TITU 3
3
1Ukaewulwise kuzeyela kuli mianangana, ni akwa kuyula, akononoke, akalulike kulinga yitanga yeswe yipema. 2Kanda ahanjika yipi hali niumwe, kanda apwa akwa ndombo, akapwe yimbovu, nikulweza kushimbika cheswe kuli atu eswe. 3Mumu yetwene nawa ha miaka ya kunyima twapwile yihepuke, yihulia, nikupianguka, nikulingila usolo weka ni weka ni kuwaha cheka ni cheka, nikwenda mu uhuka ni lufwachinda, akwa kole, nikulivwila kole umwe ni mukwo. 4Alioze muze utu ni kufwila cha Zambi Chilamwina chetu chasolokele, 5hi ku yitanga ya ululi ko, yize twalingile yetwene, aiioze nikulita ni keke yenyi yinene watulamwinyine, ku kusanyisa cha kusema chaha, ni kupwisa chaha cha Spiritu Musandu. 6Yoze wamuzukwile wa kulumbama hali yetu kuli Yesu Kristu Chilamwina chetu, 7hanga, se hanatusambisa ku vumbi lienyi, tukapwe maswana nikulita ni kutalatala cha mwono wa mutolo. 8Liji lino liamwenemwene.
Ha kutwala ku yino yuma ngunazange ukalishinjike, hanga waze hanafuliela kuli Zambi, akase mbunge kulalaminya ku yitanga yipema. Yino yuma yinapeme, yakufumbula atu. 9Alioze China kulihangujola cha uhepuke, ni kujichika miya, ni vunda, ni kulitachika cha kutwala ku shimbi, mumu kuyishi kufumbuka; yapwa yamokomoko. 10Mukwa kuhandunwona muze hiwanukanjisa kashi, kaali, lituneye, 11se unanyingika umwe ngwe yono kapianguka, kanavulumuna, kalihisa mwene.
12Muze mungutuma Aretema kuli yena, hanji Techiku, ukalipupwise kwiza kuli yami ku Nikopoli, mumu hinahala kutwamako mwaka wa chishika. 13Ukashinjikile chikolo Zena mwe ngaji, ni Apolu ha wenyi wo, hanga kechi kahona nichimwe. 14Atu jetu nawa, akalilongese kulalaminya ku yitanga yipema, akahase kukwasa ni yuma yize yinatambe, hanga kechi kapwa ngwe keshi mihuko.
15Waze eswe ali hamwe ni yami kanakumeneka. Ukameneke waze akutufwila mu Ufulielo.
Vumbi likapwe hamwe ni yenu eswe. Amene.
Currently Selected:
TITU 3: Csa
Highlight
Copy
Compare
Share
Want to have your highlights saved across all your devices? Sign up or sign in
Chokwe Bible © Bible Society in Angola, 1975.
