Mika 5

1N’awè, Betelèm Efrata, ômwangô gw’intozèny si Yuda, avila gôre wè e be kogwa gôre myè ayè yi be pangiṉ’Israèl, ar’ipakilyi sè si pila gw’egômb’elônga, gw’intyugu sa koṉako. 2Yeṉo e be tiga waô dyè kwanga gw’egômbe zi be jaṉ’ayè yi re gô jaṉa, ni mbèy y’arigaṉi y’awareri yè yi be fwinya gôr’awaṉa w’Israèl. 3E be bôm̃wa avangiṉa ni ngulu yi Yeôva, n’ônjèlènjèlè w’ina nyi Yeôva, Anyambyè yè; ko waô dèng’ilwaṉô iyoli, konde e be pendyô kwanga gw’im̃ôndô yi ntye. 4Ayè be tô bag’am̃ènjè. Gô be bya mongi Asur gô ntye yazô, ko yè jingiṉa boli gw’inagô sazô s’aga, gambèṉè azwè be nongunya gôre yè imiṉisè ôrwageṉô n’ivangiṉi eṉanay y’iṉongo. 5Wi be sèng’am̃aṉi maô mi ntye y’Asur n’ôkwara na mi ntye yi Nimrod gô gare ntye y’aguge ma yô. Yeṉo e be sungiṉa zwè avila gôre mongi Asur, gô be byè gô ntye yazô, kô yè jingiṉa boli gw’im̃ôndô yazô.

6Mbèy y’arigaṉi yi Yakob yi be dwaṉa gô garegare y’aṉongw’am̃enge ga ômpèmbè wi pila gôre Yeôva, g’adodo m’aṉingô gw’am̃aṉi; mi re m’arangô gôr’ôma, mi re m’arum̃e awaṉa w’aṉaga. 7Mbèy yi Yakob y’arigaṉi yi be dwaṉa gôr’aṉongo, gô garegare y’aṉongw’am̃enge, ga liyoni gô gare y’inyam̃a s’iga, ga mwô’liyoni gô gare y’ilemba y’adombè; gô pyagaṉè e jara azasuṉa, ôma fo wi sungiṉa. 8Ôgo wo wi ga rômbiṉe gôr’ilôvalôvi yo, n’ilôvalôvi yo yôdu yi ga yilizô vya!

9Gô ntyugu mèyoṉo, bulye Yeôva, mi be jiliz’ikavali so vya avila gô garegare yo, mi be jiliz’intyôṉe so; 10mi be jiliz’inkala si ntye yo vya mi be saz’inagô so injoli sôdu; 11mi be jiliz’izèṉisi vya avila g’ôgo wo, ko w’alwaṉa n’aganga wi poga; 12mi be jiliz’ikaṉi so n’ibwiti so vya avila gô garegare yo, ko w’azaviṉa nyèṉè ijanja s’ago mo; 13mi be jiliz’ikaṉi so s’Astarte avila gô garegare yo, na mi be jiliz’inkali so. 14Mi be fwiz’ekôlè zam̃ n’eguṉu, n’ibenda, gôr’aṉongo mi re mi pa jogo.

Currently Selected:

Mika 5: MYE

Highlight

Copy