Mrk. 3
3
Ialeake Jesus simasakit kabei sangasila ka gogoi Sabat
(Mat. 12:9-14; Luk. 6:6-11)
1Pasat nene ei minca Jesus ka uma parurukat. Sedda ai sara sirimanua simasakit kabei sangasila. 2Ia geti ngenaakerangan tubuda, baleu ialeake nia ka gogoi Sabat, bule ioi rajoake nia. 3Kuanangan Jesus ka matat simasakit kabei sangasila, “Rioake ekeu ka talaga.” 4Nounounangan sia sangamberida, “Apa simateu tugalai ka gogoi Sabat, masigalai simaeru, ele masigalai sikatai? Masirimanuaake sirimanua, ele masimateiake sirimanua?” Tenan le sia meng. 5Kinerenangan sia sangamberida golut bagania, tapoi mareureu leu bagania ka tubuda lulut kelat paatuatda. Lepa kuanangan ka sirimanua simasakit kabei, “Totoiake kabeinu!” Totoiakenangan nia, malenangan kabeinia. 6Ia geti bela sia tai Parise, eirangan leu mukere baga ka sipasitutut si Herodes, masigaba enungan masimateiake Jesus.
Ialeake maigi sirimanua Jesus ka bebet koat
7Lepa ei Jesus sambada sipasiuluinia ka koat Galilea. Maigi sirimanua sibara ka Galilea masitut nia. Sibara ka Judea leu, 8sibara ka Jerusalem, sibara ka Idumea, sibara ka silat Jordan, samba ka laggaira tai Tirus samba Sidon maigi sia amoi masitagetnake Jesus, araarep poi sigalainia. 9#Mrk. 4:1; Luk. 5:1-3 Kopet igida sirimanua, koiniakenangan sipasiuluinia Jesus ratarekngake ka sia sara abak, bui raokkip nia. 10Maigingan poi simabesi aialeake, kineneiget sangamberida simabesi masiokkip nia rabesiake masirape nia. 11Samba sirimanua pinasaileu sanitu, itco raitco nia, purapporangan ka matania samba mugerei, “Togat Taikamanua le ekeu!”
12Tapoi ikera le sia simakope Jesus bui rakua kasei nia.
Ipili Jesus pulurua tai apostel
(Mat. 10:1-4; Luk. 6:12-16)
13Ia geti panataranangan Jesus ka leleu. Sogainangan ka bebenia sirimanua siobania, oi sia ka tubunia. 14Pilinangan sia pulurua, bule rapaalei nia samba ikoiniake sia masipaarep Katuareman Simaeru, 15samba ikau ka sia gege masiusiake sanitu.
16Oninda sipulura sipilinia ia te: Simon (sioniakenen Jesus Petrus), 17Jakobus togat Sebedeus samba sarainania Johanes (ruada nene ioniake sia Jesus Boanerges tibonannia “togat leleggu”), 18ia geti Andreas, Pilipus, Bartolomeus, Mateus, Tomas, Jakobus togat Alpeus, Tadeus, Simon tai Kana 19samba Judas Iskariot sipajo Jesus.
Jesus samba Beelsebul
(Mat. 12:22-32; Luk. 11:14-23, 12:10)
20Lepa toili Jesus ka lalep. Parururangan minca sirimanua, pat taioinangan rapukom. 21Kele araarep nia saeppunia, ei sia masiala nia, arakua poi sirimanua airoroan nia.
22 #
Mat. 9:34, 10:25 Kuarangan siagaisurat siooi sibara ka Jerusalem, “Aipasaileuan nia si Beelsebul. Utera sanitu le amasikau gege ka sia masiusiake sanitu.”
23Sogainangan sia Jesus, kuanangan ka matada ka bagat pasikat, “Kipa te iooi sanitu masiusiake sanitu? 24Ke paaggara bai purimataat pasasambada, ta matotom purimataat nenda. 25Samba ke paaggara bai sangalalep pasasambada, ta matotom pulalalepda. 26Kisedda leu te ke paaggara samba pasaggak bai purimataat sanitu pasasambada, ta matotom purimataatnia, masusubu le, tangeu.
27Beri sara siooi masiguruki lalep sirimanua simagege masiraurau bibiletnia ke ta ikabe boiki simagege nenda, ia pei oi iparauragi bibiletnia.
28Kukua nia ka matamui: Sangamberi jot sirimanua samba paloloiatda momoi tuappeake. 29#Luk. 12:10 Tapoi kasei masipaloloi Ketsat Sipunenan, ta tuaappeake nia teret buruburu. Aipoi jo sitaitatata le aigalaiake.” 30Aikua nene Jesus, lulut kukuada aipasaileu nia sanitu.
Ina samba sasarainan Jesus
(Mat. 12:46-50; Luk. 8:19-21)
31Lepa oi inan Jesus samba sasarainania. Rio sia ka gerat, koiniakerangan sipasisosogai nia. 32Sirimanua simigi ai sia mukukuddu masigoilik nia. Kuarangan ka matania, “Ai inam samba sasarainam, ai sia ka gerat airangengena ekeu.”
33Aleginangan nia Jesus, “Kasei inangku samba kasei sasarainangku?” 34Kinerenangan sirimanua sigoilik nia kuanangan, “Itco kam, koi ne inangku samba sasarainangku! 35Kasei poi sigalai siobat Taikamanua, nia te sarainangku, maniuku samba inangku.”
Currently Selected:
Mrk. 3: MWV
Highlight
Copy
Compare
Share
Want to have your highlights saved across all your devices? Sign up or sign in
@LAI 2015
