Matay 2

1Gw’ayanyô Yesu gô Betelèm yi Yuda, gw’intyugu s’Erod y’ôga, vôna, aṽyeṉi aṉaga w’imya avila gô tongwa ni nkômbe aṽya gô Yerusalèm, awulya inè: 2Ôga w’Iju are jaṉô pa are na gweṉi? Konde azwè ayeṉi ôgègèṉi wè gô tongwa ni nkômbe, abya zwè gô saviṉè.

3Gw’ayogyô Erod y’ôga igamba, ayeṉi njuke, ni Yerusalèm yôdu na yè. 4N’alatizi yè imiṉisè impôlô sôdu n’irèndisi y’aṉaga, aṽambya waô mbôra yi re Krist gô jaṉô. 5N’awulinyi waô yè inè: Gô Betelèm yi Yuda, konde yeṉo re tèndô pa ne ôvogisi inè: 6Awè kè, Betelèm, gô ntye yi Yuda, ô z’ivend’inyangô gw’inkal’ impôlô si Yuda, konde e be bya avila gôre wè ôvangiṉi wi be penjavenj’aṉagi wam̃ Israèl. 7Vovo aweyi Erod aṉaga mè w’imya ntyorya, aṽambya waô mbyambye egômbe z’awôm̃unyi ôgègèṉi. 8N’arôm̃i yè waô gô Betelèm, awulya inè: Gèndagaṉi ko butaṉi mbyambye g’ômwanja w’ômwaṉa na gô be dènga ṉwè yè, ko twaṉaṉi myè ntyangô, ko mi kènda kè gô saviṉè.

9Waô pôganyô p’ôga w’agèndagi. Na vôna, ôgègèṉi w’ayenyô waô gô tongwa ni nkômbe, w’agèndi gô bôsô yaô, aṽya gô kum̃aṉa gw’igôṉô nyi mbôra y’avegag ’ômwaṉa. 10Na gw’ayeṉi waô ôgègèṉi w’ayeṉi mbya mpôlô. 11N’ayingiṉi waô gô nagô, ayeṉ’ ômwaṉa ni Marya, yi ngi yè, n’avôswi waô gô ntye azaviṉè; n’aṉunguṉi waô gari yaô, avè yom̃a yi mpagaga, inè, sika ya teṉateṉa ni yôm̃a yi nkangô. 12Na gw’awulinyô waô n’Anyambyè gô nyinô inè, w’awinya du gôr’ Erod, agèndi waô gô ntye yaô ni mpoṉo nyèṉè.

13Waô kèndaga pa, vôna, yenjèl ya Rerè y’ayeṉaṉi gôre Yôsèf gô nyinô, awulya inè: Ṉongwa ko bong’ômwaṉa ni ngi yè awanga gw’Egipt, ko dwaṉa gôgô kaô my’abulinyo, konde Erod e be but’ ômwaṉa gô jôṉè. 14N’aṉongwi Yôsèf, awong’ômwaṉa ni ngi yè ôgwèra, agènda gw’Egipt. 15N’alwaṉi yè gôgô kwanga gw’ayuwi Erod, ko igamba ny’agambyô ne Rerè gôr’ôvogisi twa rèti inè: My’ aweyi ômwaṉi wam̃ avila gw’Egipt.

16Vovo gw’ayeṉi Erod inè, avèdyô n’ aṉaga w’imya, aṽendi pôlô, n’arôm̃i yè aṉaga, ayôṉiz’ aw’aṉôm̃e waôdu w’avegagi gô Betelèm na gô ntye yôdu vingôvingô gô yô, avila gôr’ awaṉa w’impum̃ ’imbaṉi agènda gôr’awangô, ga nt’avegagi egômbe z’aṽambyi yè aṉaga w’imya. 17Vovo arweṉ’ igamba ny’agambyô ne Yeremya y’ôvogisi inè: 18Gô Rama ayogaṉô mbôgiṉa, ideṉa, n’edingô evôlô: Rakèl ndeṉag’ awaṉi wè, ko ayivire sindyô ôrèm̃a, konde wi zele.

19Ndô gw’ayuwi Erod, yenjèl ya Rerè y’awôm̃unyi gôre Yôsèf gw’Egipt gô nyinô awulya inè: 20Ṉongwa ko bong’ômwaṉa ni ngi yè, agènda gô ntye y’Israèl, konde mongi w’awutagi em̃èṉo z’ômwaṉa w’ajuwi. 21N’aṉongwi Yôsèf awong’ômwaṉa ni ngi yè, agènda gô ntye y’Israèl. 22Ndô gw’ayogyô yè inè. Arkelaus e pangiṉa gô Yuda gw’inyanga nya reri yè Erod, aryeṉi gô kènda gôgô; ndô gw’awulinyô yè n’Anyambyè gô nyinô, alubwi avila gw’inkôṽa si Galile, 23n’aṽyeṉi yè alwaṉa gô nkala y’aweyôgô inè Nazarèt, ko igamba ny’agambyô ne ivogisi twa inè: E be fweyô inè, mwô’Nazarèt.

Currently Selected:

Matay 2: MYE

Highlight

Copy