Matay 28

1Soṉo pyagaṉa pa, gw’ayenji ôwenja wi ntyugu nônga yi soṉo, agèndi Marya yi Magdala ni Marya mori gô jeṉ’ôrôngiṉô. 2Na vôna, arweṉ’isugyazugya si ntye sipôlô; konde yenjèl ya Rerè y’azum̃iṉi avila g’ôrôṽa, aṽya gô kavaly’idô avila g’ôrôngiṉô, alwaṉa baru gô nyô. 3Edidi zè z’avegagi g’ibam̃iṉa si njalitôṽa, n’ ingoy sè s’avegagi pupu pôlô. 4N’aratam̃iṉi mongi pengiṉa n’itya agalwa ga bende. 5Ndô yenjèl awiṉizi, awuliny’antô inè: Aryaṉi, konde my’avôrô inè, aṉwè bute Yesu y’aṽanyô gô krosi. 6E zele vèṉo; atôngwi ga nt’awulyi yè. Yôgôṉi, ko jeṉaṉi, mbôra y’apegage Rerè dèwa pa, 7ko kèndaṉi nèganèga gô buliny’iṉèngi yè inè, atôngwi avila gw’ijuwa. Na vônaṉi, e kènda gô bôsô yaṉi gô Galile: gôgô be jeṉa ṉwè yè. Vônaṉi, my’abulinya ṉwè. 8Alubwi antô mè nèganèga avila g’ôrôngiṉô, n’itya ni mbya mpôlô, n’avali waô mangô gô bunguṉe ntyangô gôr’iṉèngi.

9Na vôna, Yesu alataṉi na waô, awulya inè: Mbôlôaṉi! N’aṽyeṉi antô, agôt’agôlô mè, azaviṉè. 10Vovo Yesu awulinyi waô inè: Aryaṉi, gèndagaṉi ko bulinyaṉi awareri yam̃ inè, wi ga gènde gô Galile; gôgô be jeṉa waô myè.

11Gw’agèndagi waô gô mpoṉo, vôna, awèwo gôre mongi pengiṉa w’aṽyeṉi gô nkala, arakily’imiṉisè impôlô isam̃u yôdu y’arweṉi. 12Na gw’alataṉi waô n’aṉèro w’awôndi môndo, av’isozè sika nyenge, awulya inè: 13Wulyaṉi nè: Iṉèngi yè y’aby’ôgwèra gô jufè, gw’adèwaga zwè. 14Na ja guvèrnèr ajogw’igamba, gambèṉè azwè be poṉizè, alwaṉiza ṉwè njuke fo. 15Yeṉo awong’isozè sika, alenda ga nt’aṉènjyô waô. N’igamba nyiṉo ny’arakilyô gôr’Iju, kwanga na ṉèṉo wiṉo.

16Agèndi igôm̃i ny’iṉèngi n’ôṉèngi ôm̃ori gô Galile, gô nômba y’arevyô waô ne Yesu. 17Na gw’ayeṉi waô yè, w’azaviṉi yè. Ndô awèwo w’alôṽi mpaga. 18N’aṽyeṉi Yesu agamba na waô, awulya inè: Ngulu yôdu g’ôrôṽa na gô ntye yi re pô pa myè. 19Sambô, gèndagaṉi, ko nènjaṉ’aṉongo môdu, aṽatiza waô gw’ina nya Rerè, na ny’Ômwaṉa, na ny’Iṉiṉ’Iṽya, 20nènjaga waô gô bandam̃iṉ’isam̃u yôdu y’azômbyi myè ṉwè. Na vônaṉi, my’are na ṉwè egômbe zôdu, kwanga gô be suke ntye yiṉo.

Currently Selected:

Matay 28: MYE

Highlight

Copy