Est. 5
5
Si Ester masitiddou ioi si rimata samba si Haman ka punen sibaraakenennia
1Ka gogoi sika telu pupuasoatnia, leppeiakenangan si Ester leppei puririmatania, lepa einia ka gerat ka bagat uma purimataat samba purionangan ka ipot matatbaliu laibokat rimata. Ai mukukuddu rimata ka uddenan purimataat simatai ka matatbaliu nenda. 2Ka teteret aiitco Rimata Ester murio ka gerat, manunutunangan bagania ka tubunia samba totoiakenangan tutura' masnia ka tubunia. Iageti bela si Ester, lepa bekbeknangan buttet tutura' nenda. 3Lepa parerenangan rimata, “Aponia, ale Rimata” Apa kiddiet bagam? Kuangan le? Kenanen poi nutiddou iletalaga sibara ka purimataatku, kuaake leu et geti.”
4Aleginangan si Ester, “Ke pasese ka bagat Tuanku, bule soibo nene Tuanku samba si Haman moi ka punen sibaraakenenku addeat Tuanku.”
5Koiniakenangan rimata si Haman ioi simaola, bule ioi raei ka punen sibaraakenen Ester. Lepa oi sia ka punen nenda. 6Ka teteret mulo' anggur, parerenangan rimata, “Kuangan le kineneiget apa kiddiet bagam. Apa le tiddogetnu kuaake geti, kenanen poi iletalaga sibara ka purimataatku!”
7Aleginangan si Ester, 8“Ke pasese ka bagat Tuanku masiarepi panindogat paguguletnu, bule Tuanku samba si Haman moi minca ka punen sibaraakenen paguguletnu mancep sinoibo. Sedda geti ka punen nenda tiboikungan panindogatku ka tubut Tuanku.”
Si Haman ibesiake imateiake si Mordekhai
9Toili si Haman barania ka punen sibaraakenen Rimata Ester simaangka baga. Tapoi ka teteret aiitco si Mordekhai ka matatbaliu gugurukat lalep purimataat ta atusurunia addeat masikau tabi' ka tubunia, bailiu tuppainangan kopet golunia. 10Tapoi aiommake peile bagania samba toilinia ka lalepnia. Sege'nia sedda koiniakenangan sangamberi saaleinia moi samba masitiddou si Zeres, sinanalepnia, bule rapukuddu simakere. 11Lepa panibonangan ka buak paatuatnia katubutda samba masitiboi igit pukayoatnia, igitdra tatogania simanteu, sangamberi pubebeunan tiboi tubu sinilonia sibara ka rimata, samba pangkatnia simakope buak bele pei sipugagalai sabagei. 12Kuanangan leu et, “Beri Rimata Ester leu et sarat aku samba rimata le aitiddou ka punen sibaraakenennia addeatmai, samba mancep sinoibo tiddounangannia kuoi kai minca. 13Tapoi sangamberi nenda ta anai katukaunannia, ujut ai peileu kuitco si Mordekhai, tai Jehudi nenda, mukuddu ka matatbaliu gugurukat lalep purimataat.”
14Masiarep nenda sinanalepnia samba sangamberi saaleinia masikua kele kisene, “Koiniake le sirimanua ragalai arigit paninggotat buaknia lima pulu eto. Lepa mancepnia, simanceman tiddou le ka tubut rimata iobaake bule tutiggotnake si Mordekhai ka arigi nenda. Kele kiseddangan bai oinangan nuei ka punen nenda ka angkat baga.” Pinaatu nenda bulat maeru ipaatunia si Haman, kalulut nenda koiniakenangan ragalai simaola arigit paninggotat.
@LAI 2015