Mark 13

1Gw’agogwi Yesu avila gô nagô y’Anyambyè, ôm̃ori gôr’iṉèngi yè awulinyi yè inè: Ôṉènji, vôn’ôṉongo w’adô miṉo, n’ôṉongo wi nôgiṉi yiṉo! 2Awiṉizô yè ne Yesu inè: Ô jeṉ’inôgiṉ’impôlô siṉo? E ze tigaṉe idô gw’idô bata nyi re ny’avôsunyô.

3Alwaṉi yè baru gô nômba yi yôlivi, swaswo ni nagô y’Anyambyè. N’aṽambyô yè ne Pyère, ni Yakobu, ni Yôan, n’Andru ntyorya inè: 4Wulinya zwè, egômbe zeṉi zi be tw’isam̃u yiṉo? N’elingilyô nde zi be dwaṉa jog’isam̃u yiṉo yôdu y’atwa pyèrè gô bya?

5N’avakilyi Yesu gô bulinya waô inè: Gelimaṉi aṉwè vende temizô n’ôma. 6Konde awenge wi be bya gw’ini nyam̃, awulya inè: Myè ne yè, ko waô temiz’aṉag’awenge. 7Na gô be jogo ṉwè g’ômwanja w’agoṽi n’intyangô s’agoṽi, azugyazugyôṉi, konde isam̃u yiṉo yi re n’isolo gô bya. Ndô ntyay yi pa twa. 8Iṉongo nyi be kum̃aṉa gô nwa n’iṉongo, n’ivenda gô nwa n’iṉongo; e be dwaṉa kè isugyazugya si ntye gw’imbôra sinyenge; e be dwaṉa kè njaṉa. 9Siṉo n’ipakilya s’azingô. Ndô ṽandam̃iṉaṉ’ikuṽi yaṉi. Konde wi be piṉa ṉwè gw’ilataṉô y’ijèkèlya, aṉwè be siṽô kè gw’inagô si soṉo; aṉwè be kum̃aṉa gw’azô m’ivangiṉi na gw’azô m’aga, g’ômwanji wam̃, ko yô dwaṉ’ôyeṉi gôre waô. 10Ntyangô mbya yi ga lônge kambiṉô gôr’aṉongo môdu. 11Na gô be kèndya waô ṉwè gw’ijèkèlya, aviṉa ṉwè gôgô, ayeṉaṉi añandi nte be kamba ṉwè egômbe ṽyagaga ro, ndô wulyaṉi nte be pô ṉwè igwèra mè; konde arang’aṉwè be kamba, ndô Iṉiṉ’Iṽya. 12Mwô’ngwè e be kôtiza mwô’ngi yè gô juwa, ni rerè ômwaṉa; n’awaṉa wi be kum̃aṉa gô sir’izombi yaô, ayôṉiza waô. 13Aṉwè be numbô n’aṉaga waôdu, g’ômwanja w’ini nyam̃, ndô ayè yi be sindiṉa kwanga gô ntyay e be sungiṉô.

14Gô be jeṉa ṉwè ezom̃a z’isèkè z’ijiliza zi kum̃aṉa gô mbôra yi re zô ze n’inyanga nyi dwaṉa, — ayè yi tanguṉa e ga gôtize, — vovo waô wi re gô Yuda wi ga wange gw’inômba; 15n’ayè yi be dwaṉa g’ômwanjamwanja wi nagô e ga rig’azum̃iṉa gô jingiṉa gô bong’ezom̃y’edu avila gô nagô yè; 16n’ayè yi be dwaṉa gô ntyaga e ga rige arô fwinya ni nyum̃a gô bonge ngoy yè. 17Azile gôr’antô wi be dwaṉa n’anyem̃e na gôre waô wi be jonj’awaṉa gw’intyugu mèsoṉo! 18Gambiṉaṉi nè, isam̃u yiṉo y’alwaṉa gw’egômbe z’ifwe. 19Konde gw’intyugu mèsoṉo e be dwaṉ’azingô, mi re mi pa dwaṉa ni mori avila gw’ipakilya si ntye, y’avangyô n’Anyambyè kwanga vèṉo, mô kè m’arô dwaṉe nyèṉè. 20N’arwe nè Rerè e pa tuṉiz’intyugu mèsoṉo, gavoṉo e zel’ôma wi be sungiṉô; ndô are tuṉiza pa sô g’ômwanja wa mongi wi re yè pinja pa. 21J’aṉw’abuliny’ôma egômbe mèzoṉo inè: Vônaṉi, Krist are vèṉo, ge vônaṉi voṉo, ayiviraṉi yè. 22Konde e be nongw’ikrist s’inôka n’ivogisi y’inôka, alend’isam̃u yi mamô ni lemba gô temiza mongi wi re pinjô pa, ja yô tô jolyô. 23Ndô ṽandam̃iṉaṉi; my’are bulinya pa ṉwè isam̃u yôdu yô ṽyagaga ro.

24Ndô gw’intyugu mèsoṉo, azingô mèmoṉo vya, nkômbe yi be jilangaṉa, n’ôgwèli wi ze bambize nyèṉè iṉangi nyè, 25n’igègèṉi yi be pôswa avila g’ôrôṽa, n’ingulu si re g’ôrôṽa si be sugyazugyô. 26N’egômbe mè wi be jeṉ’Ômwaṉa w’ôma e bya gô vindi ni ngulu mpôlô n’ivenda. 27Egômbe mèzoṉo e be tôm̃’iyenjèl sè, ko sô datize mongi wi re yè pinja pa avila gw’impung’inay, avila g’ôm̃ôndô wi ntye kwanga g’ôm̃ôndô w’ôrôṽa. 28Ṉèngaṉi nkôgô avila gw’erere zi figi. J’ivari nya zô ny’atweṉi dèla, awel’ijavi, aṉwè mya inè, nanga y’atweṉi pyèrè. 29Yeṉo kè, gô be jeṉa ṉwè isam̃u yiṉo y’atwa, myaṉi nè, Ômwaṉa w’ôma atweṉi pyèrè, vangaṉe g’ômpômbala. 30Giligili mi bulinya ṉwè inè, ivôm̃a nyiṉo nyi ze pyagaṉe kaô isam̃u yiṉo yôdu y’atwa. 31Ôrôṽa ni ntye yi be pyagaṉa, ndô agambi mam̃ m’avyagaṉe du.

32G’ômwanja wi ntyugu mè ge igwèra mè, e zel’ôma wi mya nyô, vangaṉe iyenjèl si re g’ôrôṽa, ge Ômwaṉa, ndô kaô Rerè dadyè.

33Ṽandam̃iṉaṉi, ṽèmbagaṉi ko kambiṉaṉi, konde aṉwè pa mya gô be bya egômbe mè. 34Yi be dwaṉa ga nt’ar’ôma wi kenj’ôgèndo gô kènda gô ntye nyèṉè, e tige nagô yè, av’inyôngô sè inyanga, gôr’ôm’edu eṽilô zè, ko yè sômbya ôma wi pengiṉ’ômpômbala inè, e ga ṽèmbege. 35Sambô ṽèmbagaṉi, konde aṉwè pa mya egômbe zi be by’ôma w’aṉivi nagô, twa pe nkôlô, ntyo ôgwèra ṉengeṉenge, ntyo njogoṉi nônga, ntyo ibanga; 36e vende bya ndumbaga, aliṽinya ṉwè gw’antyôviṉô. 37Nte bulinya myè ṉwè, yeṉo bulinya myè kè waôdu inè: Ṽèmbagaṉi.

Currently Selected:

Mark 13: MYE

Highlight

Copy