Dan. 1

Ka uma purimataat Babel

1 # 2Rim. 24:1; 2Taw. 36:5-7 Telungarura lepat aipuparenta rimata Joyakim ka Jehuda, si Nebukadnezar rimata Babel, masisaggangi ka laggai Jerusalem samba goilikrangannia. 2#2Rim. 20:17-18, 24:10-16; 2Taw. 36:10; Jes. 39:7-8 Si Tuhan masiobaake si Nebukatnezar masikalaake Rimata Joyakim samba masiraurau sangarubeiat bibilet simakeppu saki ka uman Tuhan. Sirimanua sitangsiakenennia ambitnangan sia ka uma pasibuluat taikamanuania ka Babel, samba bibilet simakeppu saki sirauraunia, koiriakenangannia ka kudduat pongoirikat ka uma pasibuluat nenda.

3Lepa parentaakenangan rimata si Aspenas, si uteake lalep purimataat, masipili piga pa katalagat Israel tailainge sitangsiakenen sibara ka muntogat rimata. 4Tailainge nenda, ta simalolit tubu, simalainge tubu, sibara sikola, simaagai samba simasoppit samba mateu rapugalai ka uma purimataat. Bui ta igelaiake sia si Aspenas masibasa samba masisurat ngangan Babel. 5Rimata masiteuake leu, komen samba lo addeat ka sia bui tamakere kele komen samba loket rimata. Bui ta tugelaiake le sia telungarura. Lepa nenda pugalairangan ka uma purimataat. 6Katalagat tailainge nenda ai leuet si Daniel, Hananya, Misael samba Azarya. Sangamberidra sibara ka suku Jehuda. 7Siuteake lalep purimataat masisili sangamberi oninda bailiu: Beltsazar, Sadrakh, Mesakh samba Abednego.

8Si Daniel aimuineakean patuatnia ta igalaiake kasitsitakenen masikom komen rimata samba anggur loket rimata simareirei; tiddounangan kai Aspenas, bule ta igalaiake kasitsitakenen masilo samba masikom komen Rimata. 9Kabagat paroman Taikamanua, si Aspenas masipununtuki baga si Daniel. 10Kalulut lotonia ka Rimata, kuanangan si Aspenas, “Beringan rimata ai teuakean komen samba loketnu, oto ke iitco ekeu rimata ta masa'sa katubum bele pei ka tailainge sabagei, mateiakenangan leu aku rimata.”

11Sedda ai sara sipasijago sisausau Aspenas masipasikeli si Daniel, Hananya, Misael samba Azarya. Lepa patiboijirangan pagalaiat nenda si Daniel, kuanangan si Daniel: 12“Sibo kam kai pulungagogoi ujunia; ake le kakai sarat gulei komenmai samba oinan loketmai. 13Pasat pulungagogoi, pakire kam putubuatmai pasamba putubuatda tailainge sipasikokom siteuakenen rimata, lepa takkiakemuian siripokat siitsomui nenda.” 14Sipasijago nenda ioba. Lepa geti galainangan masisibo pulungagogoi ujunia. 15Kele aitukapplu pulungagogoi, tuitso sia makope le sa'sa samba ron tubutda bele peile tailainge sipukokom ka mejat Rimata. 16Barania kateteret nenda sipasijajago nenda taan ailabbeiake katubutda komen samba loket siteuakenen rimata, tapoi sarat gulei samba oinanan le.

17Taikamanua masikau katubut epat tailainge nenda pusikuat paatuat samba puaagai kabagat senengamata surat. Lepa nenda katubut Daniel ikau leu puaagai masipakolou senengamata siitso samba pangamutet.

18Kapplu telu ngarura arapasigelai si Aspenas masiambit sangamberi tailainge nenda ka matat Rimata Nebukadnezar. 19Lepa aipatiboake sia Rimata sangamberitda nenda, sesenangan si Daniel, Hananya, Misael samba Azarya sisaliu peile puagaira tailainge sabagei. 20Senen itiboake rimata pagalaiat paaggarat simateu tukolouake samba enungan kabelaiat kabagat paaggrat, itsonangan nganturat samba alegiat epat tailainge nenda, pulu ngaminca erunia bele peile nganturat samba alegiat sangamberi simaagai samba sikerei ka sangalio purimataatnia.

21Si Daniel mariuriu le ipugalai ka kudduat purimataat teteret rimata Koresh sibara ka Persia masikalaake Babel.

Currently Selected:

Dan. 1: MWV

Highlight

Copy

Compare