2 થેસ્સલોનિકીઓનેં 2
2
પાપી માણસ એંતરે નાશ નો સુંરો
1હે વાલોં, આપડા પ્રભુ ઇસુ મસીહ નેં પાસો આવવા ના અનેં આપું બદ્દ હેંનેં કન ભેંગં થાએંનેં મળવા ના બારા મ હમું તમનેં અરજ કરજ્યે હે, 2કે પ્રભુ નો ટાએંમ આવેંજ્યો હે એંમ કેંવા વાળં થી તમારા મન મ શંકા કરેંનેં ઘબરાએં નેં જાતં વેહ, વેય એંમ કેંહે કે હમનેં આત્મા, કે વસન, કે કાગળ દુવારા અગવાઈ થાઈ હે, ઝી કે હે માનો હમારી તરફ થી વેહ. 3ઝી મનખં તમનેં એંના બારા મ કે હે, હીની બદ્દી ગલત વાતં ઇપેર વિશ્વાસ નહેં કરો. કેંમકે પ્રભુ નેં પાસો આવવા નો ટાએંમ તર વેંહે, ઝર મનખં પરમેશ્વર નેં વિરુધ થાહે અનેં પાપી માણસ પરગટ થાહે ઝેંનું નાશ થાવું નક્કી હે. 4વેયો પરમેશ્વર અનેં હીની ભગતી કરવા વાળં ની વિરુદ મ થાએં નેં એંવું પુંણ જાહેર કરહે કે વેયોસ મુંટા મ મુંટો પરમેશ્વર હે, અનેં વેયો પરમેશ્વર ના મંદિર મ બેંહહે. 5ઇયે વાતેં તમનેં ઇયાદ વેંહે, કેંમકે ઝર હૂં તમારી હાતેં હેંતો તર તમનેં ઇયે બદ્દી વાતેં કેંદં કરતો હેંતો. 6વેયો પાપ મ પાડવા વાળો માણસ હઝુ તક આયો નહેં તમું તે હેંનેં જાણો હે કે હેંનેં હમણં આવવા થી કુંણ રુંકેં રિયુ હે, કેંમકે વેયો પરમેશ્વર ના નકી કરેંલા ટાએંમ ઇપેરેંસ આવહે. 7કેંમકે પાપ મ પાડેં નાખવા વાળા ની શક્તિ ગુપ્ત રિતી દુન્ય મ હમણં હુદી કામ કરેં રી હે, વેયો હેંનેં કાડેં નાખે તાં હુંદું હેંનેં અટકાવેં રાખહે. 8તર વેયો પાપી માણસ ભાળવા જડહે, ઝેંનેં પ્રભુ ઇસુ પુંતાના એકેંસ હોકમ થી અનેં પાસું આવવા ની મહિમામય સામ્રત થકી માર દડહે. 9વેયો પાપ મ પાડવા વાળો માણસ શેતાન ની શક્તિ હાતેં આવહે, અનેં વેયો બદ્દી પરકાર ના ઝૂઠા સમત્કાર, નિશાન્યી અનેં ગજબ ન કામં કરહે, 10અનેં વેયો બદ્દી પરકાર ન ભુંડં કામં કરેંનેં હેંનં મનખં નેં ધુંખો દેંહે, ઝી હમેશા હારુ નાશ થાવા વાળં હે, કેંમકે હેંનવેં હીની હાસ ઇપેર વિશ્વાસ નહેં કર્યો ઝી હેંનનેં બસાવેં સક્તો હેંતો. 11એંનેંસ લેંદે પરમેશ્વર હેંનં મ એક ઇવી સામ્રત મુંકલહે કે વેય ઝૂઠ ઇપેરેંસ વિશ્વાસ કરહે. 12એંતરે કે ઝેંતરં મનખં હાસ નો ભરુંહો નહેં કરતં, પુંણ પાપ કરવા થી ખુશ થાએ હે, વેય બદ્દ સજ્યા મેંળવે.
વિશ્વાસ મ મજબૂત રો
13હે વાલોં, ઝેંનનેં પ્રભુ પ્રેમ કરે હે, હમારે તમારી હારુ હમેશા પરમેશ્વર નું ધનેવાદ કરવું જુગે, કેંમકે પરમેશ્વરેં દુન્ય બણાવા થી પેલેંસ તમનેં પસંદ કર લેંદં, એંતરે કે તમું પવિત્ર આત્મા દુવારા પવિત્ર બણેંનેં અનેં હાસ ઇપેર ભરુંહો કરેંનેં તારણ મેંળવો. 14હમારા વતાડેંલા તાજા હમિસાર દુવારા પરમેશ્વરેં તમનેં બસાવા હારુ બુંલાય, કે તમું આપડા પ્રભુ ઇસુ મસીહ ની મહિમા મ ભાગિદાર થાએં સકો. 15એંતરે હારુ હે વાલોં, વિશ્વાસ મ મજબૂત રો, ઝી-ઝી વાતેં હમવેં તમનેં કાગળ દુવારા હિકાડી હીતી, હીની વાતં નેં પાળતં રો.
16આપડો પ્રભુ ઇસુ મસીહ પુંતેસ, અનેં આપડો બા પરમેશ્વર, ઝેંને આપડી હાતેં પ્રેમ કર્યો, અનેં અનુગ્રહ થી અમર શાંતિ અનેં ખાસ આહ આલી હે, 17તમારં મનં મ શાંતિ આલે અનેં તમનેં દરેક તાજં કામં અનેં વસનં મ મજબૂત કરે.
Garasia Adiwasi Bible, by The Love Fellowship is licensed under Creative Commons Attribution-ShareAlike 4.0 License.