MATIU 12
12
Pompeoasi kono eo Umapo
12:1-8
(Mrk. 2:23-28, Luk. 6:1-5)
1 #
Paw. 23:25
Sangkani ri eo Umapo, melempomo i Yesu pai waʼa anaguru-A ri tongo bonde gandu; naepe waʼa anaguru-A maoro komponya, painaka napurusi ntau seʼe wua gandu, nalepa nepa nakoni. 2Pangkita waʼa nto Parisi powia waʼa anaguru-A ewanceʼe, natoʼoka Sira, “Peole, waʼa anaguru-Mu maewamo songka agama, mampowia anu kapali ri eo Umapo.”
3 #
1 Sem. 21:1-6
Mesono i Yesu ndatoʼo, “Bara bareʼepa ndibasa nunjaa anu napowia i Daudi ri tempo ngkaoronya sangkani pai waʼa ntau anu malulu siʼa? 4#Tad. 24:9 Siʼa mesua ri Banua mPue Ala, nakoni ntau seʼe roti anu roomo ndapanyombaka ri Pue Ala. Ntanoka malulu songka agamata, siʼa ewanceʼe seʼe waʼa ntaunya bareʼe maya mangkoni roti setu – podo waʼa ntadu mpanyomba anu maya. 5#Pai. 28:9-10 Bara bareʼepa woʼu ndibasa padika i Musa anu mantoʼo, ri eo Umapo waʼa ntadu mpanyomba anu motetala ri Banua i mPue mangalewa songka kono eo Umapo, paikanya bareʼe ndapakasala? 6Koisa da ndinawa-nawa mpodago anu da Kutoʼo seʼi: seʼi-seʼi ri oyomi reʼe anu meruu pai Banua i mPue. 7#Mat. 9:13, Hos. 6:6 Lau ndaʼuki ri Sura Magali: Kapande ndaya anu Kutunggai, banya pinatuwu anu ndapanyombaka. Ane rapanya ndirata ndaya kojo posoki mpau-Ku seʼi, bareʼe da ndipetisala waʼa ntau anu bareʼe masala. 8Maka i Ana Manusia makuasa ri eo Umapo.”
Tau anu kape palenya sambali
12:9-14
(Mrk. 3:1-6, Luk. 6:6-11)
9Palai i Yesu ungka njairia mesua Sira ri sambaʼa banua mpekakai. 10Njairia njau sambaʼa tau anu kape palenya sambali. Bara tesangkuja tau anu mampepepali kasala i Yesu, meoasi ri Sira “Bara maya mampakaʼosa tau majuʼa ri eo Umapo?”
11 #
Luk. 14:5
Mesono i Yesu ndatoʼo, “Ane rapanya reʼe tau sambaʼa ri oyomi anu mampotumpu bimba podo sambaʼa, pai ri eo Umapo bimba setu manawu ri wayau, bara da napapaliukamo? Bara da napepalika jayanya mancorepaka bimba setu? 12Koisa ndinawa-nawa sangkujamo kasulinya oli bimba setu pai naka tau? Ane ewanceʼe maya mantulungi tau ri eo Umapo.” 13Nepa Ndatoʼoka tau anu kape palenya sambali setu, “Laenakamo palemu!”
Nalaenaka kojo palenya naepe marosomo ewa palenya anu sambali. 14Malaimo waʼa nto Parisi ungka ri banua mpekakai setu, mogombo da mampepate i Yesu.
Suro anu ndapilisi i mPue Ala
12:15-21
15Ndaincani i Yesu kajaʼa ntinako ndaya waʼa nto Parisi ri Sira. Inceʼe pai naka malai Sira ungka njairia pai maria tau anu melulu ri Sira. Waʼa ntau anu majuʼa anu melulu ri Sira ndapakaʼosa pura-pura. 16Paikanya ndapetangani i Yesu waʼa ntau setu mampobambarika toʼo-A ri tau ntaninya. 17Pewalinya ewanceʼe kobanganimo nunjaa anu ndatoʼo i mPue Ala mampoliu i Nabi Yesaya,
18 #
Yes. 42:1-4
“Inceʼimo suro-Ku anu Kupilisi,
siʼa ogu ndaya-Ku anu Kupotowe
Inosa-Ku Kuwai ri siʼa
pai siʼa da mampetumbuka waʼa nto polamoa pepokono-Ku.
19Siʼa bareʼe da mopaiso bara da meboo-boo
bara da mopidato ri jaya bangke.
20Woyo anu mabetu bareʼe da Ndapuʼa mpaliu,
silo anu ntongo morangasu bareʼe da Ndapepate mpaliu,
rantani mokaamo penanginya ri suara ntopobotusi;
21Pura-pura lemba mampomata-mata Sira.”
I Yesu pai i Belesebu
12:22-32
(Mrk. 3:20-30, Luk. 11:14-23)
22Ungka lairia, nakenimo ntau ri Sira, sambaʼa tau anu napesuaki inosa majaʼa, tau setu buta seʼi bobo. Ndapakaʼosa i Yesu tau setu, painaka naincanimo mompau pai yosamo matanya. 23Jingki raya ntau pura-pura mangkita anu mewali setu natoʼo, “Baraja Siramo seʼi Ana i Daudi anu ndajanji setu?”
24 #
Mat. 9:34, 10:25 Padonge into Parisi pompau ntau sondo ewanceʼe, natoʼo, “Pai napangkoto ntau seʼi marumba inosa i majaʼa, ua i Belesebu tadulako i majaʼa setu mawaikamo siʼa kuasa.”
25Ndaincani i Yesu nawa-nawa nto Parisi anu ewanceʼe pai ndapantoʼo, “Ane reʼe sambaʼa negara tebureka, pai sadompu-sadompu, seʼe mombeewa, negara setu bareʼe da tumotoa, ewanceʼe seʼe ane reʼe lipu bara banua anu taunya bareʼe simadago, sangaya-ngaya da magero. 26Ewanceʼe seʼe ri raya mpoparenta i Majaʼa; ane santibura marumba tibura anu ntaninya, manoto poparenta i Majaʼa setu da teburekamo pai da magero. 27Yaku nditoʼo marumba inosa majaʼa ua kuasa i Belesebu, ane ewanceʼe, pai kuasa incema waʼa anagurumi marumba inosa majaʼa. Mewali waʼa anagurumi ngkaliomi anu mampatongawa kakominya sala. 28Paikanya Yaku marumba inosa majaʼa ua Inosa mPue Ala. Pai inceʼemo tandanya i Pue Ala montepuʼumo moparenta ri oyomi.
29Ewambeʼi da napangkoto ntau mampesuaki banua ntau anu maroso da marampa aga-aganya, ane bareʼe napungu riunya tau maroso setu? Roo setu nepa naleʼo marampa aga-aganya.
30 #
Mrk. 9:40
Tau anu bareʼe sambira pai Yaku, kamonconya maewa Yaku. 31Inceʼe painaka Kutoʼoka komi, pura-pura salaa pai pompetikodi inceʼe ndakoto bareʼe ndakitanaka! Paikanya salaa ntau anu mampetikodi Inosa mPue Ala inceʼe sangaya-ngaya da ndapepalisi. 32#Luk. 12:10 Salaa ntau anu mampetikodi i Ana Manusia, inceʼe ndakoto bareʼe ndakitanaka, paikanya salaa ntau anu mampetikodi Inosa mPue Ala inceʼe da ndapepalisi ungka ri lino seʼi nakarataka ri katuwu anu bareʼe da reʼe kapusanya.”
Puʼu ngkaju pai waʼa mbuanya
12:33-37
(Luk. 6:43-45)
33 #
Mat. 7:20, Luk. 6:44 “Wuanya anu madago da napowuaka mpuʼunya anu madago woʼu. Ane puʼunya bareʼe madago wuanya woʼu bareʼe da madago. Kadago pai kabareʼenya puʼunya, da ndaincani ri taʼa mbuanya. 34#Mat. 3:7, 23:33, 15:18, Luk. 3:7, 6:45 Ee komi waʼa ntau majaʼa, ewambeʼi da ndipangkoto mampau anu madago ane komi lawi tau majaʼa, ri rayami buke-buke jaʼa! Maka ewambeʼi kasowanya ri ngujumi ewanceʼe seʼe anu lau ri rayami. 35Tau anu madago da mampasowa pau anu madago woʼu, pau setu moiwo ungka ri raya anu madago. Paikanya tau anu majaʼa kasowa mpaunya, lawi ewanceʼemo anu lau buke-buke ri rayanya.
36Mewali endomo ri Eo Kiama pura-pura tau da mapesonoka waʼa mpaunya anu bareʼe moyowe. 37Maka ri waʼa mpaumu ngkaliomu anu da ndapake mabotusi bara siko masala bara bareʼe.”
Waʼa nto Parisi mamperapi i Yesu mantuju tanda ngkuasa
12:38-42
(Mrk. 8:11-12, Luk. 11:29-32)
38 #
Mat. 16:1, Mrk. 8:11, Luk. 11:16 Ungka lairia reʼe bara tesangkuja guru agama pai waʼa nto Parisi mantoʼoka i Yesu, “Guru, da raya mami mangkita Komi mampowia tanda ngkuasa.”
39 #
Mat. 16:4, Mrk. 8:12 Mesono i Yesu ndatoʼo, “Ara maʼai ngkajaʼasa pai baleparusa waʼa ntau tuwu salapi seʼi, komi merapi da Kutujuka tanda ngkuasa, banya mantoʼo tanda ngkuasa i Nabi Yona. 40#Yon. 1:17 Maka i Yona tatogo ndeme pai tatogo mbengi ri raya ngkompo bau bangke. Da ewanceʼe seʼe i Ana Manusia tatogo ndeme pai tatogo mbengi ri raya ntana. 41#Yon. 3:5 Ri Eo Kiama da mekakore to Niniwe sangkani-ngkani pai tau tuwu salapi seʼi, pai mampetisala tau seʼe. Maka to Niniwe majeamo podo ua napedongeka nuntu anu napetumbu i Nabi Yona. Paikanya ireʼi reʼe anu meruu kabangkenya pai i Nabi Yona! 42#1 Raj. 10:1-10, 2 Taw. 9:1-12 Ri Eo Kiama da mekakore datu weʼa ungka ri Selata, sangkani-ngkani pai tau tuwu salapi seʼi da mampetisala tau seʼe. Maka ua da mampedongeka pompaguru i Salomo anu loʼe, datu weʼa lawa kojo pelinjanya ungka ri tando lino. Paikanya ireʼi reʼe anu meruu kabangkenya ungka ri Salomo.”
Pewalili inosa majaʼa
12:43-45
(Luk. 11:24-26)
43“Ane inosa majaʼa mesuwu ungka ri tau sambaʼa, inosa setu molayo-layo ri waʼa ngkareʼe anu mangau da mampepali kareʼe mpeosa paikanya bareʼe narata. 44Inceʼe pai napantoʼo, ‘Moruana da kumewalili ri banua anu roo kupalaika!’ Kajelanya njairia, narata banua setu soa-soa, roo ndasaewe pai timama. 45Roo setu malai siʼa pai napoyunu papitu inosa majaʼa anu meruu ngkajaʼa painaka siʼa. Ungka lairia mesua tau seʼe ri raya ntau setu pai maroo-roo njairia. Pai kapusanya katedikanaka ntau setu meruumo kajaʼanya painaka iʼowi. Inceʼemo woʼu anu da mewali ri waʼa ntau majaʼa ri tempo seʼi.”
Ine pai kasangkompo i Yesu
12:46-50
(Mrk. 3:31-35, Luk. 8:19-21)
46Ntongo mpompau i Yesu ri waʼa ntau sondo setu, jelamo ine-A pai waʼa ngkasangkompo-A. Tau seʼe podo mekakakore ri sambalikunya, da raya ntau seʼe mompau pai Sira. 47Sambaʼa ri oyo ntau sondo setu njoʼu mantoʼoka Sira, “Guru, njau ine-Mi pai waʼa ngkasangkompo-Mi anu tuama ri sambalikunya. Da raya ntau seʼe mompau pai Komi.”
48Mesono i Yesu ndatoʼoka tau setu, “Isema ine-Ku? Isema waʼa ngkasangkompo-Ku?” 49Ndatuju i Yesu waʼa anaguru-A, nepa ndatoʼo, “Peole, tau seʼemo ine-Ku pai kasangkompo-Ku anu tuama! 50Maka tau anu mawianaka pepokono mPapa-Ku ri suruga inceʼemo kasangkompo-Ku tuama, kasangkompo-Ku anu weʼa pai ine-Ku.”
Currently Selected:
MATIU 12: LAIPMF
Highlight
Share
Compare
Copy
Want to have your highlights saved across all your devices? Sign up or sign in
