ROMA 12
12
Katuwu gala i mPue Ala
12:1-21
1Ee waʼa ngkasangkompo! I Pue Ala pande mporaya ri kita. Inceʼe painaka kupomata-mata da naka komi mampanyombaka koromi ewa sambaʼa panyomba anu tuwu pai magali ri suara mPue Ala, anu da mampakawongko rayaa da ewanceʼe kamonconya panyombami ri Pue Ala. 2Neʼemo ndilulu waʼa engko lino seʼi. Mbolimo komi ndapapewali i mPue Ala tau anu dawoʼu, da naka komi tebalisaka. Maka ewanceʼe da ndipangkoto marata ndaya pepokono mPue Ala – inceʼemo nunjaa anu madago pai mampakawongko raya-A pai bareʼemo reʼe posarinya.
3I Pue Ala mawaimo pombai-A ri yaku. Inceʼe puʼunya painaka kutotoraka waʼa ngkasangkompo pura-pura: Neʼe taepe korota meruu pai anu kamonconya. Ri kalauka ndaya mbolimo kita da maincani ewambeʼi katedikanakamu; sambaʼa-sambaʼa seʼe da maepe koronya silulu pai kabangke mpeaya ndaya anu ndawai i mPue Ala ri siʼa. 4#1 Kor. 12:12 Korota seʼi mampotumpu parewa anu sondo. Sambaʼa-sambaʼa parewa setu reʼe tetalanya anu tumoro. 5Ewanceʼe seʼe kita. Mau kita seʼi maria imbanya paikanya kita mewali sangkoro-ngkoro maka ndapasambaʼa-mbaʼa ri Kerisitu. Pai kita ndapapokenta sambaʼa pai sambaʼa ewa pokenta parewa ngkoro ri sambaʼa tau. 6#1 Kor. 12:4-11 Sambaʼa-sambaʼa kita marata pombai mpuru i mPue Ala anu bareʼe siwia. Waʼa mpombai mpuru i mPue Ala ri kita malulu kapuru ndaya-A ri kita. Inceʼe painaka da tapoyoweka waʼa mpombai setu. Tau anu mangarata pombai da mampobambarika Nuntu i mPue Ala, tau setu sangaya-ngaya da mampobambarika Nuntu mPue Ala malulu peaya ndayanya. 7Tau anu marata pombai da mantulungi tau ntaninya, tau setu sangaya-ngaya da mantulungi kojo tau ntaninya. Tau anu marata pombai da mompaguru, tau setu sangaya-ngaya da mompaguru kojo. 8Tau anu marata pombai da maʼiowaka tau ntaninya, tau setu sangaya-ngaya da naʼiowaka kojo tau ntaninya. Tau anu marata pombai da mawaika tau ntaninya nunjaa anu naporeʼe, tau setu sangaya-ngaya da mawianaka inceʼe ri kabuya ndayanya anu sintinaja. Tau anu marata pombai da mombawanaka, tau setu sangaya-ngaya da mombawanaka kojo. Tau anu marata pombai da mampatongawa kapuru ndaya ri tau ntaninya, tau setu da mawianaka ri wongko ndayanya.
9Potowemo ri kabuya ndayamu. Pobanciikamo waʼa anu majaʼa, pai potowemo nunjaa anu madago. 10Mbolimo komi waʼa ngkasangkompo da mombepotowe sambaʼa pai sambaʼa ri kalauka ndaya da ewa tau sangkompo, pai da mombetubunaka. 11Ndipakadoyo motetala, neʼe malose. Ri pamponinika Inosa mPue Ala ndipotetalaka tetala i mPue. 12Da ri gori ngkamonconya ndipampomata-mata i Pue, ri kamanondo ri tongo-tongo ngkapari pai todo ri pekakai. 13Nditulungi da naka reʼe naka tuwuka waʼa ntau meaya ri Pue Ala pai da mabuya rayami mampolinggona tau seʼe ri banuami ri kawongko ndayami.
14 #
Mat. 5:44, Luk. 6:28 Ndiperapi ri Pue Ala da naka ndadonco waʼa ntau anu majeani komi. Ndiperapi ndapadonco i mPue Ala tau seʼe, neʼe ndatadeasi. 15Da mawongko rayami ane sangkani-ngkani pai tau anu mawongko-wongko rayanya, pai ndipotumangi sangkani-ngkani pai tau anu motumangi. 16#Pat. 3:7 Ndikatuwumo da mombepotowe sambaʼa pai sambaʼa, neʼe mapeni raya, komi da mosintuwu ri kalauka ndaya, ndipasiwia pai tau anu lauka neʼe mobangke-bangke, neʼe nditoʼo ri rayami podo komi anu loʼe.
17Ane reʼe tau anu majaʼati komi neʼe ndipesawaki. Ndipowiamo anu nakita ntau madago. 18Da ndipari-pari kojo da naka tongawa katuwumi madago pai tau pura-pura. 19#Paw. 32:35 Ee waʼa ngkasangkompo! Neʼe kojo boi mesawa komi, mbolimo i Pue Ala anu da mahuku. Maka lau ndaʼuki ri Sura Magali, “Yaku da mampesawaki, yaku anu da mangahuku.” 20#Pat. 25:21-22 Paikanya ane iwalimu maoro, pakoni; ane maranganga papanginu. Maka ua powiami ewanceʼe komi madikamo waa apu ri wawo ntanoananya. 21Neʼe boi ndipepombaika koromi da nanangi i majaʼa, paikanya da ndinangimo i majaʼa setu ua powiami anu madago.
Currently Selected:
ROMA 12: LAIPMF
Highlight
Copy
Compare
Share
Want to have your highlights saved across all your devices? Sign up or sign in