Ôsea 2
2
1Ntangô y’awaṉa w’Israèl yi be dwaṉa ga ntyèngè yi mbeṉe, yi re y’ayolye kèṉizô ge tangô; na gô mbôra y’awulinyô waô inè: Aṉwè arang’iṉongo nyam̃! vovo wi be bulinyô inè: Awaṉa w’Anyambyè ya bo! 2Awaṉa wi Yuda n’awaṉa w’Israèl wi be datizyô ta, wi be dôṽiny’ikuṽi yaômè ôvangiṉi, ko waô kogwa avila gô ntye; konde ntyugu yi Yisreèl yi be dwaṉe mpôlô. 3Wulinyaṉ’awareri yaṉi inè: Ami! ni yombi yaṉi inè: Rusama!
4Zozaṉi, zozaṉi g’ômwanja wi ngi yaṉi, konde e zele ômwantô wam̃, myè zele kè ôṉôm̃u wè! E ga rômb’evôve zè avila g’ôzô wè, n’ôṽelaṉô wè avila gôre yè! 5Mi vende sazè tele, ko mi dôṽyè ga gô ntyugu y’ayanyô yè, avangè ga itôve, ga ntye ya kaka, ko mi pangè gô juwa n’esôve; 6mi ze pôgiṉe awaṉi wè, konde waô awaṉa w’evôve. 7Konde ngi yaô are belô pa, ayè y’avundigi waô are denda pe ndaga yi ntyoṉi, konde awulyi nè: Mi be kènda gôr’arondi mam̃ mi pa myè mpèmbi yam̃ n’aṉingô mam̃, imyi yam̃ y’adombè n’ivèli nyam̃, agali mam̃ n’ijongi sam̃. 8Sambô vôna, mi ke nunje mpoṉo yè n’arèndè avang’ôgômba w’adô gô yô, ko yè alèng’impoṉo sè nyèṉè. 9E be kombiz’arondi mè, ndô e ze date waô; e be buta waô, ndô e ze dènge waô. Avila vovo e be bulya inè: Mi be kènda awinya gôr’ôṉôm̃u wam̃ ôlônga, konde egômbe mèzoṉo my’avegagi mbyambye vyagaṉô n’egômbe ziṉo.
10Konde e pa mya inè, my’aveṉi yè bile, ivè n’agali; ni sika ya pupu na ya teṉateṉa y’aveṉôgô myè gôre yè y’avenyô gw’isaviṉa si Baal. 11Yeṉo mi be tô bonge bile yam̃ gw’egômbe za yô n’ivè nyam̃ gw’egômbe za nyô, na mi be tômb’imyi yam̃ y’adombè n’ampèli mam̃ m’avegagi gô diṽiṉ’ôtele wè. 12Na vèṉo mi be sale ntyoṉi yè gw’antyo m’arondi mè, e zel’ôma wi be sungiṉè avila g’ôgo wam̃. 13Mi be maṉiz’igeṽi nyè nyôdu, ifèti sè, ambôm̃unyi mè m’agwèli, intyugu sè s’ijowa n’ilataṉô yè yôdu y’ôrunda. 14Mi be jiliz’intyagi sè s’igoli ni rere yè y’ifigi, y’awulyôgô yè inè: Siṉo n’ipa s’avenyô myè n’arondi mam̃! Mi be panga sô itôve, ko inyam̃a s’iga nya sô. 15Mi be sônyè ôgôm̃a g’ômwanja w’intyugu s’avezô yè yom̃a yi nkangô gôre Baal, gw’awori yè im̃ôrô yè n’ilôndi yè, agènda gôr’arondi mè, ko yè deṽaṉa myè, bulye Yeôva.
16Sambô vôna, mi bele durè agèndizè gw’itôve, ko mi kamba g’ôrèm̃i wè. 17Vovo mi be pè intyagi sè s’igoli n’ôdèdè w’Akor, ga iguge ny’igum̃u, e be jemba vovo ga gw’egômbe z’erumbe zè, na ga gô ntyugu y’agogwi yè avila gô ntye y’Egipt. 18Na gô ntyugu mèyoṉo, bulye Yeôva, ô be fweya myè inè: Ôṉôm̃e wam̃! awè ze fweye myè nyèṉè inè: Reri yam̃! 19Mi be tômb’ana mi Baal avila g’ôgwaṉi wè, ko w’areta mô nyèṉè n’ani maô. 20Gô ntyugu mèyoṉo, mi be jeke njeka gôre waô n’inyam̃a s’iga, inyoṉi s’ôrôṽa ni vugiṉa yi dandalanda gô ntye, mi be moguṉ’elendiṉa, n’ôkwara w’iwora n’igoṽi avila gô ntye, ko mi panga waô gô dwaṉa n’am̃ènjè. 21Mi be sum̃iṉo gô jômbo egômbe zôdu; mi be sum̃iṉo n’ôrèti, n’ôgôre, n’imèpiṉô ni nkèngo; 22mi be sum̃iṉo n’ôgiligili, ko wè mye Yeôva. 23Gô ntyugu mèyoṉo, mi be pôganyô, bulye Yeôva, mi be pôganyô ôrôṽa, n’ôrôṽa wi be pôganyô ntye; 24ntye yi be pôganyô bile, n’ivè, n’agali, ni yom̃a yiṉo yi be pôganyô Yizreèl. 25Mi be bèṉa gôre myè Lô‐Rusama gô ntye, ko mi dendiṉè nkèngo; mi be bulinye Lo‐Ami inè: Awè iṉongo nyam̃! ko nyô fwiṉiza kè inè: Awè Anyambyè yam̃!
Currently Selected:
Ôsea 2: MYE
Highlight
Share
Copy
Want to have your highlights saved across all your devices? Sign up or sign in
Published by the British and Foreign Bible Society in 1927.
