Rm. 9
9
Pamiliat Taikamanua ka bangsa Israel
1Bulat sibulatnia le kutitiboi ka bagat Kristus, ta kubobokoi. Bagai bagaku leu masimunengake ka bagat Ketsat Sipunenan, 2kopenia reureu bagaku, samba taipuaarinia oringen paatuatku. 3Pat obakungan tutelei aku samba tuareu ka Kristus kalulut sasarainangku, sabangsaku ka puakkulakat. 4#2Mos. 4:22 Tai Israel le poi sia, sibailiuakenen bailiu toga, samba arasiloan pulatsanan samba palelengan, samba Surukat, puaranan samba sibala. 5Punuteteura taikebbukatta le sia, ka sia le kabraiat Kristus siripot pusirimanuaat. Sisaliu sangamberinia le nia. Tuumunake le Taikamanua teret buruburu! Amen.
6Tapoi tiboiet Taikamanua ta musisiboboi. Aipoi ta sangamberi tai Israel oniakenen Israel, 7#1Mos. 21:12 samba ta sangamberi punuteteu Abrahama addeakenen togat Abraham, tapoi: “Sibara kai Isak le oniakenen punuteteunu.” 8Katukolobatnia: Ta tatoga siripot akkula oniakenen tatogat Taikamanua, tapoi tatogat palelengan le oniakenen punuteteu sipulelelek. 9#1Mos. 18:10 Aipoi kise le tiboiet palelengan: “Ka tetere kele nene momoi aku minca, samba aian kai Sara sara toga simanteu.”
10Ta sarat nenda, tapoi si Rebeka leu sibara ka sara sirimanua le aipusuruket, ia te si Isak taikebbukatta. 11#1Mos. 25:23 Aipoi enan tapei amututu matada tatoga nenda samba tapei aragalai simaeru ele sikatai, – bule ituronake isiat Taikamanua pagalaiat pamiliatnia, ta sipubobongen ka galajet tapoi ka pasogaiatnia le – 12aikua kai Rebeka: “Toga sikebbukat le ibabailiu pagugulet sisule,” 13#Malk. 1:2, 3 kele sitususurat: “Kupununtuki baga si Jakob, kupulagaki baga si Esau?”
14Oto kipangan le takukua? Sitaimaroipo le pa Taikamanua? Ta kisedda! 15#2Mos. 33:19 Aikuangan poi kai Mose: “Kupukakateki baga kasei siobaku kupukateki baga, samba kupukikilibi baga siobaku kupikilibi baga.” 16Oto pagalaiat nene ta sibara ka teu bagat sirimanua ele sigalai sirimanua, tapoi ka kiliu bagat Taikamanua le. 17#2Mos. 9:16 Aipoi aikua Surat Sipunenan kai Parao: “Ia te lulunia akurioake ekeu, bule kupatoila gegeku ka tubum, samba bule itupaarep oningku ka sangalio polak.” 18Oto ipukateki le baga siobania ipukateki samba ikelaake paatuatda kasei siobania ikelaake paatuat.
Golut Taikamanua samba erut bagania
19Kineneiget nukukuangan te kam ka mataku, “Ke kise bai nia, apangan le lulunia iseseleake sirimanua Taikamanua? Kasei poi momoi masisakkala teu bagania?” 20#Jes. 29:16, 45:9 Kasei te ekeu ale sirimanua nooba masisiddot Taikamanua? Momoi pa ikua sigalai ka sipasigagalai nia, “Kise kodda anugalai aku?” 21Ta pa anai geget tukang pario ka polak ottot masigalai ka sangatatappania nenda masibailiuake nia sara bibilet simalainge samba sara simagulai lainge?
22Kise leu te Taikamanua. Ioba masipatoila golunia samba masipaagai ronnia, tapoi aiomake le bagania simakope ka tubuda pugolukietnia, sinarekngakenen kaunen ka pulangokat; 23samba ioba leu ipatoila kayot pulatsanannia ka tubuda pukatekietnia baga sinarekngakenen kaunen ka pulatsanan, 24ia te sita, sinogainia, ta sarat bangsa Jahudi, tapoi sibara ka bangsa bagei leu, 25#Hos. 2:23 kele sikuania ka bukot nabi Hosea:
“Sia ta bangsaku kuooniake bangsaku,
samba taikikilibet bagaku, kuoniake kilibet bagaku,”
26 #
Hos. 1:10
samba ka kudduat sikuania ka matada:
“Ta bangsaku kam,”
sedda ikua ka matada: “Tatogat Taikamanua sipuririmanua.”
27 #
Jes. 10:22, 23 Si Jesaya leu amusoga pagalaiat tai Israel: “Kenanen kele ngai ka koat igida bangsa Israel, sarat goiso muririmanua. 28Aipoi maruei le ienungake ukuman simaroipo ka polak nene si Tuhan.” 29#Jes. 1:9 Samba kele sikuat Jesaya siboiki: “Ke bai ta ilegeiake si Tuhan Sebaot punuteteuta, aibailiuan sita kele Sodom samba kele Gomora.”
Puaragatda sabangsa bagei samba kapepeatda tai Israel
30Oto apangan le kuanenta? Nene le: Sia sabangsa bagei sitaikukuruake puroipoat, arasesengan puroipoat, ia te puroipoat kalulut tonem baga. 31Tai Israel geti kenanen rakukuru surukat puroipoat, ta asege sia ka puroipoat. 32Apa lulu? Ta poi kalulut tonem baga rakukuru nia, kalulut galajetda le, tusoksokrangan tebai ka bukku katusoksongan, 33#Jes. 28:16 kele sitususurat:
“Bulatnia kugalakngake ka Sion
sara bukku tuluiet samba sara bukku katusoksongan,
samba kasei sikatonemi nia, ta tupakakaila.”
Currently Selected:
Rm. 9: MWV
Highlight
Share
Copy
Want to have your highlights saved across all your devices? Sign up or sign in
@LAI 2015
