A-ROMA 3

1Mba kuhiana chika kevwe A-Yunda ali nacho? Hanji kufumbuka chika cha ungalami? 2Chinji ha yuma yeswe: hatangu, mumu chamwenemwene aakunjikile maliji a Zambi. 3Mumu kachi amwe kapwile ni Ufulielo, mba kuchi? Kuhona cho cha Ufulielo muchipwisa chamokomoko umwenemwene wa Zambi, nyi? 4Ka, pundu; alioze Zambi apwe wamwenemwene, ni atu eswe akapwe akwa mahuza, ngwe chinasonewa ngwo,

Hanga ukasambe ni maliji je,

ni hanga ukakumbe muze makupatwila.

5Alioze kachi uhenge wetu muusolola ululi wa Zambi, kuchi mutwamba? Zambi yoze wakufwetesa ni utenu kanapu chihenge, nyi? (Ngunahanjika nikulita ni atu), 6ka, pundu; mumu kachi chocho, ngwe kuchi Zambi makapatwila akwa hashi? 7Mumu kachi umwenemwene wa Zambi ku mahuza jami walumbamine ku uhenya wenyi, ika te achili nikungupatwila ngwe chivulumunyi? 8Kuchi te kutushi kwamba (ngwe kanatusanyina, nikulita ngwe amwe kakushindakenya yetu twakwamba) ngwo, Tulingenu yipi hanga yipema yikeze? Upatwilo wo kuunalite ni ululi.

9Mba kuchi? Tunaahiana, nyi? Ka, pundu; mumu hitunasumu kulu, ni A-Yunda ni A-Ngresia, ngwetu, O eswe kushi lia shili ali: 10ngwe chinasonewa ngwo,

Mukwa ululi wakuhi niumwe, chipwe umuwika, ka;

11yoze wakunyingika wakuhi niumwe; yoze wakufupafupa Zambi wakuhi niumwe.

12Eswe hanahambuluka mu jila, hanapu hamuwika yisáshili;

yoze wakulinga yipema wakuhi niumwe, chipwe umuwika, ka.

13Miliwu yo yinapu fuka liawashi;

ni malimi jo hanalingi ni kalimbalimba:

utende wa yilengamuli kushi lia mivumbo yo uli.

14Makanwa jo kanazala ni kukukula ni usasu:

15molu jo akutambuka kumwanga manyinga;

16kwenyeka ni kulungajala mu majila jo yili;

17jila ya uhwimino kayinyingikine:

18woma wa Zambi wakuhi kumeso jo, niumwe.

19Achi, tunanyingika yeswayo shimbi muyamba, muyihanjika kuli waze atwama kushi lia shimbi; hanga makanwa eswe akapakike, ni akwa hashi eswe akahie kuli Zambi: 20mumu ku yitanga ya shimbi kechi kasambisa mutu niumwe kumeso jenyi; mumu ku shimbi, chinyingi cha shili muchiza.

21Alioze haliapwila hanasolola ululi wa Zambi, kuushi shimbi, kanaushindakenya ku shimbi ni aprofeta; 22te ululi wa Zambi ku Ufulielo muli Yesu Kristu, kuli eswe, ni hali waze eswe akufuliela; mumu kulipwila chakuhi nichimwe. 23Mumu eswe hanavulumuna, kanahono uhenya wa Zambi. 24Se hanatusambisa chawana ku vumbi lienyi, ku ukule uze uli muli Kristu Yesu: 25yoze Zambi waselele kulutwe, akapwe kuka, ha kufuliela manyinga jenyi, ha kusolola chinyingi cha ululi wenyi ha kuzomboka milonga yize yapwile kushi, ha kulihumikiza cha Zambi. 26Ha kusolola chinyingi cha ululi wenyi ha mwaka uno haliapwila: hanga akasambe, akapwe mukwa kusambisa yoze uli ni Ufulielo muli Yesu.

27Mba kulisamba Chilihi? Hanachiajila haze. Ku shimbi yika? Ya yitanga, nyi? Ka, pundu: alioze ku shimbi ya Ufulielo. 28Kashika twakushinginyeka ngwetu, Masambisa mutu ku Ufulielo, keshi yitanga ya shimbi. 29Zambi, Zambi ya A-Yunda wika, nyi? Kapwile Zambi ya akwa mavungu nawa, nyi? Ewa, iye Zambi ya akwa mavungu nawa: 30se iye Zambi umuwika, yoze makasambisa ngalami ku Ufulielo, masambisa yilima ku Ufulielo. 31Mba hinapwisa shimbi yamokomoko ku Ufulielo, nyi? Ka, pundu: Shinaho tunakolesa shimbi.

Currently Selected:

A-ROMA 3: Csa

Highlight

Copy