1Kor. 16
16
Paroman kaunen ka sapaamian ka Jerusalem
1 #
Rm. 15:25, 26 Pagalaiat ruruket bulagat kaunen ka saalei tai Kristen, galai kam kele sitoneakenenku ka sapaamian ka Galatia. 2Senen gogoi Menggui senemui masiruruake bulagat teret sibabara, koiri ka kudduatnia, bui teret amoian le aku ia pei tutaddaake masiruru. 3Amoian geti aku, koiniakekungan sia simatonem bagamui raambit surat masisegeake panguruatmui ka Jerusalem. 4Ke tubesiake geti samba aku mei, ei kai sambamai.
Isiat puenunganan Paulus
5 #
Pugap. 19:21
Momoi aku masibalou kam, lepa kusabau Makedonia, aipoi kusasabau le Makedonia. 6Pasese bai nia kuddu aku goiso ka kam, ele teret sabau tetere simaleppet, bule kam le masirom masipasikeli aku kuriuriuake pueijananku. 7Aipoi ta koba kineneiget kuitco kam ka pasabagat le; kukaroni mauju goiso kukuddu ka talagamui, ke iteuake bai si Tuhan.
8 #
3Mos. 23:15-21; 5Mos. 16:9-11 #
Pugap. 19:8-10
Tapoi ka Epesus le kukukuddu, teret punen Pentakosta, 9aipoi se ai oggak kaku mugalai galajet sabeu sibaraake uktuk, kenanen maigi leu sipasisasaggangi.
10 #
1Kor. 4:17
Ke moi si Timoteus, puuku kam nia, bui ka bagat loto ikuddu ka talagamui, aipoi galajet Tuhan le igagalai keleu aku. 11Oto bui bara kasei pa sipaloloi nia! Tapoi romake le kam nia, bule imariuriu puenunganannia, bule itoili minca kaku; aipoi ai le kungengenaake nia sambamai sasaraina sabagei.
12Pagalaiat sarainanta si Apollos geti, akutubbuian nia simakope bule moi nia sambada sasaraina sabagei masibalou kam, tapoi bulat tapei ioba moi kineneiget. Aiipoan geti oggak sipasesese, momoi leu nia.
Tiboiet pasilepa samba salam
13Pumata kam, murio simaron ka bagat tonem baga, magege samba riuriu ron! 14Sangamberi galajetmui ka bagat nuntut baga galai kam nia!
15 #
1Kor. 1:16
Ai pei le tiddogetku ka kam sasaraina. Nuagai kam Stefanus samba saeppunia ia te sipukikristen siboiki ka Akhaya, samba rabuluake tubuda masipasikeli paamian Taikamanua. 16Bule nureddet kam sia sirimanua kele nene samba sabagei sipugagalai samba sipusasaggo tubu.
17Maangka bagaku kaooi Stefanus, Fortunatus samba Akhaikus, kalulut rasutnake simagulai pei le ka kam; 18arapakula poi ketsatku samba ketsatmui. Suru kam sia sirimanua kele nene!
19 #
Pugap. 18:2
Salam ka kam sibara ka sapaamian ka Asia. Si Akwila, Priska samba paamian ka lalepda masisegeake salam simaigi ka kam ka bagat Tuhan. 20Salam ka kam sibara ka sangamberi sarainanta.
Pasalam kam pasasambamui ka pasiggungan sipunenan.
21Tuppainia minca bulat sinurat kabeiku: Salam sibara kaku Paulus.
22Kasei ta masipununtuki baga si Tuhan, teleiet le nia!
23Kiliu bagat Tuhan Jesus masipaalei kam.
24Nuntut bagaku masipaalei kam sangamberimui ka bagat Kristus Jesus.
Currently Selected:
1Kor. 16: MWV
Highlight
Copy
Compare
Share
Want to have your highlights saved across all your devices? Sign up or sign in
@LAI 2015
