Gal. 1
1
Salam
1Sibara kai Paulus, apostel ta sibara ka sirimanua, ele kalulut sara sirimanua, tapoi kalulut Jesus Kristus samba Taikamanua Ukkui le, sisuruake nia ka simamatei, 2samba sibara ka sangamberi sasaraina sipaalei aku, masiailiake sapaamian ka Galatia: 3Kiliu baga ka kam samba aban sibara ka Taikamanua, Ukkuita, samba sibara kai Tuhan Jesus Kristus, 4sibuluake tubunia lulut jota, masibelaake sita ka polak sikatai nene, siripot teu bagat Taikamanua Ukkuita. 5Ka tubunia le pulatsanan teret buruburu! Amen.
Sara le Katuareman Simaeru
6Makisei ka bagaku, kalulut kise rueinia anukaddiuake kam nia sipasisosogai kam kalulut kiliu bagat Kristus, masitut katuareman simaeru bagei. 7Siripokatnia ta anai Katuareman Simaeru bagei. Ai le sirimanua bagei sipaingo paatuatmui samba sioba masipabailok Katuareman Simaeru sibara ka Kristus. 8Tapoi kenanen kai ele malaika sibara ka sorga masipaarep ka kam katuareman simaeru sitaimakere ka pinaarepmai ka kam, teleiet le nia. 9Kele sikuamai siburu, kineneiget kukua minca: Ke ai kasei pa sipaarep ka kam katuareman simaeru, sitaimakere ka sinilomui ka kai, teleiet le nia.
10Siobat bagat sirimanua pa kugagaba kineneiget, ele siobat bagat Taikamanua? Ele masiala bagat sirimanua pa kugagaba? Ke masiala bagat sirimanua bai kugaba, oto ta pagugulet Kristus aku.
Kipa aibailiu si Paulus apostel
11Tapoi bule nuagai kam nia sasaraina, Katuareman Simaeru sipaarepku, ta katuareman sibara ka sirimanua. 12Aipoi ta siniloku ka sirimanua, ele ta sirimanua amasigelaiake aku, sibara ka pamoilianan Jesus Kristus le.
13 #
Pugap. 8:3, 22:4, 5, 26:9-11 Aipoi anuarepman kam paraboatku siburu, ai pei le aku ka arat Jahudi: bulat simakope pali le akukukuru paamian Taikamanua samba masipakatai nia. 14#Pugap. 22:3 Samba ka bagat arat Jahudi aku le simabuak ka saalei kereku ka talagat bangsaku, aipoi bulat maosa aku masisuru arat taikebbukatmai.
15 #
Pugap. 9:3-6, 22:6-10, 26:13-18 Tapoi kalulut kiliu bagat Taikamanua, pilinangan aku ai pei le aku ka suruket inangku, samba isogai aku bailiu paguguletnia. 16Teuakenangan ipoiliat Togania ka tubuku bule kupaarep nia ka talagat bangsa bagei. Oto beri goiso ta akupatiboiji ka sirimanua; 17samba ta leu amei aku ka Jerusalem masiailiake sia tai apostel sipuboboiki kaku, tapoi riuriu le ei aku ka Arab, lepa toili aku minca ka Damaskus. 18#Pugap. 9:26-30 Pasat telu ngarura, ei aku ka Jerusalem masibalou si Kepas, pukuddukungan ka tubunia pulu lima ngagogoi. 19Tapoi apostel sabagei ta akuitco sia, sarat si Jakobus sarainan Tuhan le.
20Sangamberi sinuratnakenenku nene ka kam, bulat sibulatnia, iagai Taikamanua, ta kubobokoi.
21Lepa ei aku ka tobbou Siria samba Kilikia. 22Tapoi sapaamian Kristus ka Judea, tapei raagai aku. 23Sarat nene le araarep, “Sipasikukukuru sita siburu, kineneiget aian nia masingangantomanake tonem baga, pakataiketnia siburu.” 24Ia geti umunakerangan Taikamanua kalulut aku.
Currently Selected:
Gal. 1: MWV
Highlight
Copy
Compare
Share
Want to have your highlights saved across all your devices? Sign up or sign in
@LAI 2015
