Yôèl 1
1
1Igamba nyi Yeôva ny’agambyô gôre Yôèl, y’ômwaṉa wi Petuèl.
2Vôganyôṉi nyiṉo, aṉwè aṉèro! yogoṉi, aṉwèdu alwaṉi wi ntye! ndaga ôṉongo wiṉo yi pa twa gw’egômbe zaṉi, ge gw’egômbe z’ireri saṉi? 3Rakilyaṉi yô gôr’awaṉi waṉi, ko awaṉi waṉi takilya yô gôr’awaṉi waô, n’awaṉi waô gôr’ivôm̃a nyi be duka! 4Ezom̃a zi re gazam tiga pa, zi re nyô pa ne ôsakampazô; ezom̃a zi r’ôsakampazô tiga pa, zi re nyô pa ni yelèk; n’ezom̃a zi re yelèk tiga pa, zi re nyô pa ni asil.
5Ṉongwaṉi, aṉwè yonga, ko deṉaṉi! zim̃iṉaṉi, aṉwèdu inyongi s’ivè, konde ôbuka w’atômbyô avila gw’agwaṉi maṉi! 6Konde iṉongo nyi re bya pa gô ntye yam̃, ngulu ni ntangô fo. Nyi re n’anô mi liyoni, n’igèngo yi liyoni nyantô. 7Nyi re bundakaṉa p’ôgoli wam̃; nyi re nyigyanyigya pe figi yam̃, are panga pa yô tele, aṽèga yô; ampari m’ôgoli m’atweṉi pupu.
8Leṉa ga izali nyi re nyi pa dèwa n’ôṉôm̃e ni mori nyi bore pinde gô deṉe ndegô y’erumbe zè! 9Intyagô s’inya na si jonga y’aniṉi avila gô nagô yi Yeôva; imiṉisè, inyôngô si Yeôva, si re n’iwoga. 10Impindi y’abundakaṉi, ntye yi re n’ekèṽa; konde ibile s’ajili, ôbuka w’akam̃iṉi, agali m’apweṉi. 11Iyanjisi y’amama, iyanjisi y’intyaga s’igoli yi sim̃iṉa, g’ômwanja wi frômènte na wi orzi, konde egômbe zi teṉ’ôwongo w’intyaga z’aperi. 12Ôgoli w’abundakaṉi, erere zi figi zi jôm̃a; erere zi garnata, ôyila, n’ôba, rere yôdu y’intyaga y’ajôm̃i ... igeṽa nyi re maṉa pa gôr’awaṉa w’aṉaga!
13Aṉwè imiṉisè, nwanyaṉ’ikuṽi yaṉi, ko deṉaṉi! leṉaṉi, aṉwè inyôngô si mbôra yi jirô intyagô! yôgôṉi ko dèwaṉi ôgwèra bora pe pinde, aṉwè inyôngô s’Anyambyè yam̃! konde intyagô s’inya na s’ijonga s’adoṽi avila gô nagô y’Anyambyè yaṉi. 14Myezaṉ’esônge, ôlataṉô w’ôrunda! latizaṉ’aṉèro n’alwaṉi wi ntye waôdu, gô nagô yi Yeôva, Anyambyè yaṉi, ko tôngaṉi gôre Yeôva!
15Azile gô ntyugu! konde ntyugu yi Yeôva y’atweṉi pyèrè: yi bya ga ôjili avila gôr’Ôma wi ngulu yôdu. 16Inya si pa tômbô gw’antyo mazô? igeṽa ni mbya yi pa doṽa avila gô nagô y’Anyambyè yazô? 17Ôlônda wi re boṉa pa gô ntye; inagô si penjavenj’inya s’atweṉ’inteṽô, inagô s’igumba s’asazyô, konde ibile si zele. 18Inyam̃a si sim̃iṉa, ilemba y’inyare yi jeṉe njuke, konde yi zele n’inya; vangaṉ’ilemba y’adombè yi jeṉe njuke. 19Yeôva, mi tônga gôre wè! konde ôgôṉi wi re peza p’idèdè y’itôve, n’ibam̃iṉa s’ôgôṉi si re peza pe rere yôdu y’intyaga. 20Inyam̃a s’iga si tônga kè gôre wè; konde iloṽi y’akam̃iṉi, n’ôgôṉi w’apez’idèdè y’itôṽe.
Currently Selected:
Yôèl 1: MYE
Highlight
Share
Copy
Want to have your highlights saved across all your devices? Sign up or sign in
Published by the British and Foreign Bible Society in 1927.
