Rôma 4
4
1Azwè be bulya sè g’ômwanja w’Abraam, ya reri yazô, alèngi ande n’ôzôṉe? 2J’Abraam alwaṉizô ôgôre n’ijanja, gambèṉè are ni ntiṉa yi sôgwa, ndô aranga g’ôzô w’Anyambyè. 3Konde irèndo yi bulya sè? inè, Abraam aṽekelyi Anyambyè, ko sô tangiṉô yè g’ôgôre. 4Ndô ayè yi janja, ipa si tangô aranga gw’imèpiṉô, ndô egolaṉi g’inwana; 5na gôre yè yi re pa janja, ndô e bekely’ôma wi dwaṉiz’ôm’ombe ôgôre, ibekelyi sè si tangiṉô yè g’ôgôre.
6Ga nte kambe David kè g’ômwanja w’ôzaviṉô w’ôma, e tangiṉô n’Anyambyè ôgôre ijanja fo, 7inè: Ôzaviṉô gôre waô wi re nyezô p’ipavi saô, wi r’ifwem̃i saô pugô pa! 8Ôzaviṉô gôr’ôma are e pa tangiṉô ibe sè ne Yeôva.
9Sambô ôzaviṉô wiṉo wi re kaô gôre mongi wi re kèrô pa dadyè, mbè gôre waô wi r’izombè kè? Konde azwè bulya nè: Ibekelya s’aranginyô Abraam g’ôgôre. 10Sambô s’aranginyô yè sè? Ayè kèrô pa, mbè ayè p’ar’ôzombè? Arang’ayè kèrô pa, ndô ayè p’ar’ôzombè. 11Avenyô yè ikèra ga elingilyô z’ôgôre w’alèngyô yè vo ibekelya ayè p’ar’ôzombè, ko yè dwaṉe rerè ya waôdu wi bekelya ge p’are waô izombè, ko ôgôre tangiṉô kè waô, 12ni rerè ya mongi wi re kèrô pa, wi re wi pa kèrô dadyè, ndô wi kangaṉa gw’intyôzô s’ibekelya sa reri yazô Abraam ayè p’ar’ôzombè.
13Konde ômpangaṉô inè, e be jige ntye wi re pegege gôr’Abraam ge gôr’awaṉi wè, vo ivanga, ndô v’ôgôre w’ibekelya. 14Ndô ja mongi w’ivanga w’adwaṉ’iyigisi, gambèṉè ibekelya s’atweṉi nyawènyawè n’ômpangaṉô kè w’ajilizô. 15Konde ivanga nyi bag’eguṉu; konde mbôra yi r’ivanga fo, vovo e zel’ipava. 16Gô ntiṉa yiṉo ômpangaṉô wi re gôre waô wi bekelya, ko wô dwaṉ’imèpiṉô; ko wô dwaṉe jolajola gôr’awaṉa waôdu; aranga gôre waô wi re gw’ivanga dadyè, ndô gôre waô kè wi re n’ibekelya s’Abraam, ya reri yazô azwèdu, 17ga nt’are tèndô pa, inè: Mi pango rerè y’aṉongw’am̃enge. Ayè ne reri yazô g’ôzô w’ôma mè w’aṽekelyô yè, Anyambyè, yi p’em̃èṉo gôre mongi wi re juwa pa, na yi fweye yom̃a yi re yi zele, kaô ga yom̃a yi re. 18Abraam aṽekelyi, vangaṉ’e zel’ezom̃a zi re yè ko bekelya, kwanga gw’arweṉi yè rerè y’aṉongw’am̃enge, ga nt’awulinyô yè inè: Yeṉo be dwaṉ’awaṉi wo. 19E pa dèla gw’ibekelya, e pa pikilya du inè, ôkuṽi wè vèṉo atweṉi dèla pa, konde avegagi pyèrè ni nkam̃a y’impum̃a g’ôṉèro wè, na inè, Sara egômbe zi jaṉ’awaṉa w’apyagaṉi. 20E pa dôṽe mpaga n’itwaṽekelya g’ômwanja w’ômpangaṉô w’Anyambyè; ndô ayolizô n’ibekelya, nsum̃inyag’Anyambyè, 21amya kè mbyambye, inè, Anyambyè are ni ngulu gô denda ga nt’are yè pangaṉa pa. 22Yeṉo s’aranginyô yè g’ôgôre.
23Ndô si pa tèndô g’ômwanji wè dadyè inè, s’arangiṉô yè; 24ndô g’ômwanji wazô kè, azwè be tangiṉô sô, azwè yi bekelya ayè y’arôngunyi Yesu, y’Ôvangiṉi wazô, avila gw’ijuwa, 25avenyô g’ômwanja w’ipavi sazô, arôngunyô g’ômwanja w’ôgôre wazô.
Currently Selected:
Rôma 4: MYE
Highlight
Copy
Compare
Share
Want to have your highlights saved across all your devices? Sign up or sign in
Published by the British and Foreign Bible Society in 1927.
