A-ROMA 4

1Mba kuchi mutwamba? Apalahama kulwetu nikulita ni musunya hanawane chika? 2Mumu kachi asambishile Apalahama ku yitanga, kachi kali ni chimwe cha kulisamba nacho; alioze hi kumeso ja Zambi ko; 3mumu chisoneko chinambe chika? Ngwo, Apalahama wafulielele Zambi, mba achalwile kuli iye ha ululi. 4Achi kuli mukwa milimo, keshi kwalula fweto yenyi ngwe ya vumbi, alioze ya kongo. 5Alioze kuli yoze keshi kulinga, hindu mafuliela mukwa kusambisa yitanganyanyi, malula Ufulielo wenyi ha ululi. 6Chizechene ngwe David nawa kanavuluka kuwaha cha mutu yoze Zambi mamwalwila ululi keshi yitanga, 7ngwenyi,

Kawaha waze ungulungulu wo hanaukonekenawo, waze milonga yo yinafukiwa.

8Kawaha mutu yoze Mwene kechi kumwalwila shili yenyi.

9Kuwaha chino chili hali ngalami, nyi? Shina hali yilima nawa? Mumu tunambe ngwetu, Alwile kuli Apalahama Ufulielo wenyi ngwe ululi. 10Ngwe kuchi awalwile? Muze apwile ngalami, nyi? Shina chilima? Hi mu ungalami ko, alioze mu ulima; 11iye watambwile chinyingi cha ungalami, Chijikilo cha ululi wa Ufulielo, uze wapwile nawo shimbu te achili chilima: hanga akapwe tato ya waze eswe akufuliela, chipwe yilima; hanga akalule ululi kuli ayo nawa: 12hanga akapwe tato ya ngalami, waze kapwile ngalami tuhu, alioze kuli waze akwenda mu ngano ja Ufulielo wa kulwetu Apalahama, uze wapwile nawo shimbu te achili chilima.

13Mumu hi ku shimbi ko, chilakenyo chapwile kuli Apalahama, hanji ku munyachi wenyi, akapwe swana ya hashi, alioze ku ululi wa Ufulielo. 14Mumu kachi waze a ku shimbi anapu maswana, Ufulielo unapu wamokomoko, ni chilakenyo chinapu nichimwe: 15mumu shimbi kuyakulinga utenu; alioze kuze kukushi shimbi, kuze Utanguko nawa kuushiko.

16Ha chikuma chino kuchapwa ku Ufulielo, hanga chikalite ni vumbi; hanga chilakenyo chikakole ku munyachi weswe; hi ku munyachi wa shimbi ko, alioze ku uze nawa wa ku Ufulielo wa Apalahama; iye tato ya yetu eswe, 17(ngwe chinasonewa ngwo, Hingunakupwisa tato ya mavungu anji) kumeso ja Zambi yoze wamufulielele, yoze wakupwisa afu ni mwono, kakuvuluka yuma yize yakuhi, chizechene ngwe kuyili. 18Apalahama, mu kutalatala, wafulielele ku chize kechi kuhasa kuchitalatala, hanga akapwe tato ya mavungu anji, nikulita ni chize ambile ngwo, Chocho munyachi we kumuukapwa. 19Iye kakokolokele ha Ufulielo, ha kunyonga mujimba wenyi mwene hiunafu kulu, (se kali ni ngwe kulakaji lia miaka), ni kufwa cha jimo lia Sera; 20hindu, se watalile ku chilakenyo cha Zambi, kayambashanyine akahone Ufulielo, alioze walikolezele ku Ufulielo nikuchichimieka Zambi. 21Se kanajikiza ngwenyi, Cheswe Zambi hanalakenya kumahasa kuchilinga. 22Kashika nawa alwile Ufulielo wenyi kuli iye ngwe ululi. 23Achi, kuchasonewene mumu hali iye wika, ngwo, Awalwile kuli iye; 24alioze mumu hali yetu nawa, kumawalula kuli yetu twakufuliela kuli yoze wahindwishile Yesu Mwene wetu hakachi ka afu; 25yoze amukunjikile mumu ha milonga yetu; amuhindwishile mumu ha usambiso wetu.

Currently Selected:

A-ROMA 4: Csa

Highlight

Copy