DANIELI 10
10
Pepatongawa ri Danieli ri Koro Tigirisi
10:1–11:2a
1Ri taʼu katatogo poparenta i Datu Koresi ri Parasia sangaya patiendo ndapatongawa ri Danieli bara i Belitasari. Patiendo setu monco, paikanya mapari kojo da ndapangarata ndaya. Sindara pompari-mparinya da mangarata ndaya, i Danieli mantarima totoraka kono posoki mpatiendo setu mampoliu sambaʼa pepatongawa.
2Sindara setu yaku ntongo mobaratapa muntu-muntu tatogo minggu. 3Sangkasae setu yaku bareʼe mangkoni pangkoni anu monyami bara wayawo; yaku bareʼe manginu anggoro, pai bareʼe masara wuyuaku.
4Ri rua mpuyu pai aopo eo mbuya kaʼisa taʼu setu, yaku ntongo mekakore ri wingke ngKoro Ue Tigirisi anu bangke setu. 5#Pepat. 1:13-15, 2:18, 19:12 Metingara yaku nepa kukita sambaʼa tau anu morengko lena pai mosoʼo ntongo wuyawa anu malino. 6Koronya mengkido-ngkido ewa paramata, lionya ewa perara sindi ngkila, pai matanya mareka-reka ewa apu. Pale pai witinya makilaya ewa tambaga anu roo ndaasa, pai oni nganganya ndadonge ewa oni nganga ntau sondo.
7Podo yaku ngkalioku anu mangkita pepatongawa setu. Waʼa ntau anu sangkani-ngkani pai yaku bareʼe nakita, paikanya maeka raya ntau seʼe painaka molonco mesambuni. 8Napalaika ntau seʼe jamo yaku ngkalioku njairia, sindara yaku maole-oleka pepatongawa anu mejingkiti setu. Bareʼemo reʼe rosoku pai memisamo lioku. 9Jabutu kudonge oni nganganya, malimpumo yaku pai tedungkalakamo mokepe-kepe ri tana. 10Ungka lairia reʼe pale anu maisu yaku painaka tepembangu yaku meruntubo ri tana tepombukotu.
11Natoʼo malaʼeka setu ri yaku, “Danieli, siko ndapotowe i mPue Ala. Pembangumo pekakore nepa nupedongeka mpodago waʼa mpauku seʼi. Yaku ndapokau maʼi ri siko.” Sindara pompaunya ewanceʼe, mekakoremo yaku kandende-ndende.
12Nepa natoʼoka yaku, “Danieli, neʼe maeka. Ndapedongekamo i mPue Ala pekakaimu montepuʼu ungka ri eo anu kaʼisa nupampakanoto siko da mampakalauka koromu da naka loʼe. Karataku seʼi ewa sono mpekakaimu. 13#Pepat. 12:7 Malaʼeka anu mangkariani kamokole Parasia maewa yaku ri raya anu ruampuyu pai sambaʼa eo. Nepa maʼi i Mikaeli, siʼa sambaʼa tadulako ri oyo waʼa ntadulako malaʼeka, mampelae yaku. Siʼa ndate kupalaika ri Parasia. 14Yaku rata da mawaika siko parata ndaya kono nunjaa anu da mewali raneonya ri bancamu. Pepatongawa seʼi kono reme anu nepa da rata.”
15Ri pangantoʼonya inceʼe setu, metutu yaku bareʼe kukoto mompau. 16Ungka lairia malaʼeka anu ewa taʼa ntolino setu malaenaka palenya nepa naisu wiwiku. Mompau yaku ri siʼa kutoʼo, “Pue, pepatongawa seʼi mampaka pari rayaku painaka bereʼe liu-liu rosoku. 17Yaku jamo ewa sambaʼa watua anu mekakore ri suara mpuenya. Ewambeʼi da kupangkoto mompau ri komi? Puramo rosoku pai sodo poʼinosaku.”
18Inceʼe painaka naisu woʼu yaku, nepa kuepe terangani rosoku. 19Natoʼo, “I Pue Ala mampokapuru siko, inceʼe painaka neʼe malelu rayamu pai maeka, io pakaroso rayamu!”
Sindara pompaunya ewanceʼe, kuepe terangani woʼu rosoku pai kumompau kutoʼo, “Ndipompaumo Tua, Komi mangaranganimo rosoku.”
20-21Nepa mesono siʼa natoʼo, “Bara nuincanimo nunjaa puʼunya painaka yaku maʼi madadu siko? Tinako ndayaa inceʼemo da mangantoʼoka siko nunjaa anu teʼuki ri raya Ncura ngKamonco. Seʼi-seʼi yaku sangaya-ngaya da mewalili moʼiwali mangaewa malaʼeka anu mangkariani Parasia. Roo setu malaʼeka anu mangkariani Yunani da rata. Bereʼe anu da mampelae yaku waʼanyamo podo i Mikaeli, malaʼeka anu mangkariani Isaraeli, negaramu.
Currently Selected:
DANIELI 10: LAIPMF
Highlight
Share
Compare
Copy
Want to have your highlights saved across all your devices? Sign up or sign in
