1 પિતરનો પત્ર 5

વડીલ અનેં જુંવન્ય નેં સલાહ

1અમુક ઇવી વાતેં હે ઝી હૂં મંડલી ન વડીલં નેં કેંવા માંગું હે, કેંમકે હૂં હુંદો તમારી જુંગ વડીલ હે. કેંમકે મેંહ પુંતે ઇસુ મસીહ નેં દુઃખ વેંઠતં ભાળ્યો હે, અનેં ઝર વેયો પાસો આવહે તે હૂં હુંદો હીની મહિમા મ ભાગિદાર થએં. 2હૂં અરજ કરું હે કે ઝીવી રિતી ગુંવાળ પુંતાનં ઘેંઠં ની રખવાળી કરે હે, હિવીસ રિતી તમું હુંદં પરમેશ્વર ન મનખં ની ભાળ-દેંખ કરો, ઝી પરમેશ્વરેં તમનેં હુંપ્ય હે, ઇયુ મજબૂરી હમજેંનેં નેં પુંણ પરમેશ્વર ની મરજી પરમણે ખુશી થી કરો. અનેં પઇસં ની લાલસ થી નેં પુંણ પરમેશ્વર અનેં મનખં ની સેવા કરવા ની અસ્યા થી કરો. 3ઝી મનખં તમનેં હુંપવા મ આવેંલં હે, હેંનં ઇપેર અધિકાર સલાડવા વાળં ના રુપ મ નેં પુંણ હેંનં હારુ એક તાજો નમૂનો બણો. 4કેંમકે આપડો મુખી રખવાળો ઝર પાસો આવહે, તે તમનેં મહિમા નો મોંગટ આલવા મ આવહે ઝી હમેશા ભભળતો અનેં ટકેં રેંહે. 5ઇવીસ રિતી હે જુંવન્યોં, તમું હુંદં મંડલી ન વડીલં ના અધીન મ રો, તમું બદ્દ નરમાઈ થી એક-બીજા ની સેવા કરો, કેંમકે પવિત્ર શાસ્ત્ર મ લખેંલું હે, “પરમેશ્વર, અભિમાની મનખં નો વિરોધ કરે હે, પુંણ ભુંળં મનખં ઇપેર અનુગ્રહ કરે હે.”

6એંતરે હારુ, પરમેશ્વર નેં હામેં પુંતે-પુંતાનેં નરમ કરો ઝી રખવાળી કરવા મ સામ્રતી હે, એંતરે કે વેયો સહી ટાએંમ મ તમારું માન કરહે. 7પુંતાની બદ્દી સિન્તા અનેં તખલીબેં પરમેશ્વર નેં વતાડો, વેયો તમારું ધિયાન રાખે હે. 8હમેશા ખટકે રો, અનેં જાગરુત રો, કેંમકે તમારો વેરી શેતાન ભાખેડવા વાળા સિંહ નેં જેંમ ઇયે ખોળી મ ફરતો હણે હે કે કેંનેંક નેં ફાડેં ખાએ. 9તમું મજબૂત વિશ્વાસ રાખેંનેં હેંનો સામનો કરો, કેંમકે તમું જાણો હે કે તમારા હાત વાળં વિશ્વાસી ઇવીસ રિતી સંસાર મ દુઃખ વેંઠેં રિય હે. 10પરમેશ્વર ઝી આખો અનુગ્રહ થી ભરેંલો હે, હેંને તમનેં ઇસુ મસીહ મ પુંતાની અમર મહિમા મ ભાગિદાર થાવા હારુ બુંલાય હે. તમનેં થુડીક વાર દુઃખ પડવા બાદ વેયો પુંતે તમનેં પૂરી રિતી મજબૂત કરહે અનેં તમનેં ટકાવેં રાખેં. 11વેયો જુંગ-જુંગ સામ્રત થી રાજ કરતો રેંહે. આમીન.

સેંલ્લો નમસ્કાર

12મેંહ આ નાનું કાગળ સિલવાનુસ ન હાથં દુવારા લખાડેંનેં તમનેં મુંકલ્યુ હે. ઝેંનેં હૂં મસીહ મ એક વિશ્વાસુ ભાઈ જુંગ માનું હે. હૂં તમનેં હમજાડું હે, અનેં વિશ્વાસ અલાડું હે કે એંના કાગળ મ ઝી લખેંલું હે, વેયુ પરમેશ્વર નું હાસું અનુગ્રહ હે, અનેં એંના અનુગ્રહ મ ટકેં રો. 13બેબીલોન દેશ ન વિશ્વાસી મનખં તમનેં નમસ્કાર કે હે, ઝેંનનેં પરમેશ્વરેં પસંદ કર્ય હે, ઝીવી રિતી હેંને તમનેં પસંદ કર્ય હે. મરકૂસ ઝી મારા સુંરા બરુંબર હે, વેયો હુંદો તમનેં નમસ્કાર કે હે. 14તમું એક-બીજા નેં ગળે મળેંનેં નમસ્કાર કરો, હૂં પ્રાર્થના કરું હે કે પરમેશ્વર હેંનં બદ્દનેં ઝી ઇસુ મસીહ ઇપેર વિશ્વાસ કરે હે, શાંતિ આલે.

Currently Selected:

1 પિતરનો પત્ર 5: GASNT

Highlight

Copy

Compare