MIKA 6
6
Pogilu i mPue mangkono to Isaraeli
6:1-5
1Ndipedongeka nunjaa anu da ndapogiluka i mPue mangkono to Isaraeli. Ndipeokomo, boo Pue, pai ndiparatamo pogilumi! Mbolimo buyu pai pongku ntana mangadonge nunjaa anu da nditoĘĽo.
2Ee waĘĽa buyu, ee waĘĽa mpotunda lino, padongeka pogilu i mPue! Sira reĘĽe kara-karaa pai Isaraeli waĘĽa ntaua pai da mampepalisi powia ntau seĘĽe.
3Ndatoʼo i mPue, “Ee waʼa ntauku, nunjaa anu roo kupowia ri komi? Ri jaya anu ewambeʼi Yaku mampakasusa komi? Ndisono Yaku! 4#Pa. 12:50-51, 4:10-16, Pa. 15:20 Komi roo kukeni mpesuwu ungka ri tana Masiri, pai Kulapa ungka ri pampowatua; Yaku mampokaumo i Musa, i Haruni pai Miria mawawanaka komi. 5#Yos. 3:1–4:19, Pai. 22:2–24:25 Ee waʼa ntau-Ku, da ndiendomo nunjaa anu narencana i Bala mokole nto Moabi kono komi, pai nunjaa anu napesonoka i Bila ana i Beori ri siʼa. Ndiendomo nunjaa anu mewali ri pelinja ri oyo mpokema ri Sitimi pai Giligali. Ane kono ndiendo pura-pura setu, da ndirata ndayamo nunjaa anu roomo kupowia mancorepaka komi.”
Panyomba anu ndatangara i mPue
6:6-16
6Nunjaa anu kamonco-monconya da tapanyombaka ri Pue, Pue Ala ri suruga, ane kita rata manyomba ri Sira? Bara sangaya-ngaya kita da mangkeni japi anu mangurapa anu bereĘĽe posarinya da tapanyombaka mewali panyomba anu ndaĘĽombasi ri Sira? 7Ara da mawongko raya i mPue ane kita mangkenika Sira moncowu-ncowu bimba bara gana-gana lana saitu? Bara sangaya-ngaya kita da mampanyombaka ri Sira anata anu uyue da mewali poncompo waĘĽa ncalaata? 8BareĘĽe! I Pue mantujukamo kita nunjaa anu madago. Anu ndapedandaka ungka ri kita inceĘĽemo da naka mayoa powiata, bareĘĽe bali-bali tuwu ri pombepomawo, pai ri kalauka ndaya kita da tuwu ri kasambaĘĽa-mbaĘĽa pai Pue Ala pueta.
9Maʼai ngkaloʼe kita ane mampokaeka i Pue. Sira meboo ri waʼa ntau ri kota, ndatoʼo, “Pedongeka ee komi anu mompasambaka ri kota! 10Ri banua waʼa ntau anu majaʼa reʼe ndarata aga-aga anu ndarata ungka ri petengosi. Tau seʼe mampake pobanga anu bareʼe monco, inceʼe sangaya anu Kupobanciika. Tau anu mowia ewanceʼe da Kuhuku. 11Wenu painaka bareʼe da kupepalisi powia ntau anu mampake dasi bareʼe monco? 12Waʼa ntau koreʼe ri kotamu mamparini tau kaasi-asi pai komi pura-pura kambamba-mbamba. 13Seʼi-seʼi Yaku montepuʼumo mawombo pai malesaki komi ua waʼa ncalaami. 14Komi da mangkoni paikanya bareʼe da mabosu – ja da maoro mpaliu. Komi da manganteo waʼa aga-aga paikanya bareʼe ndikoto mampakoroka ri kaʼuononya. Pai nunjaa ntano anu ndipakoroka da Kulesaki ri raya mpoʼiwali. 15Komi mangancawu inii paikanya bareʼe ndipota wuanya. Komi da mampowia lana ungka ri wua saitu, paikanya bareʼe da ndileʼo mampake lananya. Komi da mangampaa anggoro paikanya bareʼe da ndiinu. 16#1 Raj. 16:23-28,29-34, 21:25-26 Pura-pura setu da tepewali ua komi malulu powia anu majaʼa i Mokole Omiri pai ananya inceʼemo i Mokole Aha. Komi malulu waʼa mpowia ntau seʼe. Inceʼe painaka Yaku da mangalesaki komi, pai komi da napasinggiri pai napetikodi waʼa banca.”
Currently Selected:
MIKA 6: LAIPMF
Highlight
Share
Compare
Copy
Want to have your highlights saved across all your devices? Sign up or sign in
