ROMA 13
13
Pedonge ri topoparenta
13:1-7
1Pura-pura tau sangaya-ngaya da medonge ri topoparenta, maka bereʼe topoparenta anu bareʼe marata kuasa ungka ri Pue Ala. Pai waʼa ntopoparenta anu reʼe wawaseʼi, mampapelinja kuasanya ua songka ungka ri Pue Ala. 2Mewali tau anu maewa topoparenta, posokinya maewamo anu roo ndapakanoto i mPue Ala. Pai tau anu mowia ewanceʼe da ndahuku. 3Maka tau anu madago powianya bareʼe da mampokaeka topoparenta. Podo tau anu mampowia jaʼa da maeka rayanya ri topoparenta. Ane da rayami tuwu bareʼe mampokaeka topoparenta, da ndipowiamo waʼa anu madago pai komi da naunde ntau. 4Maka topoparenta inceʼemo pomokau i mPue Ala da mawianaka anu da ndipomadago. Lawinya ane komi mampowia anu majaʼa sangaya-ngaya da ndipokaeka tau seʼe. Maka ewa sambaʼa pomokau i mPue Ala bareʼe jangkabongo pangkekeninya kuasa mpopahuku ungka ri Pue Ala. Tau seʼe da mangahuku waʼa ntau anu majaʼa powianya. 5Inceʼe puʼunya komi sangaya-ngaya da medonge ri topoparenta, banya podo ua maekami da nahuku paikanya ua kabuya ndayami.
6 #
Mat. 22:21, Mrk. 12:17, Luk. 20:25 Inceʼe woʼu puʼunya painaka komi mabayari asele, maka topoparenta setu toporioko i mPue Ala anu mawianaka tetalanya anu ndapakanoto. 7Mewali, ndibayari ri topoparenta nunjaa anu sangaya-ngaya da ndibayari ri tau seʼe. Da ndibayari asele ane naperapi asele ri komi; da ndibayari bea ane naperapi bea ri komi. Ndibangkeimo tau anu da ndibangkei pai da nditubunakamo waʼa ntau anu lawi da nditubunaka.
Pombepotowe
13:8-14
8Neʼe kojo komi mampoinda bara nunjaa-njaa ri kasitaumi, podo pombepotowe anu maya ndipoinda. Maka tau anu mampotowe kasitaunya, siʼa mabanganimo padika i mPue Ala anu naparata i Musa. 9#Pa. 20:13-15, 17, Paw. 5:17-19, 21, Tad. 19:18 Maka waʼa mpadika agama nto Yahudi anu mantoʼo: Neʼe mosalara, neʼe mepepate, neʼe melima, neʼe mamporaya-raya anu ngkasitaumu, pura-pura setu sangkani pai waʼa mpadika anu ntaninya, tepakaliogumo ri padika anu mantoʼo, “Kasitaumu da nupotowe ewa pampotowemu koromu.” 10Tau anu mampotowe kasitaunya, bareʼe da mampowia jaʼa ri tau ntaninya. Mewali tau anu mampotowe kasitaunya inceʼe tau anu mabanganimo tinako ndaya mpadika agama.
11Meruu ri pura-puranya setu ndiincanimo, ri tempo seʼi-seʼi temponyamo komi da tekiwoi ungka ri kayoremi. Maka tempo da pancorepaka kita kako maʼai ngkamosunya painaka ri tempo kita nepa montepuʼu meaya. 12Masaemo kawenginya mosumo da mareme. Mewali da tapeʼontokamo mampowia tetala mbani. Kita da mamparewani korota pai parewa anu mareme. 13Kita da mawianaka tetala anu monco pai tetubunaka ewa anu biasa ndawianaka ri ndeme. Neʼe mampowia susa mpoyangu-yangu. Neʼe mosalara pai moʼengko bareʼe tumoro, neʼe mombeluku bara masina raya. 14Mbolimo i Yesu Kerisitu anu mampakanoto nunjaa anu da ndipowia. Pai neʼe malulu engko ntolino anu masalaa anu podo mampakaʼosa sawoyo ndaya.
Currently Selected:
ROMA 13: LAIPMF
Highlight
Copy
Compare
Share
Want to have your highlights saved across all your devices? Sign up or sign in