Mat. 8
8
Ialeake simabogbong Jesus
(Mrk. 1:40-45; Luk. 5:12-16)
1Kele aitugorosot Jesus barania ka leleu, tutrangan nia sirimanua simigi. 2Ia geti oi sara simabogbong murappo ka matania kuanangan, “Noba bai nia Tuan, ta isosoppi nualeake aku.”
3Totoiakenangan kabeinia Jesus irape nia kuanangan, “Kuoba, kauan numale!” Malenangan leu et bogbongnia. 4#3Mos. 14:1-32 Kuanangan ka matania Jesus, “Pagaba, bui nupoiliat nia ka kasei pa; kenan le nupaitco tubum kai imam, lepa buluakenungan buluakenen sitoneakenen Mose, katuaggaiat ka sia.”
Pasialeat pagugulet kapiten saladdu
(Luk. 7:1-10)
5Kele aituguru Jesus ka Kapernaum, oi kapiten saladdu manindou ka matania, kuanangan, 6“Tuan, paguguletku ai nia memerep ka lalep lulut sakitnia, makope besinia.”
7Kuanangan ka matania Jesus, “Ai leu kuoi kualeake nia.”
8Aleginangan nia kapiten saladdu, “Ta mateu aku Tuan, nutuguru ka lalepku; kua le sangakuanan, ta isosoppi imale paguguletku. 9Aipoi sirimanua paneineiet le aku, kaku leu ai saladdu paneineietku. Ke kukua ka sara, ‘Kenan!’ einangan leu et; samba ka sabagei, ‘Konan!’ oinangan leu et; ka paguguletku, ‘Galai nene!’ galainangan leu et nia.”
10Kisei le ka bagania Jesus aiarep tiboiet nene. Kuanangan ka matada sipasitutut nia, “Beri ka tai Israel ta akusese kopet tonem baga kele nene. 11#Luk. 13:29 Kukua nia ka matamui: Maigi te siooi sibara ka kabelaiat sulu samba ka kabelekat sulu mukom ka Purimataat Sorga sambada si Abraham, si Isak samba si Jakob. 12#Mat. 22:13, 25:30; Luk. 13:28 Tatogat purimataat geti turiribbaiake le ka simagepgep ka bebe; sedda te rapusosou samba iputatangat sotda.” 13Lepa kuanangan Jesus ka matat kapiten saladdu, “Katoilingan, babarangan kekeu siripot tonem bagam.” Ka jam nenda leu et ale paguguletnia.
Pasialeat talikut Petrus sinanalep samba sabagei
(Mrk. 1:29-34; Luk. 4:38-41)
14Kele aituguru Jesus ka lalep Petrus, itconangan aimemerep talikut Petrus sinanalep lulut roketnia. 15Rapenangan kabeinia Jesus, tata roketnia. Tusurunangan masipuuku Jesus.
16Kasoibokat, taroakerangan ka matat Jesus maigi pinasaileu sanitu; usiakenangan leu sanitu ka geget tiboietnia, samba ialeake sangamberi simabesi. 17#Jes. 53:4 Aibara nene, bule ipuaili tiboiet sinegeakenen nabi Jesaya sipasikukua, “Nia le amasibairat oringenta samba masiorik besita.”
Pagalaiat masitut Jesus
(Luk. 9:57-62)
18Kele aiitco Jesus sirimanua simigi sigoilik nia, kuanangan raputalipo ka sila. 19Lepa oi sara siagaisurat kuanangan ka matania, “Kutut ekeu Guru, kaipa kaipa nuei!”
20Kuanangan ka matania Jesus, “Lamusek ai ugunia, uma ai rumunnia, Togatsirimanua geti ta anai katubujungan utenia.”
21Ai leu sara ka talagat sipasiuluinia masikua ka matania, “Tuhan, obaake boiki kuei masirateiake ukkuiku.”
22Kuana le ka matania Jesus, “Tutnan aku, eddania simamatei masirateiake simamateira.”
Ilebakngake koat Jesus
(Mrk. 4:35-41; Luk. 8:22-25)
23Lepa janang Jesus ka abak, sipasiuluinia leu masitut nia. 24Tulut akenangan rusa simapiret ka koat, pat sebuinangan abakda onu; Jesus geti ai le nia memerep. 25Ia geti geugeurangan nia sipasiuluinia kuarangan, “Tuhan, romake, mamatei sita!”
26Kuanangan ka matada, “Angoi, maloloto kodda kam, kam simagulai tonem baga?” Suru nia, asenangan rusa samba koat malebaknangan, nem lepa.
27Tenan le kisei ka bagada sirimanua, kuarangan, “Apa le pa sirimanua nene, rusa samba koatnan le kodda irereddet ngangania!”
Ialeake rua pinasaileu sanitu Jesus ka Gadara
(Mrk. 5:1-20; Luk. 8:26-39)
28Kele aisege Jesus ka sila ka laggaira tai Gadara, oi rua pinasaileu sanitu sibara ka ratei masipaseseake nia. Bulat kalotoakenen le sia, pat beri sara simaeme tusabau ka enungan nenda. 29Itcora le Jesus, pugereirangan masikua, “Apa nuaala se Togat Taikamanua? Masipaore kai enan ta iaaili teterenia?”
30Ka reunan goiso ai sangamungkuat sakkoilo, aimasigagaba kan. 31Sanitu nenda masitiddou ka Jesus kuarangan, “Nuusiake geti kai, ka bagat sakkoilo nenda le kau kai.”
32“Kenanan kam!” ngangan Jesus. Belarangan leu et, ei sia ka sakkoilo. Sangamberinia sakkoilo nenda barania ka tikkara teipu bujuu ka koat, louloulou.
33Tui sia sipasijajago sakkoilo, ei sia ka laggai; nunuakerangan sangamberi sibabara, samba leu pagalaiat pinasaileu sanitu. 34Belarangan sangalaggaiat masitagetnake Jesus. Kele araitco nia, tiddourangan ikaddiuake laggaira.
Currently Selected:
Mat. 8: MWV
Highlight
Copy
Compare
Share
Want to have your highlights saved across all your devices? Sign up or sign in
@LAI 2015
