Mrk. 1
1
Ngantoman Johannes Sipasirarau
(Mat. 3:1-12; Luk. 3:1-18; Joh. 1:19-28)
1Ia te nene panandaat Katuareman Simaeru pagalaiat Jesus Kristus, Togat Taikamanua. 2#Malk. 3:1 Kele sinuratnakenen nabi Jesaya,
“ ‘Koi ne pakoinietku,’ ngangan Taikamanua;
‘kukoiniake nia muboiki kekeu, masipapa enungannu.’ ”
3 #
Jes. 40:3
Ai nganga sipusosoga ka simatangeu,
‘Tarekngake kam enungan Tuhan;
roipoake kam pusilaiatnia.’ ”
4Kisedda te aioi si Johannes Sipasirarau ka simatangeu masingantomanake pasiraukat pasibau paatuat, katuappekat jo. 5Oirangan leu sangamberi sipulaggai ka Judea samba tai Jerusalem masitagetnake nia. Seseakerangan joda, raunangan sia si Johannes ka oinan Jordan.
6 #
2Rim. 1:8
Leppei Johannes geti bulut onta le, akkik tengania kulit, sin samba suan mani le komennia. 7Pungantomannangan pele ngangania, “Kurukku momoi te sisaliu pei le biunanku; beri tulukkuk masirugut talit tarangainia ta mateu aku. 8Aku kaku kurau kam oinan le, ka sia geti rauakenennia ka kam Ketsat Sipunenan le.”
Katuraukat Jesus
(Mat. 3:13-17; Luk. 3:21-22)
9Ka teterenia nenda oi Jesus barania ka Natsaret ka Galilea, raunangan nia si Johannes ka oinan Jordan. 10Sakaina le barania ka oinan, itconangan tubuka manua samba Ketsat Taikamanua kele tubut ngorut mei ka tubunia. 11#1Mos. 22:2; Psalm. 2:7; Jes. 42:1; Mat. 3:17, 12:18; Mrk. 9:7; Luk. 3:22 Maarepnangan nganga sibara ka sorga masikua, “Ekeu te Togaku, kilibet bagaku, obaket bagaku te ekeu.”
Katusiboat Jesus
(Mat. 4:1-11; Luk. 4:1-13)
12Lepana le nenda ambitnangan Jesus Ketsat ka simatangeu. 13Pukuddunangan sedda epat pulu ngagogoi, isibo nia Sanitu. Ai nia sedda ka talagat tarimeu simasakbak, tapoi ai samalaika masipuuku nia.
Isogai sipasiuluinia siboiki Jesus
(Mat. 4:12-22; Luk. 4:14-15, 5:1-11)
14Pasat arapenjaraake si Johannes, ei Jesus ka Galilea masipaarep Katuareman Simaeru sibara ka Taikamanua, 15#Mat. 3:2 kuanangan, “Aiailingan teterenia, amalegerengan Purimataat Taikamanua. Bauake kam paatuatmui, samba kau imatonem bagamui ka Katuareman Simaeru!”
16Aimueenung Jesus ka bebet koat Galilea, itconangan si Simon samba sarainania si Andreas ai sia mujajarik ka koat, sipasiiba poi sia. 17Kuanangan ka matada Jesus, “Konan kam tut kam aku, kubailiuake kam sipasijajalo sirimanua.” 18Kaddiuakerangan leu jarikda, tutrangan Jesus.
19Enung nia goiso, itconangan minca si Jakobus samba sarainania si Johannes tatogat Sebedeus, ai sia ka abak, airapeperu jarikda. 20Sogainangan leu et sia Jesus. Kaddiuakerangan leu ukkuira si Sebedeus ka bagat abak samba sirimanua upaiet, tutrangan Jesus.
Sirimanua pinasaileu sanitu
(Luk. 4:31-37)
21Ia geti sege sia ka laggai Kapernaum. Ka gogoi Sabat ei Jesus ka uma parurukat mungantoman. 22#Mat. 7:28, 29 Makiseinangan ka bagada raarep ngantomannia, kele sirimanua sibara gege le poi ipungantoman, ta kele siagaisurat.
23Ka teterenia nenda ai sara sirimanua pinasaileu sanitu ka bagat uma parurukat pugereinangan, 24“Apa nuaala se, Jesus tai Natsaret? Moi ekeu masilangoake kai? Kuagai kasei ekeu: Sipunenan sibara ka Taikamanua le ekeu!”
25Asenangan nia Jesus, “Mengmengake ekeu, belaake ekeu ka tubunia!”
26Pangitngitnangan sirimanua nenda sanitu, pugereinangan, bela nia ka tubunia. 27Makiseinangan ka bagada sangamberi sirimanua, paiserangan leu pasasambada, “Aponia nene? Ngantoman sibau! Magege nia masiusiake ketsat sanitu, ketsat sanitu leu rareddet ngangania!”
28Mararatnangan leu katuareman Jesus ka sangalio laggai Galilea.
Ialeake Jesus maigi sirimanua
(Mat. 8:14-17; Luk. 4:38-41)
29Kele arabela ka uma parurukat, ei Jesus sambada si Jakobus si Johannes ka lalep Simon samba Andreas. 30Talikut Simon sinanalep ai nia ka pereman muroroket. Segena le Jesus ka lalep, segeakerangan ka matania pagalaiat nia. 31Ei Jesus alanangan kabei talikut Simon, suruakenangan nia. Tata roketnia, puukunangan sia.
32Kasoibokat, abelean sulu, taroakerangan ka matat Jesus sangamberi simabesi samba pinasaileu sanitu. 33Sangalaggaiatda nenda ruru ka bebet matatbaliu. 34Aleakenangan maigi siorik sene ngamata besi, samba iusiake maigi sanitu. Ta aiobaake Jesus rapanibo sanitu, raagai poi nia.
Jesus mungantoman ka Galilea
(Luk. 4:42-44)
35Simancep, magepgep pei le, suru Jesus bela nia kal lalep, ei nia ka kudduat simatangeu manindou. 36Kukuruakenangan nia si Simon sambada saaleinia. 37Kele arasese nia kuarangan ka matania, “Sangamberi sirimanua masigaba ekeu.”
38Kuanangan ka matada Jesus, “Sita kam ka laggai bagei simalegere se, bule mungantoman leu aku sedda, ia poi lulunia akuoi.”
39 #
Mat. 4:23, 9:35 Gejenginangan Jesus sangalio Galilea, pungantomannangan ka uma parurukatda samba masiusiake sanitu.
Ialeake Jesus sara simabogbong
(Mat. 8:1-4; Luk. 5:12-16)
40Ia geti oi sara simabogbong ka matat Jesus, purapponangan manindou, pele ngangania, “Noba bai nia, ta isosoppi nualeake aku.”
41Makatenangan bagat Jesus, totoiakenangan kabeinia irape nia, kuanangan ka matania, “Kuoba, kauan numale!” 42Tata itata bogbongnia, malinanangan tubunia. 43Lepa koiniakenangan nia Jesus ituitui, paneineinangan nia simakope, 44#3Mos. 14:1-32 kuanangan ka matania, “Pagaba, bui nupoiliat nia ka kasei pa. Tapoi kenan le nupaitco tubum kai imam; ia geti buluakenungan buluakenen siripot sikuat Mose, masipakoinong ka matada kamamalem.”
45Tapoi ka sia geti kele aituitui paarepnangan nia kaipa kaipa. Bulat maigi aitiboi, pat taioinangan ipuenung Jesus ka laggai ka simatoila. Ka kudduat simatangeuan le aikuddu; tapoi ia leu ne oira masitagetnake nia sibara ka senen laggai.
Currently Selected:
Mrk. 1: MWV
Highlight
Copy
Compare
Share
Want to have your highlights saved across all your devices? Sign up or sign in
@LAI 2015
