Nah. 2

Kabebele' Niniwe

1Ale tai Niniwe, arepmake' kam!

Amoian te sia sioba' masipakatai laggaimui

pujago kam ka irip laggai pasiddonanmui

Pasikeli kam enungan!

Patarek kam tubumui pasaggak!

2Bulatnia, itotoiliake' le' geti pubebeunan Israel si Tuhan, bule' ibailiu kele' siboiki, kepei raraurau sia tai saggakra.

3Korabbi'ra tai saggak simabonan,

samba leppeira tai saladru, kele' logau.

Amatarekngan tai saggak palaba'

Kele'an le' bila', labat keretadra ipukirisau

Sangamberi kuro'ra sapaattat.

4Ka enungan, mariuriu le iputuitui kereta,

pakukru le sia ka gerat laggai;

tuitco'nia kele tutungan sipujujulu,

kele'an le bila nangka'nia rapakukru.

5Sautet saladdu rasogai raei pasaggak,

tusosokrangan kateteret raei pasaggak

rapaolaake' raailiake' irip laggai,

rario'ake' pasisikklutdra simaruei.

6Atubuka'an Matatbaliu ka sangamberi bagat oinan

iageti sangalio lalep purimataat magaugaunangan.

7Tueddetnangan rimata sinanalep ralabania,

mukatci samba mugeri sapaguguletnia,

puhoihoirangan kele' uma' ngorut,

samba kalulut reureu baga ru'rukatdra rapabo'boki.

8Pusaburangan tai Niniwe

kele oinan paok ibela ka sinabangan.

Ai sipasisogaake', “Puari, puari!”

tapoi ta'anai sioba' toili.

9Parauraugi kam sangamberi mas samba peraknia!

Amusukkrangan pukayoat ka laggai nene.

10Amakataian te Niniwe, matangeuan samba amagarakngan!

Aipulouan sipulaggai sedda kalulut loto.

Boklodra ibailiu masaggo samba mugeret.

Pumataatdra bailiu mamusi.

11Kaipangan laggai nenda kineneiget?

Laggai siburu' addeakenen ngaliu kudduat purumunan singa.

Kudduat sangamberi togat singa itupakom.

Kudduat ailiakenen singa simanteu samba sinanalep,

kudduat simasanang ka sangamberi togania.

12Siburu' sedda itarakup komennia singa

samba pabiritnangannia, kaunennia ka sinanalep samba ka tatogania.

Tim le ka rumunnia akkula sibirinan sibara ka sikukrunia.

13“Aku nene saggakmui,” ngangan Tuhan Sipulugege. Sangamberi keretamui geti sapru Kulabo'nia. Matei te geti saladrumui ka pasaggangan, samba Kuala le geti sangamberi sirauraumui ka sirimanua sabagei. Sangamberi Tiddogetdra sapakoinienmui ta'an maarep minca.

Currently Selected:

Nah. 2: MWV

Highlight

Copy

Compare