Pugap. 18

Paulus ka Korintus

1Pasat nene tui si Paulus kaddiuakenangan Atena, ei nia ka Korintus. 2Sedda paailirangan sara tai Jahudi sipuoni si Akwila sibara ka Pontus. Simaruei pei le aibara ka Italia ruada sinanalepnia si Priskila, kalulut aiparentaake poi Kaisar Klaudius ratuitui sangamberi tai Jahudi ka Roma. Tagetnakenangan sia si Paulus, 3samba kalulut makere le poi galajetda, pukuddurangan, pugalairangan sambada; pasasambada poi tukang tenda. 4Tapoi senen gogoi Sabat mungantoman le si Paulus ka uma parurukat masinana tai Jahudi samba tai Grika mutonem baga.

5Kele aioi si Silas samba si Timoteus barada ka Makedonia, muineakenangan paatuatnia si Paulus masipaarep tiboiet Taikamanua masimunengake ka tai Jahudi, Jesus ia te Kristus. 6Tapoi kalulut sarat masisaggangi samba masiasa le ragagalai, sosoakenangan abu ka leppeinia si Paulus kuanangan ka matada, “Ke mei kam ka pulangokat, selemui le, ta iaili aku; barania kineneiget ka bangsa bageian le kueei.” 7Tui aituitui sedda ei nia ka lalep sara sirimanua sirepdep loto ka Taikamanua sipuoni si Titius Justus; lalepnia nene aipabebebe uma parurukat. 8Tapoi si Krispus, utet uma parurukat matonem bagania kai Tuhan samba sangamberi sikuddu ka lalepnia, samba maigi leu tai Korintus sabagei kele araarep katuareman sibara kai Paulus, matonemnangan bagada, turaurangan leu.

9Ka sara soibo bara siitcot matania si Paulus, sedda ikua si Tuhan ka matania, “Ba maloloto, tiboi le, ba pumemengmeng! 10Ai le kupaalei ekeu, ta anai kasei pa siooi masigalai apa pa ka tubum, aipoi maigi sirimanua bakkatku ka laggai nene.” 11Ia geti pukuddunangan si Paulus sedda sangarura enem ngalaggo masigelaiake tiboiet Taikamanua ka sia.

12Ka teteret Gallio gubernur ka Akhaya, pakererangan baga tai Jahudi masisaggangi si Paulus, ambitrangan nia ka purapanan, 13kuarangan, “Ai le itutubbui sirimanua sinene masipanindogi Taikamanua ka enungan sitaipasesese ka Surukat.”

14Kei maninibongan le si Paulus, kuanangan si Gallio ka matada tai Jahudi, “Kam tai Jahudi, ke pagalaiat pasipasasabau ukum ele pugagalai sikatai bai panganduatmui nene, mateu kulelekngake kam. 15Tapoi ke pajoggolat pagalaiat tiboiet ele oni ele surukatmui geti, kaman le ipagaba nia; ta koba kuukum nene.” 16Lepa kekelenangan sia ka purapanan. 17Labarangan sangamberida si Sostenes utet uma parurukat, pabobokirangan nia ka matat purapanan. Tapoi ta aipuuku si Gallio nene.

Paulus toili ka Antiokia

18 # 4Mos. 6:18 Pasat nene mukuddu pei le nia goiso si Paulus ka Korintus. Lepa segeakenangan katutuituinia ka saalei, pulajonangan iei ka Siria samba si Priskila samba si Akwila, lepana aisapu alainia ka Kengkrea; kalulut aipoi sibalaatnia. 19Sege sia ka Epesus, kaddiuakenangan si Priskila samba si Akwila, ei nia sarania ka uma parurukat masipatiboake tai Jahudi. 20Tiddourangan bule imauju pei le ikuddu, tapoi ta ioba. 21Tapoi sege le aisegeake katutuituinia kuanangan, “Ai leu kuoi minca ka kam, ke iobaake Taikamanua.” Lepa pulajonangan barania ka Epesus.

22Kele aisege ka Kaisarea, tatara nia ka Jerusalem masiroroi paamian, lepa ei nia ka Antiokia. 23Piga pa ujunia aikuddu sedda, lepa tui nia minca, gejenginangan sangalio tobbou Galatia samba Prigia masironake paatuatda sipasiului.

Apollos ka Epesus

24Ka teterenia nenda oi ka Epesus sara tai Jahudi sipuoni si Apollos siputututu mata ka Aleksandria. Bulat iagai mutitiboat samba maagai nia Surat Sipunenan. 25Atupangantomanan nia enungan Tuhan, simakope ngamang le nia mungantoman, makolou le igelaiake pagalaiat Jesus; tapoi sarat pasiraukat Johannes pei le iagai. 26Taddaakenangan mungantoman ka uma parurukat ka bagat eme. Kele aiarep nia si Priskila samba si Akwila, ambitrangan nia ka lalepda, kolouakerangan ka matania simakope kolou enungan Taikamanua. 27Kele aiisiake si Apollos mei ka Akhaya, koiniakerangan surat saalei ka Epesus ka saalei ka Akhaya, bule rasilo nia. Kele aisege sedda, bailiu paroman sabeu ka sia siputotonem baga kalulut katet bagat Taikamanua. 28Bulat maron poi nia masikalaake tai Jahudi ka simatoila samba isausau sibara ka Surat Sipunenan, Jesus ia te Mesias.

Currently Selected:

Pugap. 18: MWV

Highlight

Copy