Rôm̃i 12
12
1Gw’egômbe mèzoṉo, Erod y’ôga, anyonyuṉ’ago mè gô jeṉiz’awèwo gô mandô njuke, 2n’ayôṉi yè Yakobu, ya mwô’ngwè wi Yôan, n’ôkwara. 3Gw’ayeṉi yè inè, igamba mè ny’arondy’Iju, arô kôti kè Pyère. Avegag’intyugu si nyô mpèmba yi re levèn fo. 4Ayè kôtè pa, aweli yè gô ntyôgô, avè gô penjavenjô n’inkumba nay s’isozè nay, aṽeli gô kogunyè gôr’ aṉaga Paki pyagaṉa pa. 5Yeṉo Pyère avenjavenjô gô ntyôgô, ni mandô y’agambiṉagi Anyambyè pôlô g’ômwanji wè.
6Ôgwèra mè w’avegagi j’ôwenja kôze, gambèṉè Erod akogunyè, Pyère avegagi tagô pa n’azungakaṉô ambaṉi, dèwa pa gô garegare yi sozè mbaṉi; n’ivenjavenji y’avegagi swaswo n’ômpômbala gô bandam̃iṉe nagô yi ntyôgô. 7Na vôna, yenjèl ya Rerè y’aṽyeṉi pyèrè na yè, n’aṽamb’ôzange gô nagô yi ntyôgô. N’awôli yenjèl Pyère g’ôṽanja, ayèm̃è, awulya inè: Ṉongwa ngwambè! N’azodw’azungakaṉô avila gw’ago mè. 8N’awulinyô yè ne yenjèl inè: Liry’ôtumbi wo, ko fwel’intyôzô s’atanga gw’intyôzô so. N’alendi yè yeṉo. N’arô bulinyô yè ne yenjèl inè: Wore ngoy yo, ko sônga myè. 9N’agogwi Pyère, azôngè, ndô e pa mya inè, ôsam̃u wi dendô ne yenjèl wi re rèti, ndô avikilyi nè, e jeṉe nyinô. 10Gw’avyagaṉi waô ivengiṉô ilônga na nya mbaṉi, w’aṽyeṉi gw’iguge ny’ômwanga nyi kènda gô nkala, n’aṉunguṉi nyô gôre waô nyômè; agogwi waô, avyagaṉ’igal’im̃ori. Vovo yenjèl y’alubwi pelè avila gôre Pyère.
11Gw’alwaṉi Pyère nju, awulyi nè: Vèṉo my’avôrô rèti nè, Rerè are tôm̃a pa yenjèl yè, ko yô tômba myè avila g’ôgo w’Erod n’avila gw’isam̃u yôdu yi bôndô n’Iju. 12Ayè pikilya p’igamba mbyambye, agèndi gô nagô yi Marya, yi ngwè yi Yôan, aweyôgô kè inè, Mark, mbôra y’avegag’aṉag’awenge dataṉa pa agambiṉaga. 13Gw’alôkagi Pyère iguge ny’evungu, aṽyeṉi nyôngô nyantô ini nyè ne Rôda, gô pôganyô. 14Amyeṉi yè inyôy nyi Pyère; ndô g’ômwanja w’igeṽa ny’ayenyô yè e pa nunguṉ’iguge, ndô avali yè mangô gô bulya inè, Pyère e kum̃aṉa g’ômpômbala. 15Awulinyi waô yè inè: Ô re nkende. Ndô awulyi buku inè, igamba nyi re du rèti yeṉo. N’awulyi waô inè: Yô ne yenjèl yè. 16Ndô Pyère avegagi ndôkaga. N’aṉunguṉi waô iguge, am̃ama gw’ayeṉi waô yè. 17Avèpô waô ne Pyère ôgo inè, wi ga lwaṉe dodo; n’arakilyi yè waô nt’akogunyô yè ne Rerè avila gô nagô yi ntyôgô, n’awulyi yè inè: Myezaṉ’isam̃u yiṉo gôre Yakobu na gôr’awarerè. Avila vovo agogwi yè, agènda gô mbôra nyèṉè.
18Gw’ayenj’ôwenja arweṉi edungu evôlô gôr’isozè g’ômwanja wi Pyère. 19Na gw’awutyô yè n’Erod, ko yè alèngè, agotiz’ivenjavenji, azômbya inè, yi ga yôṉô. Avila vovo azum̃iṉi yè avila gô Yuda agènda gô Sezare gô dwaṉa gôgô.
20N’avegagi Erod benda pa pôlô na mongi Tir na mongi Sidôn. Ndô w’aṽyeṉi n’ôrèm̃’ômô gôre yè; na waô panga pe Blaste, y’ôvenjavenji wi nagô y’ôga, gô dwaṉe ndeg’ waô, w’aṽambyi am̃ènjè, konde ntye yaô y’alèngag’inya avila gô ntye y’ôga. 21Na gô ntyugu y’aretyô yè, Erod, bora p’ingoy sè s’ôga, alwaṉi baru gw’eki zè, agamba na waô. 22N’arôngi aṉaga inè: Nyiṉo inyôy ny’anyambyè, aranga ny’ôma! 23Na v’igamba ny’agwaṉa yenjèl ya Rerè y’awôli yè, konde e pa p’isum̃inya gôr’Anyambyè. N’anyenyô yè n’igu, azul’ômwèy.
24Ndô igamba ny’Anyambyè ny’avendi mpendaga vyagaṉô, ni ntangô y’iṉèngi y’agundyô.
25Barnabas ni Sol, maza p’eṽilô zaô, w’awinyi avila gô Yerusalèm, awonga na waô Yôan, yi fweyô kè inè, Mark.
Currently Selected:
Rôm̃i 12: MYE
Highlight
Copy
Compare
Share
Want to have your highlights saved across all your devices? Sign up or sign in
Published by the British and Foreign Bible Society in 1927.
