ROMA 6
6
Kapate ua salaa pai tuwu ri kasambaʼa-mbaʼa pai i Kerisitu
6:1-14
1Ane ewanceʼe nunjaamo anu da tatoʼo? Da tuwu mpaliu kita ri raya ngkasalaa da naka kakobangke-bangke towe ndaya mPue Ala ri kita? 2Manoto bareʼe kojo! Salaa bareʼemo makuasa ri kita, mewali ara wenu kita da tuwu mpaliu ri raya ncalaa? 3Ara bareʼepa ndiincani ri pangariu kita, kita ndapasambaʼa-mbaʼamo pai i Kerisitu Yesu? Posokinya kita ndapasambaʼa-mbaʼa pai Sira ri kapate-A. 4#Kol. 2:12 Ua popariu kita ndadayo sangkani-ngkani pai i Kerisitu mate sangkani-ngkani pai Sira, da naka ewambeʼi ndapampatuwu muni Sira ungka ri kapate-A ua kuasa i mPapa anu meawa, ewanceʼemo kita malinjakimo katuwu anu dawoʼu.
5Ane kita tuwu sambaʼa-mbaʼa pai i Kerisitu maka kita mate sangkani-ngkani pai Sira ewanceʼe woʼu kita ndapatuwu muni ewa Sira. 6Taincanimo ngkaliota anu masae matemo sangkani-ngkani pai i Kerisitu ri kaju ndapanggo da naka engkota anu masalaa ndagero; ua ewanceʼemo kita bareʼemo tuwu ri ara ngkuasa ncalaa. 7Maka ane sambaʼa tau mate, tau setu lapamo ungka kuasa ncalaa. 8Ane kita matemo sangkani-ngkani pai i Kerisitu, taaya woʼu kakitanya da ndapatuwu sangkani-ngkani pai Sira. 9Maka taincani i Kerisitu ndapatuwumo ungka ri kapate pai Sira bareʼemo da mate; bareʼemo reʼe kuasa ngkapate ri woto ngkoro-A. 10Kapate anu ndaepe i ngKerisitu inceʼmo kapate ua huku ncalaa. Inceʼe podo sangkani pewalinya rantani masae-sae. Pai katuwu anu ndalinjaki wawaseʼi inceʼemo katuwu anu i mPue Ala. 11Komi woʼu da mancarumakamo koromi mate ri raya ncalaa, pai tuwu muni ri pokenta anu monco pai Pue Ala ua i Kerisitu Yesu.
12Neʼemo ndipapaliu salaa da mangkuasai katuwumi ri lino seʼi da naka komi bareʼemo tuwu ri ara ngkuasa anu majaʼa. 13Neʼe ndipepombaika parewa ngkoromi ri kuasa ncalaa mawianaka powia anu majaʼa. Paikanya ndipepombaikamo koromi ri Pue Ala, ewa tau anu i owi mate, paikanya wawaseʼi tuwu. Pepombaikamo koromi ri Pue Ala da naka ndapake mawianaka pepokono mPue Ala. 14Salaa bareʼemo maya da masongka komi, maka komi bareʼemo tuwu ri ara ngkuasa waʼa mpadika agama nto Yahudi, paikanya ri ara mpuru pai towe i mPue Ala.
Mewali anamayunu ri pepokono mPue Ala
6:15-23
15Mewali ewambeʼimo kapusanya? Maya kita da mowia salaa? Maka kita banyamo tuwu ri ara ngkuasa waʼa mpadika agama nto Yahudi, paikanya kita tuwumo ri ara ngkuasa ntowe i mPue Ala? Manoto bareʼe maya! 16Koisa ndinawa-nawa ane rapanya komi mampepombaika koromi ri tau sambaʼa da mawianaka pepokononya, komi mewali watua ntau anu ndiaya setu – bara mewali watua ncalaa anu mangkeni komi ri kapate, bara watua anu mepoʼinaya ri Pue Ala, mewali simadago muni pai i Pue Ala. 17Paikanya kuunde i Pue Ala! Ane iowi komi mewali watua ncalaa, paikanya wawaseʼi ri kabuya ndayami mepoʼinaya ri pompaguru anu monco anu roomo ndapaguruka komi. 18Komi lapamo ungka ri kuasa ncalaa, pai wawaseʼi mewali watua da mawianaka pepokono i mPue Ala. 19Ua bareʼepa gana parata ndayami, kutotoraka komi, kuwai pandiri mpowatua da naka saru ndiparata ndaya. I owi komi mampepombaika nteliogu koromi ewa watua ri tetala anu karika pai majaʼa tila ntinako ndaya anu majaʼa. Da ewanceʼe seʼe wawaseʼi, da ndipepombaika nteliogu koromi ewa watua tila mpawianaka pepokono i mPue Ala ri tangara ndaya mPue Ala anu da mampakagali komi.
20Ri sindara komi mewali watua ncalaa, komi bareʼe nakuasai mpepokono mPue Ala. 21Ri sindara setu nunjaamo rasi anu ndirata ri waʼa mpowia anu wawaseʼi maeamo matami mampowia? Waʼa mpowia setu podo mangkeni kapate! 22Paikanya seʼi-seʼi komi lapamo ungka ri kuasa ncalaa pai mewalimo watua i mPue Ala. Rasimi inceʼemo komi tuwu tepatani tila i mPue Ala pai da mampareʼe katuwu anu monco anu bareʼe da reʼe kapusanya. 23Maka kapate inceʼe sili ncalaa; paikanya katuwu anu monco anu bareʼe da reʼe kapusanya sangkani-ngkani pai i Kerisitu Yesu Pueta inceʼe pombai mPue Ala anu ndawai ngkabongo ri kita.
Currently Selected:
ROMA 6: LAIPMF
Highlight
Copy
Compare
Share
Want to have your highlights saved across all your devices? Sign up or sign in