Matay 23

1Egômbe mè Yesu agambi n’aṉaga n’iṉèngi yè, awulya inè:

2Irèndisi n’ifarisi wi dwaṉa baru gw’epwe zi Môsès. 3Sambô lendaṉi ko penjavenjaṉ’isam̃u yôdu yi bulinya waô ṉwè; ndô alendaṉi ga nt’ar’ijanji saô. Konde wi bulya, ndô wi pa denda du. 4Konde wi kôr’arwaṉô aliri ni jola gô twaṉô, aralya mô gw’ibega s’aṉaga, ndô wi pa jivire tômbiṉa mô waômè n’ôm̃ori w’im̃eṉô yaô. 5Ndô wi dend’ijanji saô sôdu gô jeṉô n’aṉaga. Yeṉo wi pang’ifilatèri saô n’ômpuzu, avendy’anyègè m’ingoy saô; 6wi tonda kè ilwaṉô iṽya gw’igeṽe, n’alwaṉô mi ṉam̃i gw’inagô si soṉo; 7wi tonda gô sanguṉô gw’agôliṉô, na gô fweyô n’ aṉaga inè, rabi, rabi. 8Ndô aweyôṉi nè, rabi, konde ôm̃ori ne ôṉènji waṉi, n’aṉwèdu aṉwè awarerè. 9Aweyaṉi kè ôm’edu gô ntye inè, rera, konde ôm̃ori ne Reri yaṉi, ayè yi re g’ôrôṽa. 10Aweyôṉi kè inè, iṉènji, konde ôm̃ori ne Ôṉènji waṉi, inè, Krist. 11Ndô ôm’ômpôlô gôre ṉwè e be dwaṉe nyôngô yaṉi. 12N’ôm’edu e be pendy’ôkuṽi wè e be sônyô, ndô ayè yi sôny’ôkuṽi wè e be pendyô.

13Azile gôre ṉwè irèndisi n’ifarisi imbyagwaṉa! konde aṉwè nunj’iṉongo ny’ôrôṽa gôr’aṉaga; aṉwè pa jingiṉa aṉwèmè, ge jivira waô wi bele jingiṉa gô jingiṉa.

14Azile gôre ṉwè irèndisi n’ifarisi imbyagwaṉa! konde aṉwè ny’ inagô s’itika, agambiṉ’ôling’ôla mpondyaga; yeṉo aṉwè be dèng’ôgara vyagaṉô.

15Azile gôre ṉwè irèndisi n’ifarisi imbyagwaṉa! konde aṉwè pingwavingwe ntyuṽa ni ntye gô pang’ôṉèngi ôm̃ori; na gô twè yeṉo, aṉwè pangè ômwaṉa w’elôngô z’ôgôṉi nyongo mbaṉi vyagaṉô n’aṉwèmè.

16Azile gôre ṉwè, apoku mi kèndy’aṉaga, gô bulya ṉwè inè: J’ôm’edu atange nagô y’Anyambyè ôrangô, e z’ôsam̃u; ndô j’ôm’edu atange sika ya teṉateṉa yi nagô y’Anyambyè ôrangô, e ga lend’ôrangô mè. 17Aṉwè dosu n’ apoku! evôlô ne zeṉi, sika ya teṉateṉa, mbè nagô y’Anyambyè yi pange sika ya teṉateṉa mè ôrunda? 18Aṉwè tô bulya kè inè: J’ôm’edu atange mbôra yi jirô intyagô ôrangô, e z’ôsam̃u; ndô j’ôm’ edu atange mpagaga yi re pô pa gô yô ôrangô, e ga lend’ôrangô mè. 19Aṉwè apoku! evôlô ne zeṉi, mpagaga, mbè mbôra yi jirô intyagô yi pange mpagaga mè ôrunda? 20Sambô ayè yi tange mbôra yi jirô intyagô ôrangô, e tanga yô ôrangô ni yom̃a yôdu yi re gô yô; 21n’ayè yi tange nagô y’Anyambyè ôrangô, e tanga yô ôrangô na yè kè yi dwaṉa gô yô; 22n’ayè yi tang’ôrôṽa ôrangô, e tang’eka z’Anyambyè ôrangô na yè kè yi re baru gô zô.

23Azile gôre ṉwè irèndisi n’ifarisi imbyagwaṉa! konde aṉwè p’em̃ori avila gw’igôm̃i nyi ndundum̃èṉè, n’anèt, ni kumin, ko ṉwè tig’isam̃u yi re n’isolo vyagaṉô gw’ivanga, yô ne, ôgôre, ni nkèngo, n’ôrèti: ndô yiṉo y’arô dendyô nwè, ko ṉw’ariga kè yoṉo. 24Aṉwè apoku mi kèndy’aṉaga! aṉwè kanjuṉ’ ôfuru, ko ṉwè mèṉe kamèli.

25Azile gôre ṉwè, irèndisi n’ifarisi imbyagwaṉa! konde aṉwè jôvuṉ’imogi n’epèlè gô nkôṽa y’igala, ndô gô gare ntye yi re ralye n’ikwèra n’ibe. 26Awè farisi y’ipoku! lônge jôvuṉe gare ntye y’imogi n’epèlè, ko izamba ya yô dwaṉa kè pupu.

27Azile gôre ṉwè irèndisi n’ifarisi imbyagwaṉa! konde aṉw’ar’egolaṉi g’inagô si bende, kembô pa pupu, si jeṉaṉ’imbya gô nkôṽa y’igala, ndô gô gare ntye si re ni pa yi bende n’isèkè sôdu ralye. 28Yeṉo re ṉwè kè, gw’igala aṉwè jeṉaṉ’agôre gôr’ aṉaga, ndô gô gare ntye aṉw’are n’ômbyagwaṉa n’ijanj’ibe ralye.

29Azile gôre ṉwè, irèndisi n’ifarisi imbyagwaṉa! konde aṉwè nôg’ inagô si bende y’ivogisi, am̃èpiz’irôngiṉô y’agôre, awulya inè: 30Arwe nè azw’avegagi gw’egômbe z’ireri sazô, gavoṉo azwè re tô diṽe na waô gô pôvize ntyiṉa y’ivogisi. 31Yeṉo aṉwè takilya gw’ikuṽi yaṉimè inè, aṉwè n’awaṉa wa mongi w’ayôṉ’ivogisi. 32Sambô yônyaṉi egèṉizô z’ireri saṉi. 33Aṉwè im̃amba, aṉw’awaṉa w’impeṉe, aṉwè ko fang’ôgôm̃a w’elôngô z’ôgôṉi sè? 34Yeṉo, vônaṉi, mi tôm̃a gôre ṉwè ivogisi, n’ aṉaga w’imya, n’irèndisi. Aṉwè be jôṉ’awèwo, aṽany’awèwo kè gô krosi, aṉwè be siṽ’awèwo gw’ inagô saṉi si soṉo, agombiza waô avila gô nkala agènda gô nkala, 35ko ṉwè byeṉô ne ntyiṉa y’agôre yôdu y’avôvizyô gô ntye, avila gô ntyiṉa y’Abèl y’ôgôre, kwanga gô ntyiṉa yi Zakarya, y’ômwaṉa wi Barakya, ayônyô ṉwè ntyo nagô y’Anyambyè ni mbôra yi jirô intyagô. 36Rèti mi bulinya ṉwè inè, isam̃u yiṉo yôdu yi be bya gôr’ivôm̃a nyiṉo.

37Yerusalèm, Yerusalèm, awè yi jôṉ’ivogisi avunga waô wi tôm̃ô gôre wè adô, inyongo sinyenge s’aṽeli myè gô datiz’awaṉi wo, ga nte datiz’ôbôta wi njogoṉi awaṉi wè gw’ampavi mè, ko ṉw’ayivira! 38Vônaṉi, nagô yaṉi y’atigaṉi gôre ṉwè ntevô; 39konde mi bulinya ṉwè inè, aṉwè ze tô jeṉe myè nyèṉè, kaô gô be bulya ṉwè inè: Ôzaviṉô gôre yè yi bya gw’ina nya Rerè!

Currently Selected:

Matay 23: MYE

Highlight

Copy