Hos. 1

1 # 2Rim. 14:23–15:7, 15:32–16:20, 18:1–20:21; 2Taw. 26:1–32:33 Nene te patonekat siaket Tuhan sikarunia ka tubut Hosea togat Beeri kateteret purimataat Jehuda barania ka pupaneineiat rimata Uzia, Jotam, Ahas samba leu Hiskia, samba purimataat Israel ipaneinei rimata Jerobeam togat Joas.

Sangalalep Hosea sibailiu tularat Israel sitaimatopit

2Kateteret aipanibo siboiki si Tuhan katubutda tai Israel sisege katubukku, kuanangan si Tuhan, “Hosea, talimouake sara sinanalep sioba paelet, samba sangamberi tatogam leu et masiului kele inanda, paamianKu makere kele sinanalepnu nenda, ta matopit sia katubukku, samba rakaddiuake le aku.”

3Iageti talimouakekungan sara sinanalep sipuoni Gomer togat Diblaim. Lepa aitutuake matat togamai siboiki, iate sara simanteu, 4#2Rim. 10:11 kuanangan si Tuhan katubukku, “Kau onin togam nendra Jizreel aipoi ta mabuburu minca Kuukum geti rimatdra tai Israel kalulut pamamatei sigalaiakenen Jehu, taikebbukatnia, ka Jizreel. Kutatataake le geti pupaparentaat montogat Jehu. 5Ka teteret nenda ka susut Jizreel pakataikungan purorondra saladdu tai Israel.”

6Lepa bara minca suruket sinanalepku samba putu'tunangan matat togamai sinanalep. Kuanangan si Tuhan katubukku, “Hosea, kau onin togam nenda Lo-Ruhama, kalulut ta'an manuntu bagaKu ka bangsa Israel, samba bulat ta'an kuaappeake sia. 7Tapoi tai Jehuda kupunununtuki le sia baga. Aku, Tuhan, Taikamanuanda masiarauake sia, tapoi ta sialei pasaggangan, samba leu ta sialaei lanjau, ele silogui ele kuro samba sipukukuro.”

8Lepa aigalak mutottot togamai sikarua nene, pusuruketnangan minca sinanalepku, iageti tu'tuakenangan sara toga simanteu. 9Kuanangan si Tuhan katubukku, “Kau onin togamui nenda, Lo-Ami, aipoi tai Israel ta paamianKu samba Aku taan Taikamanuandra.”

Palelengan pagalaiat puaraugat

10 # Rm. 9:26 Tai Israel ibailiu le maigi geti kele ngai ka koat, bailiu tamomoi tukireki ele ituadde. Kineneiget kuanangan Taikamanua katubutda, “Aku te Taikamanua sipuririmanua samba sangamberimui tatogakKu!” 11Tai Jehuda samba tai Israel tusasaraake le sia minca. Rioakerangan sara siuteake sia, samba makakrarangan samba maerunangan puririmanuanda ka laggaira. Bulatnia, gogoi Jizreel ibailiu le geti gogoi siabeu!

Currently Selected:

Hos. 1: MWV

Highlight

Copy

Compare