A-ROMA 9
9
1Ngunambe umwenemwene muli Kristu, chahanjikile mahuza, mbunge yami yakushindakenya hamwe ni yami muli Spiritu Musandu, 2ngwami, Chinyengo chinene ni yikola yize kuyishi kuhola nguli nayo mu mbunge yami. 3Mumu ngunahase kulemba yami mwene ngushingiwe kuli Kristu mumu hali mandumbu jami, usoko wami nikulita ni musunya; 4o A-Izalele; waze aapwishile ana, ni uhenya, ni usendo, ni kuhana cha shimbi nicho; ni uvumbiko wa Zambi, ni yilakenyo; 5ni e tulamba, a kuli ayo, ni kuli ayo nikulita ni musunya Kristu wasemukine, Mwenawo kapwa helu lia eswe, Zambi kafumana ndo ku miaka ya mutolo.
6Alioze kuchapwile ngwe hanji liji lia Zambi Hahona. Mumu hi eswe ko apwa A-Izalele, waze a kuli Izalele: 7chipwe, mumu anapu munyachi wa Apalahama, eswe anapu ana, ka; alioze ngwo, Muli Izake makatambika munyachi we. 8Te hi ana a musunya ko anapu ana a Zambi; alioze ana a chilakenyo kanaalula ngwo, Munyachi. 9Mumu lino lie liji lia chilakenyo ngwo, Nikulita ni mwakono mungukeza, Sera kumakasema mwana-lunga. 10Hi chize ko wika; alioze Rebeka nawa se wasesekele ufumba kuli umwe, iye kulwetu Izake. 11Mumu ana te kanda asemuka, chipwe kanda alinga nichimwe chipema hanji chipi, hanga upale wa Zambi nikulita ni kutongola chenyi ukakole, hi wa ku yitanga ko, alioze wa kuli yoze wakutambika. 12Achambile kuli iye ngwo, Mukulwana kumakalingila kanuke. 13Ngwe chinasonewa ngwo, Hingunazange Yakomba, alioze hingunavwila kole Esau.
14Mba kuchi mutwamba? Ngwetu, Zambi kali ni uhenge, nyi? Ka, pundu! 15Mumu kanambe kuli Mose ngwenyi, Mungumuvwila keke yoze mungumuvwila keke; mungumuvwila vumbi yoze mungumuvwila vumbi. 16Chocho kuchapwile kuli waze mapala; chipwe cha kuli yoze mazomboka, ka; alioze cha kuli Zambi, yoze wakwivwa keke. 17Mumu chisoneko chinambe kuli Fwalau ngwo, Ha chikuma chino chene nakumikine, hanga ngukalweze muli yena tachi jami, hanga jina liami likafumane kweswe hano hashi. 18Chocho mevwa keke hali yoze mamupala, ni yoze mamupala mamukalisa.
19Muwamba kuli yami ngwe, Nyi chocho kuchi te achili nikutwaha mulonga? Mumu iya malimika ni upale wenyi? 20Ka, alioze yena mutu, yena iya, wakukumbulula kulimika ni Zambi? Chuma cha kutengewa muchamba kuli yoze wachitengele ngwenyi, Kuchi te wangutangile chocho? 21Hanji tengi keshi chiyulo ha uma, ku mwaha umuwika kutanga chikwachilo chimwe ku ulemu ni chikwo ku ulelu? 22Kachi Zambi, kanazange kulweza utenu wenyi, nikusolola tachi jenyi, wanyongonwene ni uhomboloji wunji ni yikwachilo ya utenu alitesele ha kwonwona: 23hanga akasolole kulumbama cha uhenya wenyi ha yikwachilo ya keke, yize iye walulikile Shimbu-kanda ha uhenya. 24Te yetu nawa, atutambikile, hi kuli A-Yunda wika ko alioze kuli akwa mavungu nawa, mba kuchi? 25Ngwe kanambe nawa mu mukanda wa Hozea ngwenyi,
Kumungukaavuluka ngwami, A tu jami, waze kapwile atu jami;
ngwami, Kanamuzange chikolo,
yoze te kamuzangile.
26Mba kumuchikapwa muma muze achambile kuli ayo ngwo, Yenu hi nuli atu jami ko,
muze mwene kumakaavuluka ngwo, Nuli ana a Zambi ya mwono.
27Alioze Izaia kanatete ha kutwala kuli akwa Izalele ngwenyi, Kachi ha kwalula ana a Izalele mapwa chizechene ngwe masekeseke a ku kalunga-lwiji, masalila wika makaalamwina: 28mumu Mwene kumakalinga liji lienyi hano hashi, makalimanununa, makalipatula pundu. 29Ngwe ambile Izaia kushi ngwenyi,
Twapwile ngwe Sondome, atupwishile ngwe Ngomora,
shina Mwene wa yizavu ya tujita watuhichikilile ana.
30Mba twambe kuchi? Ngwetu, akwa mavungu waze kakawile ululi, hanazuku ululi, te ululi uze wa ku Ufulielo: 31alioze akwa Izalele, waze akawile shimbi ya ululi, kahetele ku shimbi yize. 32Kuchi te? Mumu kayikawile ku Ufulielo, alioze ngwe ku yitanga. Ahukanyine ku liwe lia kuhukanyisa. 33Ngwe chinasonewa ngwo,
Talenu mungusa mu Zaione liwe lia kuhukanyisa,
ni luliwe lwa kutalingisa;
ni yoze mafuliela kuli iye kechi kevwa sonyi.
Currently Selected:
A-ROMA 9: Csa
Highlight
Copy
Compare
Share
Want to have your highlights saved across all your devices? Sign up or sign in
Chokwe Bible © Bible Society in Angola, 1975.
