત્રતા મળે હે, અનેં હેંનો બદલો અમર જીવન હે. 23કેંમકે પાપ નો બદલો તે મોત હે, પુંણ ઝી વરદાન પરમેશ્વર આપનેં પ્રભુ ઇસુ મસીહ મ આલે હે વેયુ અમર જીવન હે.

Currently Selected:

રોમનોનેં પત્ર 6: GASNT

Highlight

Copy

Compare