2Taw. 22
22
Ahazia rimata Jehuda
(2Rim. 8:25-29)
1Iageti sipulaggai ka Jerusalem masiuddetake si Ahazia, togat Jehoram sisule, ibailiu rimata masisailiake ukkuinia, kalulut sangamberi togania sikebbuat aramateiakean sia mungkuatda tai Arab sioi ka pusapougat. Oto si Ahazia, togat Jehoram, rimata Jehuda, ibailiu rimata. 2Kateteret aibailiu rimata si Ahazia ainia rua pulurua ngarurania samba sangarura burunia aipupaneinei ka Jerusalem. Onin inania iate Atalya, punuteteu Omri. 3Si Ahazia leu et masitutake paraboat muntogat Rimata Ahab, kalulut inania masingantrunia masigalaiake sikatai. 4Si Ahazia masigalaiake jo katubut Tuhan kele muntogat Rimata Ahab, kalulut lepat aimatei ukkuinia, sia te aibailiu sipangangantrunia samba amasipakatainia. 5Kalulut nganturatda, pusaranangan kai Joram, togat Ahab rimata Israel masisaggangi Hazael rimata Siria. Pasaggakrangan ka Ramot, ka laggai Gilead. Tapoi si Joram aioraknia kabagat pasaggangan nenda, 6lepa toilinia ka laggai Jizreel ipulaggek kalulut maujunia samba si Ahazia, togat Joram, rimata Jehuda mei masibalou si Jehoram togat Ahab ka Jizreel, kalulut mabesinia.
Si Jehu masimateiake si Ahazia
(2Rim. 9:27-29)
7Aiteuakean Taikamanua tetere purimanuaiat Ahazia kateteret aibalou si Joram. Oto kateteret aioi si Ahazia, einia pasamba si Joram masiailiake si Jehu, punuteteu Nimsi, sisukatakenen Tuhan, bule nia le masimamateiake reddenan Ahab. 8Kateteret aigagalaiake si Jehu pasiukuman ka reddenan Ahab, ailinangan sedda siabeu tiboi tubu ka Jehuda samba samomoi Ahazia siei ka pasibalougat nenda. Iageti mateiakenangnan sia sangamberitda. 9Iageti gabanangan si Ahazia; labarangan si Ahazia kateteret ainia mulilipput ka Samaria. Ambitrangannia kai Jehu, lepa mateiakerangannia.
Kenanen kisedda rateiakerangan leu et nia kalulut rakua sirimanua: Nia iate punuteteu Josafat, sipaguguletake tubu ka muinet patuatnia kai Tuhan.” Sibara ka muntogat Ahazia taan anai sioi masiriuriuake pupaneineiat.
Atalya rimata sinanalep ka Jehuda
(2Rim. 11:1-21)
10Kateteret aiagainia si Atalya, inan Ahazia, aimatei togania, koiniakenangan bule sangamberi muntogat tai rimata ka Jehuda tumateiake. 11Ai sara maniu Ahazia sipuoni Joseba siputalimou ka sara imam sipuoni Joyada. Sitaiagaiet alanangan si Joseba sara togat Ahazia simanteu sipuoni si Joas katalagat sara tatogat rimata mateiakenen Atalya. Lipputakenangan toga nenda samba sipasikelinia ka sara bilik ka Uman Tuhan. Kisedda te aiujaake toga nenda si Joseba, bailiu ta aimateiakenia si Atalya. 12Enem ngarura aitulipputake si Joas ka Uman Tuhan, iageti si Atalya mupaneinei sibailiu rimata sinanalep.
Currently Selected:
2Taw. 22: MWV
Highlight
Copy
Compare
Share
Want to have your highlights saved across all your devices? Sign up or sign in
@LAI 2015
