Rôma 2
2
1Sambô ô ze ni ntyongwè, awè yi jèkèlya: konde gô ndaga yi jèkèlyo am̃ori, ô p’ôkuṽi womè ôgara; konde awè yi jèkèlya ô dend’isam̃u mèmô. 2Azw’avôrô inè, ijèkèlya s’Anyambyè si re rèti gôre waô wi dend’isam̃u ôṉongo wiṉo. 3Ndô awè, yi jèkèlya waô wi dend’isam̃u ôṉongo wiṉo, ô denda yô kè mbela mô, ô pikilya nè, ô be jolye fang’ijèkèlya s’Anyambyè? 4Ge awè ô pèdya ibuṉa s’ômbyi wè, n’isindiṉi sè, n’isile benda, ko w’amya inè, ômbya w’Anyambyè wi kèndyo gw’iniga si nkôndi? 5Ndô ga nt’are njoliṉi yo n’ôrèm̃a wi re wi pa nige nkôndi, ô kenjiṉ’ôkuṽi womè eguṉu gô ntyugu y’eguṉu na y’itum̃inya s’ijèkèlya sa rèti s’Anyambyè, 6e be p’ôm’edu ga nt’ar’ijanji sè: 7gôre waô wi but’ivenda, n’ôlubô, n’itwayuwa vo isindiṉa gw’ijanj’ibya, e be p’em̃èṉo z’egômbe zôdu; 8ndô gôre waô wi dôṽ’impaga, ko w’ayogiṉ’ôgiligili, ndô wi jogiṉô ibe, e be dwaṉ’eguṉu ni ngambi. 9Ndô azile n’azingô gw’iṉiny’edu ny’ôma wi janj’ibe, gw’alônga gôre mw’Iju, na gôre mwô’Grèk kè! 10Ivenda, n’ôlubô, n’am̃ènjè gôr’ôm’edu wi dende mbya, gw’alônga gôre mw’Iju, na gôre mwô’Grèk kè! 11Konde Anyambyè e zele n’ôma wa simôsimô.
12Waôdu wi re fwem̃a pa ivanga fo wi be jilizô k’ivanga fo, na waôdu wi re fwem̃a pa gw’ivanga wi be jèkèlyô kè n’ivanga. 13Konde arang’iyogisi y’ivanga yô be dwaṉ’agôre g’ôzô w’Anyambyè, ndô iyanjisi y’ivanga yô be dwaṉizô agôre. 14Gô dend’aṉongo wi re wi zele n’ivanga alenda gô njaṉi yaô isam̃u y’ivanga, mongi siṉo wi re wi zele n’ivanga, wi re n’ivanga gw’ikuṽi yaômè; 15wi tum̃iny’eṽilô z’ivanga zi re tèndô pa gw’irèm̃i yaô, n’irèm̃i yaô kè yi takilya, n’ipikilyi saô si soziza waô ntyo gô kaṉa waô. 16E be twa yeṉo gô ntyugu yi be jèkèly’Anyambyè isam̃u yi ntyorya y’aṉaga vo Yesu‐Krist, ga nt’are Ntyangô yam̃ Mbya.
17Ndô awè yi fweyô ne mw’Iju, aṽekely’ivanga, azôgwa n’Anyambyè; 18awè y’avôrô kè ntondiṉi yè, avinja kè isam̃u yi r’imbya, konde ô re nènjô pa n’ivanga; 19awè yi pikily’ôkuṽi wo inè, ô kèndy’apoku, ôzange wa mongi wi ro gô mpiri, 20ôṉènji wa mongi wi r’item̃u n’ôrevi wa mongi wi r’imya fo, konde gw’ivanga ô dèng’imya n’ôrèti; 21sambô awè yi nènj’am̃ori, ô pa nènj’ôkuṽi womè? Awè yi kambiṉa inè, ayufa, ô jufa! 22Awè yi bulya nè, aṽela wi ngaṉi, ô bela wi ngaṉi! Awè yi bik’ikaṉa, ô kwère yom̃a y’ôrunda! 23Awè yi sogwa n’ivanga, ô pèdy’Anyambyè n’ipav’ivanga! 24Konde ina ny’Anyambyè nyi pèdyô gôr’aṉongo gô ntiṉi yaṉi ga nt’are tèndô pa.
25Ikèra si re n’isolo, j’aw’adend’ivanga; ndô j’awè w’apav’ivanga, gambèṉ’ikèri so s’atweṉ’ôzombè. 26Sambô j’ôzombè apenjavenj’isômbya s’ivanga, gambèṉè ôzombè wè wi pa dwaṉa ga ikèra? 27Ôma wi r’ôzombè gô njaṉô yè, wi dend’ivanga, ave wè ôgara, awè yi re n’ôrèndo w’ivanga n’ikèra, ndô ô pav’ivanga? 28Mw’Iju arang’ayè yi re yeṉo g’ôkuṽa dadyè; n’ikèra kè aranga mèsoṉo si re g’ôzôṉe. 29Ndô mw’Iju ne yè yi re yeṉo gô gare ntye; n’ikèra kè ne s’ôrèm̃a, ga nt’ar’iṉiṉa, aranga ga nt’ar’ôrèndo. Isum̃inya sa mw’Iju wiṉo si pa pila gôr’aṉaga, ndô gôr’Anyambyè.
Currently Selected:
Rôma 2: MYE
Highlight
Copy
Compare
Share
Want to have your highlights saved across all your devices? Sign up or sign in
Published by the British and Foreign Bible Society in 1927.
