Ôsea 6
6
1Yôgôṉi, azwè ga winyeṉi gôre Yeôva! Konde are jôkuṉa pa, ndô e be jinga zwè; are bôla pa, ndô e be kôriṉe vôri yazô. 2E be tôliza zwè gô ntyugu mbaṉi; na gô ntyugu yi ntyarô e be nongunya zwè, ko zwè dwaṉa bo g’ôzô wè. 3Azwè ga mye, azwè ga wute gô mye Yeôva; ibyi sè si re rèti ga s’ijenja s’ôwenja. E be bya gôre zwè ga ningô, ga ningô yi ntyèla yi tèṽize ntye.
4Mi be dendiṉo ande, awè Efrayim? Mi be dendiṉo ande, awè Yuda? Ômbyi waṉi wi re g’evindi z’ibanga, ga ômpèmbè wi sunge pyagaṉa. 5Yeṉo mi be bôla waô n’ivogisi, mi be jôṉa waô n’agamba m’ôgwaṉi wam̃, n’ijèkèlyi sam̃ si be kogwa g’ôzange. 6Konde mi tond’ômbya arang’intyagô, n’imya s’Anyambyè si re vyagaṉô n’intyagô si pezô.
7Wi re g’aṉaga wi re pava pe njeka; vovo wi re dwaṉa p’ibekelyô fo gôre myè. 8Galaad ne nkala y’iyanjisi y’ibe, yi re ni lingilyô yi ntyiṉa. 9Nkumba y’imiṉisè yi re ga nkondo yi re gw’ebônda, njôṉaga gô mpoṉo yi Sikèm; konde w’apiṉ’ikuṽi yaô gô janj’ibe. 10My’are jeṉa p’isam̃u y’ererya gô nagô y’Israèl; vovo Efrayim e belaṉa, Israèl e feva. 11Gôre wè kè Yuda egômbe z’iteṉa zi re kekizyô pa gôre wè, gô be fwiṉiza myè ikôte y’iṉongo nyam̃.
Currently Selected:
Ôsea 6: MYE
Highlight
Share
Copy
Want to have your highlights saved across all your devices? Sign up or sign in
Published by the British and Foreign Bible Society in 1927.
