ROMA 8
8
Katuwu anu naponinika Inosa mPue Ala
8:1-17
1Inceʼe puʼunya painaka wawaseʼi bareʼemo reʼe popahuku ri waʼa ntau anu tuwu ri kasambaʼa-mbaʼa pai Pueta i Yesu Kerisitu. 2Maka padika Inosa mPue Ala anu mampasambaʼa-mbaʼa kita pai i Kerisitu Yesu anu malapa yaku ungka ri padika anu mampapopuʼu kasalaa pai kapate. 3Nunjaa anu bareʼe nakoto waʼa mpadika agama mampowia, ua kalenteta kita tolino inceʼe roo ndawianaka i mPue Ala. I Pue Ala manangimo kuasa ncalaa ri engko ngkatolino, ri pampokau-A Ana-A anu motaʼa ewa tolino anu masalaa mancompo waʼa ncalaa. 4Ndawianaka i mPue Ala inceʼe naka kobangani waʼa anu ndapatada ri waʼa mpadika agama nto Yahudi setu da tepotaʼa ri katuwuta anu mepoʼinaya ri Inosa mPue Ala, banya anu malulu engko ngkatolinota. 5Maka waʼa ntau anu tuwu malulu engko ngkatolino, podo manawa-nawa anu singkana pai engko ngkatolino. Paikanya waʼa ntau anu katuwunya malulu popanini Inosa mPue Ala, podo manawa-nawa pepokono Inosa mPue Ala. 6Ane nawa-nawamu naponinika nuengko ngkatolino inceʼe da mampowuaka kapate. Paikanya ane nawa-nawamu naponinika Inosa mPue Ala, inceʼe da mampowuaka katuwu anu sambaʼa-mbaʼa pai i Pue Ala. 7Tau anu nawa-nawanya nakuasai engko ngkatolino, tau setu moʼiwali pai i Pue Ala; maka tau seʼe bareʼe mepoʼinaya ri waʼa ncongka mPue Ala; pai lawi bareʼe da nakoto da meaya ri songka mPue Ala. 8Waʼa ntau anu katuwunya nakuasai engko ngkatolino, waʼa ntau setu bareʼe ndapokono i mPue Ala.
9Paikanya komi waʼa ngkasangkompo, bareʼemo nakuasai engko ngkatolino. Komi tuwumo malulu Inosa mPue Ala – Ara monco kojo Inosa mPue Ala mamponinika katuwumi. Tau anu bareʼe napeari Inosa i ngKerisitu, tau setu banya i Kerisitu tumpunya. 10Paikanya ane i Kerisitu lau ri rayami, mau wata ngkoromi mate ua kasalaa paikanya Inosa mPue Ala mawai katuwu ri komi, maka madagomo pokentami pai Pue Ala. 11#1 Kor. 3:16 Ane Inosa mPue Ala anu mampatuwumo i Kerisitu ungka ri kapate setu lau tuwu ri rayami, Sira anu mampatuwu i Kerisitu ungka ri kapate, Sira seʼe woʼu da mampatuwu koromi anu da mate setu. Inosa anu lau ri rayami inceʼe anu da mawianaka.
12Inceʼe puʼunya ee waʼa ngkasangkompo, kita ndasarumaka, paikanya banya ndasarumaka ri engko ngkatolinota; kita bareʼemo da malulu pepokononya. 13Maka ane komi tuwu malulu engko ngkatolino, komi da marata kapate; paikanya ane tuwu ri kuasa Inosa mPue Ala, liu-liu ndipepatemo waʼa mpowia anu salaa, ane ewanceʼe komi da tuwu. 14Waʼa ntau anu ndaponinika Inosa mPue Ala inceʼemo waʼa ana mPue Ala. 15#Mrk. 14:36, Gal. 4:6 #Gal. 4:5-7 Maka Inosa anu ndawai mPue Ala ri waʼa ngkasangkompo, inceʼe banya mampowatua komi painaka komi da tuwu ri eka ndaya. Inosa mPue Ala da mampapewali komi ana i mPue Ala. Pai ua kuasa Inosa mPue Ala setu komi mampeboo i Pue Ala, “Papa, boo Papaku!” 16Inosa mPue Ala sangkani pai inosata mampatongawa kakitanya waʼa ana mPue Ala. 17Mewali, ane kita seʼi waʼa ana mPue Ala, kita woʼu mampotumpu panta pai da mantarima waʼa mpopadonco anu ndapatoka mPue Ala tila waʼa ana-A. Kita mantarima sangkani-ngkani pai i Kerisitu nunjaa anu ndapatoka i mPue Ala da tila-A; maka ane kita maepe kapari sangkani-ngkani pai i Kerisitu, kita woʼu da ndapapeawa sangkani-ngkani pai Sira.
Peawa anu bareʼe da reʼe kapusanya
8:18-30
18Pura-pura kapari anu taepe wawaseʼi, malulu parata ndayaku, ane da ndapasintolio pai peawa anu da ndapatongawa ri kita, bareʼe liu-liu sintinaja. 19Tiku-tiku sambawo lino mantanga-ntanga da karata tempo pampatongawa i mPue Ala peawa waʼa ana-A. 20#Pal. 3:17-19 Maka sambawo lino ndapapaliukamo naka maru; banya ua pepokononya ngkalionya paikanya ndapapaliukamo i mPue Ala naka ewanceʼe. Paikanya mau ewanceʼe reʼe woʼu pampomata-mata: 21maka sangkani tempo da ndalapa ungka ri kuasa anu da mampakagero pai da ndasorepaka pai da ndapapeawa sangkani-ngkani pai waʼa ana mPue Ala.
22Taincani nakarataka wawaseʼi pura-pura anu ndapapewali i mPue Ala, meʼode-ode ua maepe kapari ewa kapari naepe mbeʼa anu da moana. 23#2 Kor. 5:2-4 Paikanya banya podo sambawo lino anu meʼode-ode, sako kita seʼe meʼode-ode ri rayata. Kita maratamo pombai anu uyu-uyunya ungka ri Pue Ala, inceʼe Inosa mPue Ala, pai ntongo tamampetaʼa pancorepaka i mPue Ala kita pai ndapampapewali kita ana-A. 24Maka tasarumaka kojo da ndasorepaka. Paikanya ane anu tapomata-mata setu takita matamo banyamo pampomata-mata toʼonya. Ara isema anu mampomata-mata anu nakita matamo? 25Paikanya ane kita mampomata-mata anu bareʼepa takita mata, inceʼe da tapopea ri karodo ndaya.
26Ewanceʼe seʼe Inosa mPue Ala rata mampelae kita ane kita malente. Maka kita bareʼe taincani ewambeʼi kamonconya da pekakaita. Inosa setu anu da mancuara i Pue Ala, mampekakaika kita mamparata peʼode-ode anu bareʼe taincani mantoʼo. 27Paikanya i Pue Ala anu maincani waʼa bangani ndaya ntau, maincani tangara ndaya Inosa, anu mekakai ri Pue Ala tila waʼa ntau-A silulu pai pepokono i mPue Ala.
28Taincani i Pue Ala anu madedewaka mpengaya-ngaya anu da mampareʼe dago tila ntau anu mampotowe Sira, anu roo ndapeboo malulu pepokono-A. 29Waʼa ntau anu roo ndapilisi i mPue Ala, lawi ungka ri tepuʼunya da mewali siwia pai Ana-A i Yesu Kerisitu, inceʼe painaka Ana-A setu mewali anu uyue ri oyo ntau maria. 30Ewanceʼemo i Pue Ala mampeboo waʼa ntau malulu ewa anu roo ndapakanoto riunya; pai waʼa ntau seʼe anu roo ndapeboo setu ndapasimadago pai Pue Ala. Pai waʼa ntau anu maratamo jaya ngkasimadago muni pai Pue Ala, posokinya tuwumo ri raya ngkuasa mPue Ala.
Towe mPue Ala anu ndaparata ua i Yesu Kerisitu
8:31-39
31Seʼi-seʼi nunjaamo ndakoto da mantoʼo kono pura-puranya setu? Ane i Pue Ala sambira pai kita, isema anu mangkoto da maewa kita? 32Ana-A ngkalio-A bareʼe ndapepurungi, ndapepombaika da tilata kita pura-pura, ewambeʼi painaka bareʼe da ndapepombaika ri kita mpengaya-ngaya anu ntaninya? 33Isema anu mangkoto da mampogiluka waʼa ntau anu roo ndapilisi mPue Ala, ane i Pue Ala anu mampatongawa kakitanya bareʼe masalaa? 34Ara da reʼe tau anu mampetisala kita? I Kerisitu da mampompasambiraka kita! Sira anu roomo mate pai Sira woʼu anu roomo ndapatuwu muni ungka ri kapate pai wawaseʼi ndate sangkani-ngkani pai Pue Ala mangkekeni kuasa. 35Isema anu mangkoto da masalempori i Kerisitu da mampotowe kita? Ara kasusa ndaya da masalempori, bara kapari, bara pejeani, bara kayoga, bara kakaasi-asi, bara pepa, bara kapate? 36#Pol. 44:23 Ndaʼuki ri Sura Magali ewaseʼi,
“Ua mancuru kakomi-Nya, sandeme-sandeme kami tuwu ri kapepanya.
Kami ndapowia ewa bimba anu da ndasambale.”
37Manoto bareʼe! Maka pura-pura setu kita menangi kojo maka Sira anu mampotowe kita! 38Maka kuaya kojo, ri sambawo lino, kapate bara katuwu ntano, malaʼeka bara anu makuasa ntano; madago peekasi anu wawaseʼi bara anu nepa da rata bara waʼa roso anu ntaninya; 39madago nunjaa-njaa anu ndate ri yangi bara anu reʼe ri lino, bara nunjaa anu ntaninya, pura-pura setu bareʼe da nakoto maompo i Pue Ala mampotowe kita, ewa anu roomo ndapatongawa ri Kerisitu Yesu Pueta.
Currently Selected:
ROMA 8: LAIPMF
Highlight
Copy
Compare
Share
Want to have your highlights saved across all your devices? Sign up or sign in