Pugap. 21
21
Puenunganan Paulus ka Jerusalem
1Lepa akupasara kai tai baja gareja sibara ka Epesus, riuriuakemaian mulajo sege ka Kos. Pato sege kai ka Rodos, baramai sedda ei kai ka Patara. 2Ka Patara sesemaian sara kapal sieei ka Penisia, tujanangmaian sedda pulajomaian. 3Kele aimakoinong Siprus, kaumaian nia isit kai katsiumai kupulajo kai ka Siria, lepa tujoloumaian ka Tirus, sedda poi itugagaugau abangen kapal. 4Baloumaian sipasiului sedda, pukuddumaian pitu ngagogoi. Kuarangan leu ka matat Paulus siripot sipoiliat Ketsat Sipunenan, bui iei ka Jerusalem. 5Kele aitukappulu gogoi kukuddumai sedda, tuitui kai kuriuriuake kai puenungananmai. Taroakerangan kai sangamberida samba saina samba tatoga ka bebet laggai; ka sosoroat purekkukmaian sangamberimai manindou. 6Lepa akuparoro kai, janang ka kapal, toili sia ka sia ka lalepda.
7Riuriuakemaian kukappuluake kai pulajoatmai baramai ka Tirus sege ka Ptolemais. Paroromaian saalei, kuddu kai sedda sangagogoi. 8#Pugap. 6:5, 8:5 Pato, tuitui kai sege kai ka Kaisarea. Ei kai ka lalep Epanggelis Pilipus, ia te sara ka sipitu sipili ka Jerusalem, pukuddumaian ka lalepnia. 9Kai Pilipus nene ai epat togania taiokko sipamomoiliat. 10#Pugap. 11:28 Piga ngagogoi pa akukuddu kai sedda, oi sara nabi sibara ka Judea sipuoni si Agabus. 11Oi nia ka tubumai, alanangan akkik tengan Paulus, apparanangan rere samba kabeinia kuanangan, “Nene le aikua Ketsat Sipunenan: Kise te rakabe sibakkat akkik tenga nene tai Jahudi ka Jerusalem, lepa segeakerangan nia ka kabeira bangsa bagei.”
12Kele akuarep kai nene keramaian nia sambamai sikuddu sedda buian iei si Paulus ka Jerusalem. 13Alegina le nia si Paulus, “Aponia nupusosou kam kele nene, nureureuake kam bagaku? Aipoi ta sarat tukabe, tapoi samba matei leu ka Jerusalem matarek le aku kalulut onin Tuhan Jesus.”
14Kalulut ta iagai kukera kai nia, pumengmengmaian, kuamaian, “Bule ipuriuriu teu bagat Tuhan.”
15Piga ngagogoi pa akukuddu kai sedda, patarekmaian tubumai, ei kai ka Jerusalem. 16Tapoi amoi leu piga pa sipasiului sibara ka Kaisarea masipaalei kai; ambitrangan kai mugogoi ka lalep Manason. Si Manason nene ia te sibara ka Siprus, amaujungan aibailiu nia sipasiului.
Paailiat Paulus kai Jakobus
17Sege kai ka Jerusalem, silorangan kai saalei ka angkat baga. 18Pato ei si Paulus sambamai kai Jakobus; sangamberida sautet paamian leu aian sia sedda. 19Lepa airoroi sia, nunuakenangan si Paulus ka matada pasasara sigalai Taikamanua ka bangsa bagei ka bagat pugagalainia. 20Kele araarep nia, umunakerangan Taikamanua. Lepa kuarangan ka matania, “Ale saraina, anuitcoan piga ngaribungan igida tai Jahudi amatonem baga, tapoi sangamberida, ai pei le ragagalaiake Surukat Mose. 21Araarepman pagalaiat pangangantomannu tai Jahudi sikuddu ka talagat bangsa bagei bule raariake masigalaiake Surukat Mose, kalulut anukua, buian rasunat tatogada, ele masitutnake arat Jahudi. 22Kipangan le tagagalai? Ta isosoppi tebai raarep kababaram se. 23#4Mos. 6:13-21 Oto kise le kukua kai nugagalai: Ai ka kai epat sirimanua sipusisibala. 24Ala sia nuei kam sambamui nusuru kam tubumui, samba nukau bulagatda, bule ioi rasapu alaira; bailiu sangamberi sirimanua masiagai, katuareman siarepda pagalaiat tubum ta sibulatnia, aipoi beri ekeu ai le nugagalaiake siripot Surukat Mose. 25#Pugap. 15:29 Pagalaiat sia tai Kristen sibara ka bangsa bagei geti akukauan kai surat masikua ka matada bui rakom komen sibuluakenen ka buluat, bui rakom logau, bui rakom tarimeu sipetsut samba raareuake tubuda ka puumunan.”
26Ia geti alanangan si Paulus sirimanua siepat nenda, pato ei sia musuru sambada, lepa ei sia ka Uman Taikamanua masisegeake pigamoi itukappulu rapusuru samba rabuluake buluakenenda senenda.
Ralaba si Paulus ka Uman Taikamanua
27Malegerengan le itukappulu pitu ngagogoi, itcorangan si Paulus tai Jahudi sibara ka Asia ai nia ka Uman Taikamanua. Tubbuirangan leu sirimanua simigi ralaba si Paulus, 28pugereirangan, “Ale tai Israel, romake kam! Ia te ne sirimanua sipangantoman sirimanua kaipa kaipa masisaggangi bangsa Israel, samba Surukat samba kudduat nene. Aiambitnan pei bagei tai Grika tubuluk ka Uman Taikamanua masipalolit kudduat sipunenan nene!” 29#Pugap. 20:4 Araitcoan poi boiki si Tropimus tai Epesus ruada si Paulus ka laggai; ka bagada le te aiambitnan nia si Paulus ka Uman Taikamanua.
30Bara ibara pugaugapat ka sangalio laggai, oi sirimanua paguru, labarangan si Paulus, giritrangan nia rabelaake nia ka Uman Taikamanua, patpatnakerangan leu matatbaliu. 31Kei ramamateiakean le nia, maarepnangan katuaremannia ka utet saladdu kababarat pugaugapat ka sangalio Jerusalem. 32Ruruakenangan leu tai saladdu samba tai kapiten saladdu, pabalaurangan raei ka pugaugapat. Kele araitco utet saladdu samba tai saladdu sirimanua simigi ariakerangan masibobo si Paulus. 33Oi utera tai saladdu alanangan si Paulus, kuanangan rakabe nia rua palenggui, lepa nounounangan kasei nia, aponia aigalai. 34Tapoi ka talagada sirimanua simigi sabagei masigereiake nene, sabagei nenda. Taiooinia iagai katumunengan kalulut gaugaura, kuanangan raambit si Paulus ka markas. 35Kele arasege ka orat, bairatrangan si Paulus tai saladdu, kalulut pugegegeda sirimanua simigi. 36Aipoi sirimanua simigi airatutut nia samba mugerei, “Mateiake nia!”
Itiddou manibo si Paulus
37Kei raambitnan le nia tai saladdu ka markas, kuanangan si Paulus ka matat utera tai saladdu, “Momoi leu kupanibo ka matam?”
Aleginangan nia, “Nuagai ngangan Grika? 38Ta ekeu tai Misir, sibaraake pugaugapat simaruei, samba sipagirit epat ribu sipasiraraurau ka simatangeu?”
39Aleginangan nia si Paulus, “Tai Jahudi le aku, warga kota Tarsus, laggai simaarep kaipa kaipa ka tobbou Kilikia; kutiddou nuobaake aku manibo ka matada bangsa nene.”
40Obaakenangan nia, einangan leu si Paulus manibo ka orat, totoiakenangan kabeinia ka sirimanua simigi. Kele arapumengmeng, panibonangan ka matada ka ngangan Ibrani kuanangan,
Currently Selected:
Pugap. 21: MWV
Highlight
Share
Copy
Want to have your highlights saved across all your devices? Sign up or sign in
@LAI 2015
