Mrk. 5
5
Ialeake pinasaileu sanitu Jesus
(Mat. 8:28-34; Luk. 8:26-39)
1Ia geti sege sia ka silat koat Galilea, ka laggaira tai Gerasa. 2Sakaina le Jesus barania ka abak, paseseakenangan nia sara pinasaileu sanitu sibara ka ratei. 3Sirimanua nene ka ratei le ikukuddu, samba ta anai kasei pa siooi masikabe nia kenanen palenggui. 4Mareireian rakabe samba rapalenggui nia, tapoi itatakkiake samba iraragatnake le palenggui. Beri sara siooi masiukkaake nia. 5Sinago sinoibo, ka ratei samba ka leleu le ipugegejek, mugerei samba iboboake bukku ka tubunia.
6Kele aiitco Jesus ka sareunan, pabalaunangan itagetnake nia, rappo nia ka matania, 7pugereinangan sabeu nganga, “Apa nuaala se, Jesus Togat Taikamanua Sipulubeunan? Ka onin Taikamanua kutiddou ka tubum, bui nubesiki aku!” 8Lulunia aikua nene, aikua poi Jesus ka matania, “Ketsat sanitu, belaake ekeu ka sirimanua nene!”
9Lepa nounounangan nia Jesus, “Kasei onim?”
Aleginangan nia, “Oningku ‘Legion’ – maigi poi kai!” 10Ia geti tiddourangan simakope bui iusiake sia Jesus ka laggaira nenda.
11Ka legeret kudduat nenda ai sangamata sakkoilo sipukokom ka gilak leleu. 12Tiddourangan ka Jesus kuarangan, “Obaake kuei kai kusopsopmake kai tubumai ka sakkoilo.” 13Obaakenangan sia Jesus. Belarangan leu sanitu ka tubut sirimanua nenda ei sia ka bagat sakkoilo. Ribbaiakerangan tubuda sakkoilo sisangamata nenda – ai pa rua ribu ngamuneng – barania ka tikkara teipu bujuu ka koat, louloulou.
14Tui sia sipasijajago sakkoilo, ei sia masisegeake sibabara nene ka laggai samba ka sikuddu ka desa. Belarangan sangamberida masiitco sibabara. 15Oi sia ka Jesus, itcorangan sirimanua pinasaileu sanitu sisangalegion nenda, aian nia mututukku, amuleppeian nia, aiagaian simaeru. Malotorangan sangamberida. 16Sia sipasiitco sibabara nene masinunuake ka matada sirimanua pagalaiat sibabara ka pinasaileu sanitu samba ka sakkoilo nenda. 17Tiddourangan leu bule ikaddiuake laggaira Jesus.
18Kele aitujanang Jesus ka abak, tiddounangan pinasaileu sanitu bule itut nia.
19Tapoi ta aiobaake nia Jesus. Kuana le ka matania, “Toiliakean ekeu ka saeppum, segeake ka matada beunan sigalai Tuhan ka tubum samba katet bagania ka tubum.”
20Ia geti ei nia ka sangalio laggai Dekapolis masipaarep sangamberi sigalai Jesus ka tubunia. Makiseinangan ka bagada sangamberi sipasiaarep.
Togat Jairus sinanalep samba sinanalep sipasirarape leppei Jesus
(Mat. 9:18-26; Luk. 8:40-56)
21Kele aiputalipo minca Jesus ka sila, marururangan sirimanua simigi ka matania ka bebet koat. 22Ia geti oi sara utet uma parurukat sikuddu sedda sipuoni si Jairus. Kele aiitco Jesus pabalaunangan murappo ka reret Jesus, 23tiddounangan simakope, “Mamateian le togaku sinanalep. Konan pei nurapeake kabeinu ka tubunia, bule imale togaku, ipurimanua!”
24Einangan leu Jesus ipaalei nia. Makope igida sirimanua situt nia, pat okkiprangan nia.
25Sedda ai leu sara sinanalep simabesi pujojaet pulu rua ngarurangan ujunia. 26Kenanen amaigingan tai kerei amasilaggek nia, samba aisappuruakean sangamberi sibabara ka tubunia, tapoi siboboi le, memei itutuppai le besinia. 27Kele aiarep pagalaiat Jesus, ei nia ka talagat sirimanua simigi ka teitei Jesus masirape leppeinia. 28Paatuatnia poi, “Kurape le leppeinia, mamalengan aku.”
29Rapena le leppei Jesus, ari pujojaetnia, againangan tubunia amalengan nia ka besinia. 30Againangan leu tubunia Jesus kabebelat kerek ka tubunia. Pitsangan ka teitei ka talagat sirimanua simigi kuanangan, “Kasei airape leppeiku?”
31Kuarangan sipasiuluinia, “Anuitcoan raokkip ekeu sirimanua; nukukua pei le kasei airape aku?”
32Kinerenangan sia pat salu iitco kasei sigalaiake nia. 33Aiagaian poi sinanalep sibabara ka tubunia, ei nia aimugegeret tubunia lotonia, purapponangan ka reret Jesus tiboinangan sangamberinia sipulelek. 34Kuanangan Jesus ka matat sinanalep, “Rogai, aiarauakean ekeu tonem bagam. Kenanan ka angkat baga, samba kau imale besinu!”
35Ai pei le ikukua nene Jesus, oi sia sibara ka lalep Jairus masikua ka matat Jairus, “Atataan togam, apanannu pei le nugegejaake bagat Guru!”
36Ta aipuuku Jesus sikuada, kuanangan ka matat Jairus, “Ba maloloto, tonemake le bagam!” 37Ta aiobaake Jesus ratut nia sabagei, sarat si Petrus le, si Jakobus samba si Johannes, sarainan Jakobus. 38Sege sia ka lalep utet uma parurukat, itconangan Jesus sedda sipulalamau, sipusosou samba sipugegeri gau lepa. 39Guru Jesus kuanangan ka matada, “Angoi mulamau kam samba mugeri? Ta amatei toga nene, ai le nia memerep.”
40Tapoi aragagati le nia. Kekelenangan sia sangamberida rabela. Ambitnangan ukkui samba inan toga samba telu sipasiuluinia, guru sia ka kudduat toga.
41Alanangan kabei toga Jesus kuanangan, “Talita kum,” tibonannia, “Rogai, kukua ka matam suruake ekeu!”
42Tusurunangan leu et toga, puenungnangan, pulu rua ngarurangan poi beunannia. Kisei lepa ka bagada sia sikuddu sedda. 43Tapoi ipaneinei le sia simakope Jesus bui raagai nia kasei pa. Lepa kuanangan rakau kannia.
Currently Selected:
Mrk. 5: MWV
Highlight
Copy
Compare
Share
Want to have your highlights saved across all your devices? Sign up or sign in
@LAI 2015
