Jehz. 47

Bagat oinan sibebela ka Uma Sipunenan

1Lepa geti ambitnangan aku minca ka matatbaliu Uma Sipunenan, bulatnia, ai oinan abela ka tei taggat matatbaliu Uma Sipunenan nenda samba muguruk masiailiake ka sikalaut, aipoi Uma Sipunenan leuet masimattai ka sikalaut. Oinan nenda muguruk ka repe ka isit kai kattoet Uma Sipunenan nenda, ka saigit ka kaiaman kudduat pasibuluat. 2Lepa paaleinangan aku bela ka matatbaliu gugurukat ka bare' samba ambitnangan aku masibokko barania ka uja siailiake matatbaliu gugurukat ka uja simattai ka sikalaut, bulatnia, oinan nenda mubuggra sibara ka isit kaiaman.

3Sirimanua nenda mei ka ipot sikalaut samba ka kabeinia iukkaake le' tali kirekat, kirekinangan sangaribu ngaeto samba koiniakenangan aku tuguru kabagat oinan nenda, oto kerunia teret puletsuat rere. 4Kirekinangan sangaribu ngaeto minca samba koiniakenangan aku tuguru minca ka oinan nenda, kineiget aiailingan boklo. Lepa geti kirekinangan minca sangaribungaeto samba koiniakenangan aku minca sikatelu tuguru' ka oinan nenda, kineiget aiailingan ka pukabekat. 5Aipei sangaminca ipasikire sangaribungaeto, kineiget oinan nenda aibailiuan bagat oinan samba ta?an momoi kupuenung, aipoi oinan nenda amakerungan pat oinangan rapulalak sirimanua, sara bagat oinan sitaioi tutalipoki minca.

6Lepa kuanangan katubukku: “Anuitcoan leu, ale togat sirimanua?” Lepa geti ambitnangan aku minca masiriringi be'bet oinan. 7Kapuenunganan tutoili, bulatnia, sanganantat be'bet oinan nenda ai bulat maigi loina, saigit sene' samba saigit sedda. 8Kuanangan katubukku: “Bagat oinan nene muguruk siailiake kupkumen ka sikalaut, tugorosot ka Araba-Jordan, samba mumonga ka Koat Simakalo, oinan simagaram samba oinan nenda ibailiu maleu, 9bailiu kaipa le puguruknangan bagat oinan nenda, sanganberi sipungongoingoi murimanua sedda. Sangamberi iba ibailiu le makope igi, aipoi kaipa le isege oinan nenda, oinan koat sedda ibailiu maleu samba kaipa le ipuguruk bagat oinan nenda, sangamberi sibabara sedda murimanua le. 10Oto sipuiiba sun le' sia ka sanganantat be'bet oinan nenda, barania ka En-Gedis teret ke En-Eglaim. Kupkumen laggai nenda ibailiu le' panuluat jarik samba ka bagat oinan nenda maigingamataat iba, kele paibaiba ka koat simalio, simakope igi. 11Tapoi sangamberi paonia samba sangamberi onajania ta'maleleu, nenda ibailiu le pasialakat garam. 12Karua be'bet bagat oinan nenda mutu'tu senengamata buat kaju, buluknia ta'malalaju samba buania ta'sasapru. Senen laggo aian minca buania sibau, aipoi ka sangamberi loina nenda ai oinan sibara ka kudduat sipunenan nenda. Buania ibailiu le' komen samba buluknia ibailiu le laggek.”

Pasongan polak Israel

13Kasene le' tiboiet Tuhan Taikamanua: “Nene te pasongan polak buita nurubei kam ibailiunia bakkat ikemenmui ka talagat sipulurua muntogat Israel. Si Josep bara rua rubeiatnia. 14Polak nenda buita nurubei kam simakere, iate polak sipalelekKu pasamba suppa kukaunia ka taikebbukatmui, kise te polak nene ibailiunia bakkat ikemenmui.

15Nene te' pasongan polak nenda: ka isit ka bare': barania ka koat sabeu riuriu ka Hetlon teret enungan gugurukat ka Hamat samba riuriu ka Zedad, 16Berota, Sibraim, sikuddu katalagat kupkumen laggai Damsyik samba Hamat, riuriu ka Hazar-Enon ka kupkumen laggai Hauran. 17Kise te' pasongannia nenda barania ka koat teret ka Hazar-Enon, bailiu kupkumen laggai Damsyik samba leuet kupkumen laggai Hamat sikuddu ka isit barenia. Nenda te isit ka bare'.

18Ka isit ka sikalaut: barania ka Hazar-Enon sikuddu ka talagat Hauran samba Damsyik, bagat oinan Jordan ibailiu le pasongan ka talagat Gilead samba polak Israel, riuriu ka Koat Sikalaut teret ka Tamar. Nenda te' isit ka sikalaut.

19Ka isit ka kaiaman: Pasongannia barania ka Tamar teret ka bubuakat oinan Meriba kalegret Kadesh, riuriu ka bagat oinan Misir, riuriu ka koat sabeu. Nenda te' ka isit ka kaiaman pasongan ka Polak Negeb.

20Ka isit ka sikaleleu koat sabeu sibailiu pasongan teret kudduat enungan gugurukat ka Hamat. Nenda te' ka isit ka sikaleleu.”

Parubeiat polak Israel

21“Polak nene te buita nurubei kam katalagamui siripokat sangamberi muntogat Israel. 22Buita nurubei kam ibailiunia bakkat ikemenmui katalagamui samba katalagat sioiake sikuddu ka talagamui, situ'tuakematda tatoga ka talagamui. Buita nuaddeake kam sia kele bulat tai Israel, pasambamui buita bara rubeiatda sibailiu bakkat ikemenda ka talagat muntogat Israel. 23Oto ke katalagat sara muntogat ai mukuddu siooiake, sedda te nukau kam bakkat ikemennia, kise te' tiboiet Tuhan Taikamanua.

Currently Selected:

Jehz. 47: MWV

Highlight

Copy

Compare