Danyèl 7
7
1G’ômpum̃’ôlônga wi Belisazar, y’ôga wi Babèl, Danyèl ayinô nyinô n’ijeṉa s’iṉiṉi nyè, gw’alèwagi yè g’ôdô wè. N’arèndi yè nyinô, arakily’isam̃u impôlô.
2Agambi Danyèl awulya inè: Avônagi myè gw’ijeṉi sam̃ ôgwèra, na vôna, impung’iṉay y’ôrôṽa y’awôli gô mbeṉe mpôlô. 3N’agogw’inyam̃’impôlô nay avila gô mbeṉe, arange mbela mô. 4Nônga y’avegagi ga liyoni, n’ampava mi ngwanyoṉi; n’avôni myè, kwanga gw’alulyô ampavi mè; n’arômbiṉô yô avila gô ntye, agum̃anyô yô gôre gw’intyôzô g’ôma, n’avenyô yô ôrèm̃a w’ôma. 5Na vôna, nyam̃a nyèṉè yi mbaṉi y’avegagi ga ursi, n’agum̃aṉi yô g’ôzamb’ôm̃ori, y’avegagi ni pa y’ibanja rarô g’ôgwaṉa gô garegare y’anô ma yô, n’awulinyô yô inè: Gum̃aṉa, ko ny’ôzôṉe imyenge. 6Isam̃u yiṉo vya my’avônagi, na vôna, nyèṉè y’avegagi ga njègo, y’avegagi n’ampav’aṉay ga mi nyoṉi gô nyum̃a; nyam̃a yiṉo y’avegagi ni wônjô nay, n’avenyô yô ipangiṉa. 7Isam̃u yiṉo vya my’avônagi gw’ijeṉi sam̃ s’ôgwèra, na vôna, nyam̃a yi nay y’avegag’ererya, erery’evôlô ni ngulu mpôlô; y’avegagi n’anô ampôlô m’ômwanga, y’anyeṉi anyigyanyigya, n ayari yô yom̃a y’arigaṉi n’agôlô; y’avegagi bangwaṉa pa n’inyam̃a sôdu s’avegagi gô bôsô ya sô, y’avegagi n’igôm̃i ny’imengô. 8N’azilyi myè imengô, na vôna, mengô nyèṉè nyangô y’agogwi avila gô garegare ya sô, n’imengô inônga ntyarô s’alulyô avila gô swaswo ni mengô yiṉo, na vôna, y’avegagi n’antyo g’antyo m’ôma, n’ôgwaṉa wi kamba n’ekale.
9My’avônagi gw’alôṽyôgô ka. N’ôṉèro w’intyugu alwaṉi baru. Ingoy sè s’avegagi pupu ga nèzi, n’itwe s’ewônjô zè s’avegagi ga imya imbya y’adombè; eki zè z’avegagi ga ibam̃iṉa s’ôgôṉi, n’intyôṉe sè ga ôgôṉi wi bam̃iṉa. 10Ôrèmbo w’ôgôṉi w’avôvi agogwa swaswo na yè. Ntozèny y’intozèny s’ayanjiṉagi yè, n’igôm̃i ny’intozèny s’imilyoni s’agum̃aṉi g’ôzô wè. Iyèkèli y’alwaṉi baru, ni yangô y’aṉunguṉô. 11Vovo avôni myè, g’ômwanja w’agamba m’ekale m’agambôgô ne mengô; na gw’avônagi myè, nyam̃a y’ayônyô, n’ebende za yô z’ayilizyô, awalô g’ôgôṉi gô pezô. 12N’inyam̃’im̃ori s’awongiṉô ngulu yaô, ndô m̃èṉo yaô y’alavizô kwanga gw’egômbe z’aretyô.
13My’avônagi gw’ijeṉi sam̃ s’ôgwèra, na vôna, gô vindi y’ôrôṽa avyeṉi ôma egolaṉi g’ômwaṉa w’ôma, agèndi yè gôr’ôṉèro w’intyugu, n’aṽagi waô yè pyèrè gôre yè. 14N’avenyô yè inyanga, ivenda n’ipangiṉa; n’aṉongo môdu, n’imbuṽe sôdu, n’aṉaga w’inkambiṉi sôdu s’ayanjiṉi yè. Ipangiṉi sè sô n’ipangiṉa sa koṉako si re s’avyagaṉe du, n’iṉongo nyè ny’ayilizô.
15Myè Danyèl, iṉiṉi nyam̃ ny’ayeṉi njuke gô gare ntye yam̃, n’ijeṉa s’ewônjô zam̃ s’aryezi myè. 16N’azusi myè pyèrè gôr’ôm̃ori avila gôre mongi w’avegagi vovo, n’aṽambyi myè yè ôrèti w’isam̃u yiṉo yôdu. Awulinyi yè myè yô, amyeza myè ibènguṉa s’isam̃u: 17Inyam̃’impôlô siṉo nay sô ne ag’anay wi be kum̃aṉa avila gô ntye; 18ndô iyombwi y’Ôma w’Igôṉôgôṉwe yi be bong’ipangiṉa, ko waô niv’ipangiṉa sa koṉako, avila gô koṉako agènda gô koṉako.
19Vovo my’aṽeli gô my’ôrèti g’ômwanja w’inyam̃a yi nay y’avegagi bangwaṉa pa n’inyam̃’im̃ori sôdu, erery’evôlô, y’avegagi n’anô m’ômwanga n’ifèra si nyènyè, y’anyeṉagi anyigyanyigya simbèy, ayare yom̃a y’arigaṉi n’agôlô; 20Na g’ômwanja w’igôm̃i ny’imengô s’avegagi na yè gw’ewônjô, na g’ômwanja wi mori y’agogwi ni ntyarô s’avôswi swaswo na yô, na g’ômwanja wi mengô mèyoṉo y’avegagi n’antyo, n’ôgwaṉa w’agambag’isam̃u y’ekale, n’ebagaṉô evôlô vyagaṉô n’im̃ori. 21N’ayeṉi myè mengô mèyoṉo yi pang’igôṽi gôr’iyombwi, ageṽa waô, 22kwanga gw’egômbe z’aṽyeṉi ôṉèro w’intyugu gô p’inyanga gôr’iyombwi y’Ôma w’Igôṉôgôṉwe, n’aṽyeṉ’egômbe zi r’iyombwi gô niv’ipangiṉa.
23Yeṉo agambi yè na myè inè: Nyam̃a yi nay, yô ne ipangiṉa si nay si be dwaṉa gô ntye, bangwaṉa pa avila gw’ipangiṉa sôdu, si be jilize ntye yôdu, ayara yô anyigyanyigya yô. 24Igôm̃i ny’imengô, sô ne igôm̃i ny’aga wi be kum̃aṉa gw’ipangiṉa siṉo. Ômwèṉè wi be kum̃aṉa gô nyum̃i yaô, e be bangwaṉa n’alônga, ko yè sôny’ag’ararô. 25E be kamb’agamba gô sir’Ôma w’Igôṉôgôṉwe, e be bangaty’iyombwi y’Ôma w’Igôṉômè, e be pikilya gô kaluṉe gômbe n’ivanga; n’iyombwi yi be pô gw’ago mè gw’egômbe, ni gômbe, n’ereṉe z’egômbe. 26Avila vovo ijèkèlya si be bya, ko waô tômbiṉè ipangiṉi sè si be sukizô ayilizô gô koṉako. 27Iṉongo, ipangiṉa, ni mpendiṉi y’ipangiṉa sôdu si re g’ôdôlôngô w’ôrôṽa, si be pô gôr’iṉongo ny’iyombwi y’Ôma w’Igôṉômè. Ipangiṉi sè sô ne ipangiṉa sa koṉako, n’ivangiṉi yè yôdu yi be janjiṉè ayogiṉô yè.
28Vèṉo ne isuka s’agamba. Myè Danyèl, my’azokolyô pôlô ne ipikilyi sam̃, ôzô wam̃ w’agalwi, n’avenjavenji myè agamba miṉo g’ôrèm̃i wam̃.
Currently Selected:
Danyèl 7: MYE
Highlight
Share
Copy
Want to have your highlights saved across all your devices? Sign up or sign in
Published by the British and Foreign Bible Society in 1927.
Danyèl 7
7
1G’ômpum̃’ôlônga wi Belisazar, y’ôga wi Babèl, Danyèl ayinô nyinô n’ijeṉa s’iṉiṉi nyè, gw’alèwagi yè g’ôdô wè. N’arèndi yè nyinô, arakily’isam̃u impôlô.
2Agambi Danyèl awulya inè: Avônagi myè gw’ijeṉi sam̃ ôgwèra, na vôna, impung’iṉay y’ôrôṽa y’awôli gô mbeṉe mpôlô. 3N’agogw’inyam̃’impôlô nay avila gô mbeṉe, arange mbela mô. 4Nônga y’avegagi ga liyoni, n’ampava mi ngwanyoṉi; n’avôni myè, kwanga gw’alulyô ampavi mè; n’arômbiṉô yô avila gô ntye, agum̃anyô yô gôre gw’intyôzô g’ôma, n’avenyô yô ôrèm̃a w’ôma. 5Na vôna, nyam̃a nyèṉè yi mbaṉi y’avegagi ga ursi, n’agum̃aṉi yô g’ôzamb’ôm̃ori, y’avegagi ni pa y’ibanja rarô g’ôgwaṉa gô garegare y’anô ma yô, n’awulinyô yô inè: Gum̃aṉa, ko ny’ôzôṉe imyenge. 6Isam̃u yiṉo vya my’avônagi, na vôna, nyèṉè y’avegagi ga njègo, y’avegagi n’ampav’aṉay ga mi nyoṉi gô nyum̃a; nyam̃a yiṉo y’avegagi ni wônjô nay, n’avenyô yô ipangiṉa. 7Isam̃u yiṉo vya my’avônagi gw’ijeṉi sam̃ s’ôgwèra, na vôna, nyam̃a yi nay y’avegag’ererya, erery’evôlô ni ngulu mpôlô; y’avegagi n’anô ampôlô m’ômwanga, y’anyeṉi anyigyanyigya, n ayari yô yom̃a y’arigaṉi n’agôlô; y’avegagi bangwaṉa pa n’inyam̃a sôdu s’avegagi gô bôsô ya sô, y’avegagi n’igôm̃i ny’imengô. 8N’azilyi myè imengô, na vôna, mengô nyèṉè nyangô y’agogwi avila gô garegare ya sô, n’imengô inônga ntyarô s’alulyô avila gô swaswo ni mengô yiṉo, na vôna, y’avegagi n’antyo g’antyo m’ôma, n’ôgwaṉa wi kamba n’ekale.
9My’avônagi gw’alôṽyôgô ka. N’ôṉèro w’intyugu alwaṉi baru. Ingoy sè s’avegagi pupu ga nèzi, n’itwe s’ewônjô zè s’avegagi ga imya imbya y’adombè; eki zè z’avegagi ga ibam̃iṉa s’ôgôṉi, n’intyôṉe sè ga ôgôṉi wi bam̃iṉa. 10Ôrèmbo w’ôgôṉi w’avôvi agogwa swaswo na yè. Ntozèny y’intozèny s’ayanjiṉagi yè, n’igôm̃i ny’intozèny s’imilyoni s’agum̃aṉi g’ôzô wè. Iyèkèli y’alwaṉi baru, ni yangô y’aṉunguṉô. 11Vovo avôni myè, g’ômwanja w’agamba m’ekale m’agambôgô ne mengô; na gw’avônagi myè, nyam̃a y’ayônyô, n’ebende za yô z’ayilizyô, awalô g’ôgôṉi gô pezô. 12N’inyam̃’im̃ori s’awongiṉô ngulu yaô, ndô m̃èṉo yaô y’alavizô kwanga gw’egômbe z’aretyô.
13My’avônagi gw’ijeṉi sam̃ s’ôgwèra, na vôna, gô vindi y’ôrôṽa avyeṉi ôma egolaṉi g’ômwaṉa w’ôma, agèndi yè gôr’ôṉèro w’intyugu, n’aṽagi waô yè pyèrè gôre yè. 14N’avenyô yè inyanga, ivenda n’ipangiṉa; n’aṉongo môdu, n’imbuṽe sôdu, n’aṉaga w’inkambiṉi sôdu s’ayanjiṉi yè. Ipangiṉi sè sô n’ipangiṉa sa koṉako si re s’avyagaṉe du, n’iṉongo nyè ny’ayilizô.
15Myè Danyèl, iṉiṉi nyam̃ ny’ayeṉi njuke gô gare ntye yam̃, n’ijeṉa s’ewônjô zam̃ s’aryezi myè. 16N’azusi myè pyèrè gôr’ôm̃ori avila gôre mongi w’avegagi vovo, n’aṽambyi myè yè ôrèti w’isam̃u yiṉo yôdu. Awulinyi yè myè yô, amyeza myè ibènguṉa s’isam̃u: 17Inyam̃’impôlô siṉo nay sô ne ag’anay wi be kum̃aṉa avila gô ntye; 18ndô iyombwi y’Ôma w’Igôṉôgôṉwe yi be bong’ipangiṉa, ko waô niv’ipangiṉa sa koṉako, avila gô koṉako agènda gô koṉako.
19Vovo my’aṽeli gô my’ôrèti g’ômwanja w’inyam̃a yi nay y’avegagi bangwaṉa pa n’inyam̃’im̃ori sôdu, erery’evôlô, y’avegagi n’anô m’ômwanga n’ifèra si nyènyè, y’anyeṉagi anyigyanyigya simbèy, ayare yom̃a y’arigaṉi n’agôlô; 20Na g’ômwanja w’igôm̃i ny’imengô s’avegagi na yè gw’ewônjô, na g’ômwanja wi mori y’agogwi ni ntyarô s’avôswi swaswo na yô, na g’ômwanja wi mengô mèyoṉo y’avegagi n’antyo, n’ôgwaṉa w’agambag’isam̃u y’ekale, n’ebagaṉô evôlô vyagaṉô n’im̃ori. 21N’ayeṉi myè mengô mèyoṉo yi pang’igôṽi gôr’iyombwi, ageṽa waô, 22kwanga gw’egômbe z’aṽyeṉi ôṉèro w’intyugu gô p’inyanga gôr’iyombwi y’Ôma w’Igôṉôgôṉwe, n’aṽyeṉ’egômbe zi r’iyombwi gô niv’ipangiṉa.
23Yeṉo agambi yè na myè inè: Nyam̃a yi nay, yô ne ipangiṉa si nay si be dwaṉa gô ntye, bangwaṉa pa avila gw’ipangiṉa sôdu, si be jilize ntye yôdu, ayara yô anyigyanyigya yô. 24Igôm̃i ny’imengô, sô ne igôm̃i ny’aga wi be kum̃aṉa gw’ipangiṉa siṉo. Ômwèṉè wi be kum̃aṉa gô nyum̃i yaô, e be bangwaṉa n’alônga, ko yè sôny’ag’ararô. 25E be kamb’agamba gô sir’Ôma w’Igôṉôgôṉwe, e be bangaty’iyombwi y’Ôma w’Igôṉômè, e be pikilya gô kaluṉe gômbe n’ivanga; n’iyombwi yi be pô gw’ago mè gw’egômbe, ni gômbe, n’ereṉe z’egômbe. 26Avila vovo ijèkèlya si be bya, ko waô tômbiṉè ipangiṉi sè si be sukizô ayilizô gô koṉako. 27Iṉongo, ipangiṉa, ni mpendiṉi y’ipangiṉa sôdu si re g’ôdôlôngô w’ôrôṽa, si be pô gôr’iṉongo ny’iyombwi y’Ôma w’Igôṉômè. Ipangiṉi sè sô ne ipangiṉa sa koṉako, n’ivangiṉi yè yôdu yi be janjiṉè ayogiṉô yè.
28Vèṉo ne isuka s’agamba. Myè Danyèl, my’azokolyô pôlô ne ipikilyi sam̃, ôzô wam̃ w’agalwi, n’avenjavenji myè agamba miṉo g’ôrèm̃i wam̃.
Currently Selected:
:
Highlight
Share
Copy
Want to have your highlights saved across all your devices? Sign up or sign in
Published by the British and Foreign Bible Society in 1927.