DANIELI 6
6
I Danieli ndatendeka ri wayau ncinga
6:1-29
1Ri karoonya ndapepate i Belisasari, i Dariusi to Media mampotundasi gadera mpoparenta. Sindara setu tinuwunya onompuyu pai radua ntaʼu. 2I Dariusi mantila-ntila kamokolenya mewali saatu ruampuyu poropenci anu naparenta sambaʼa petoro. 3I Danieli pai yununya radua ndalanti da mangaole-oleka potetala waʼa petoro setu da naka neʼe napakarugi ntau seʼe i datu. 4Bareʼe masae tongawamo potetala i Danieli anu meruu ngkadago painaka potetala waʼa petoro pai yununya anu radua setu. Inceʼe painaka da raya i datu mangalanti siʼa mewali anu makuasa ri samalele mpoparentanya. 5Paikanya waʼa petoro pai waʼa yunu i Danieli, mampari-mpari mampepali boi reʼe waʼa ngkasala i Danieli ri pawianakanya tetala mpoparentanya, paikanya bereʼe narata ntau seʼe, maka i Danieli todo pai mayoa rayanya pai bareʼe mampesaru-saru tetala bara mawianaka kasala nunjaa ntano. 6Inceʼe painaka natoʼo ntau seʼe, “Nepa da tarata kasala i Danieli, sangadi ri jaya anu mokenta pai poʼagamanya.”
7Ungka lairia njoʼumo tau seʼe sangkani-ngkani mancuara i datu nepa natoʼo ntau seʼe, “Boo pueku Datu Dariusi, marate tinuwumi rantani masae-sae! 8Kami pura-pura anu mampasilolongani kamokolemi, madago waʼa ntopoparesa, waʼa petoro, waʼa sarungkoro petoro pai waʼa mpegawai ntaninya, roomo mogombo mamposintuwuimo da naka komi pue mami da mampapesuwu sura parenta anu sangaya-ngaya da nawianaka ntau ri gori ngkamonconya mbolimo komi pueku da mampesongkaka da naka ri raya anu togompuyu ndeme bareʼe maya mau sambaʼa tau anu da mamparata perapinya ri sambaʼa lamoa bara ri sambaʼa tau, podo maya da merapi ri komi pueku. Bara isema anu mancapu songka seʼi sangaya-ngaya da ndatendeka ri wayau ncinga. 9Kaperapi da naka komi pueku madika bate mpale ri sura parenta setu da naka mewali sambaʼa padika Media pai Parasia anu bareʼe maya ndawalisaka.” 10Inceʼe painaka nadika i Datu Dariusi bate mpalenya ri sura parenta setu. 11Butu nadonge i Danieli sura parenta setu, mewalilimo siʼa ri banuanya. Lincunya anu reʼe ri wawonya, reʼe bara tesangkuja tukenya anu moara tondo ri Yerusale. Pai ewa anu napobiasamo siʼa mekakai ri Pue Ala puenya pai maunde-unde Sira tatogo ngkani ri raya anu sandeme, pai siʼa mombukotu ri suara waʼa ntuke anu teloka-loka setu.
12Butu nakita waʼa iwali i Danieli, kanjau i Danieli ntongo mekakai ri Pue Ala puenya, 13njoʼumo tau seʼe mancuara i datu mampogiluka i Danieli. Natoʼo ntau seʼe, “Ara banya pueku roomo madika bate mpale ri sura parenta anu mapetangani tau pura-pura ri raya anu togo mpuyu ndeme da mamparata perapi ri sambaʼa lamoa bara ri sambaʼa tau, pai podo maya da merapi ri komi? Pai teʼuki woʼu, bara isema anu malewa songka setu da ndatendeka ri raya wayau ncinga?”
Mesono i datu ndatoʼo, “Monco kojo pai parenta setu mewali padika Media pai Parasia anu bareʼe maya da ndawalisaka.”
14Nepa natoʼo ntau seʼe ri datu, “i Danieli, sambaʼa tau anu ndatawani ungka ri tana Yahuda, bareʼe mampedongeka komi pueku, mampesaru-saru parenta mpueku. Siʼa mekakai bareʼe bali-bali tatogo ngkani ri raya anu sandeme.”
15Madonge inceʼe masusa raya i datu pai ipu rayanya, painaka napepali jaya da mancorepaka i Danieli. Nakarataka ngkinowia i datu ntongo monawa-nawa. 16Ungka lairia, waʼa ntau setu mewalili woʼu mancuara i datu, pai natoʼo ntau seʼe, “Neʼe ndikalingani pueku, maka malulu padika Media pai Parasia, parenta anu ndapapesuwumo i datu bareʼe maya ndabalisaka.”
17Inceʼe painaka bereʼe jaya ntaninya, kapusanya nasongkamo i datu tau da naka mancoko i Danieli nepa ndatendeka siʼa ri raya mbayau ncinga. Natoʼo i datu i Danieli, “Tuarapa i Pue Ala puemu anu todo nupanyomba setu da mancorepaka siko.” 18Roo setu sambaʼa watu bangke ndapaloka wobo mbayau setu, nepa nadika i datu tanda ngkamokolenya ri watu setu pai tanda waʼa ntau bangke setu, painaka bereʼe mau sambaʼa tau anu mangkoto da malapa i Danieli ungka ri wayau ncinga setu. 19Roo setu mewalilimo i datu ri langkanae. Bareʼe napokono mangkoni bara ndapalindo. Pai sambengi setu bareʼe naleʼo yore.
20Mosureme membangumo i datu, pai ganggara njoʼu sira ri kareʼe wayau ncinga. 21Karatanya njairia, meboo sira ri oni ngangaa tongawa kaipu-ipu ndayaa, ndatoʼo, “Danieli, watua i mPue Ala anu tuwu! Bara nakoto mPue Ala puemu anu todo nupanyomba setu mancorepaka siko ungka ri waʼa ncinga setu?”
22Nepa nadonge oni nganga i Danieli mesono natoʼo, “Tuwu komi pueku rantani masae-sae! 23Pue Ala pueku mampokaumo malaʼekaa mangadampo nganga waʼa ncinga setu painaka bareʼe nakuja-kuja ntau seʼe yaku. I Pue Ala mancorepaka yaku maka ndaincani yaku bareʼe masala ri Sira pai ri komi pueku.”
24Maʼai kojo kawongko ndaya i datu painaka nasongka tau da mampapesuwu i Danieli ungka ri wayau ncinga setu. Ri karoonya nawianaka ntau seʼe songka setu, tongawa bareʼe ndarata mau sakodi wela ri koro i Danieli, maka siʼa mepoʼinaya ri Pue Ala puenya. 25Inceʼe painaka nasongka i datu tau mangancoko waʼa ntau anu mampogiluka i Danieli. Tau seʼe sangkani pai waʼa ananya pai waʼa rongonya ndatendeka ri raya mbayau ncinga setu. Bareʼepa tudu tau seʼe ri oru mbayau, naposempaimo waʼa ncinga, narutesi pai waʼa mbuku ntau seʼe.
26Roo setu i Datu Dariusi mampakatu sura rata ri waʼa ntau mempangaya-ngaya banca, lemba pai basa ri sambawo lino, “Petabea pai karodo ndaya! 27Yaku mampoparentaka ri pura-pura tau anu reʼe ri raya mpoparenta ngkamokoleku da naka maeka pai mantubunaka Pue Ala anu napanyomba i Danieli!
Sira inceʼemo Pue Ala anu tuwu rantani masae-sae,
Sira moparenta rantani pusa lino
poparentaa bareʼe da magero.
Kakuasaa bereʼe da kapusanya.
28Sira mancorepaka pai malapasaka,
mawianaka anu ndapojingki pai tanda ngkuasa
ri yangi ewanceʼe seʼe ri lino.
I Danieli ndasorepakamo,
ungka ri da pangkoni ncinga.”
29Ewanceʼemo i Danieli mampotundasi lanti anu ndateka sangkasae mpoparenta i Dariusi pai poparenta i Koresi, to Parasia setu.
Currently Selected:
DANIELI 6: LAIPMF
Highlight
Share
Compare
Copy
Want to have your highlights saved across all your devices? Sign up or sign in
