A-ROMA 11
11
1Ngunambe ngwami, Zambi hanambila atu jenyi, nyi? Ka, pundu!
Mumu yami nawa nguli Ka-Izalele wa ku munyachi wa Apalahama, wa ku vungu lia Mbenjamine. 2Zambi kambilileko atu jenyi, waze waanyingikine Shimbu-kanda. Shina kunwanyingikine chize chisoneko chinambe hali Eliya, nyi? Ngwe chize aliumbile kuli Zambi kulimika ni A-Izalele ngwenyi, 3Mwene, o hanashihi aprofeta je, hanapuzula yilumbilo ye, yami wika ngunasala, o kanafupu kuchiza mwono wami. 4Kumbululo lia Zambi kuli iye kuchi liapwa? Ngwo, Hingunalifungila tununu shimbiali a malunga waze kaliumbile makungunwa kuli Mbale. 5Chizechene ha mwaka uno nawa kwali masalila nikulita ni kutongola cha vumbi. 6Alioze kachi chinapu cha vumbi, mba kuchapwile cha yitanga: nyi chocho, vumbi hi vumbi ko nawa.
7Mba kuchi? Chize A-Izalele akufupa, kachizukileko; alioze waze aatongwele hanachizuku, akwo hanakale: 8ngwe chinasonewa ngwo,
Zambi waahele Spiritu ya kufungunuka,
meso aze kechi kamona no, ni matwi aze kechi kevwa no,
ndo ku tangwa lino.
9David kanambe ngwenyi,
Mesa yo yikapwe chitela, ni muheto,
ni chitalingiso, ni fweto kuli ayo:
10meso jo akalé, hanga kechi kamona,
ukatumbike manyima jo matangwa eswe.
11Ngunambe ngwami, Atalingile hanga alimbuke, nyi? Ka, pundu! Alioze ku mulonga wo ulamwino hiuneza kuli akwa mavungu mukwehia ku ukwa. 12Alioze kachi mulonga wo unapu kuyuka cha akwa hashi, ni kukehuluka cho chinapu upite wa akwa mavungu: Shinaho chikolo kuzala cho, nyi?
13Mumu ngunahanjika kuli yenu, nuli akwa mavungu, mumu te yami nguli postolo wa mavungu, ngunachichimieka uvumbiko wami; 14kachi hanji ngukehie ku ukwa waze a ku musunya wami, ngukalamwine amwe a kuli ayo. 15Mumu kachi kumbila cha ayo chinapu uwanyino wa akwa hashi, kuchi muchipwa kutambula cha ayo, hi mwono ko hakachi ka afu, nyi? 16Achi, kachi muhuko utangu usandu, kachi mwaha weswe nawa usandu: kachi muji usandu, kachi mitango nawa yisandu.
17Achi, kachi mitango yimwe ayipatwileho, ni yena, se uli olevwe wa mu yambu, akunungine hakachi ko, hiwapwa mukwa kuhangana ni mukwo hamwe no ha muji ni maji ja olevwe; 18kanda ukalisamba ha mitango; alioze kachi mulisamba, hi yena ko wakumbata muji, alioze muji wakukumbata yena. 19Mba muwamba ngwe, Mitango ayipatwileho, hanga angunungemo. 20Mba, ayipatwileho mumu kafulielele, ni yena unamana ku Ufulielo. Kanda ukalengumuka, alioze ivwa woma: 21mumu kachi Zambi kavwilile keke mitango yitangu, chipwe yena kechi kakuvwila keke nawa. 22Mba talenu, utu ni ukalu wa Zambi: kuli waze alimbukile, ukalu; alioze kuli yena, utu wa Zambi, kachi munyongonona mu utu wenyi: nyi ka, yena nawa kumakakupatulaho. 23No nawa, nyi keshi kunyongonona mu uhulia, kumakaanungamo; mumu Zambi kanahase kwanungamo cheka nawa. 24Mumu nyi yena akupatwile ku uze nikulita ni chisemewa wapwa olevwe wa mu yambu; nikulimika ni chisemewa akunungine mu we olevwe; Shinaho chikolo wano, mitango ya ku chisemewa, makaanunga ni olevwe wo ene, nyi?
25Mumu chazangile yenu, mandumbu, kwalajala ha chijimbikilo chino, kuchina munukanyama ni kutaka cha yenwene, ngwe kukalisa ha chihanda hichawana A-Izalele, ndo ku kuzala tò cha akwa mavungu muchiza: 26chocho makalamwina A-Izalele eswe; ngwe chinasonewa ngwo,
Mukwa kupulula kumakakatuka ku Zaione;
iye kumakakatwisa utanganyanyi kuli akwa Yakomba;
27uno we usendo wami kuli ayo,
muze mungukuchiza milonga yo.
28Ha kutwala ku sango lipema, kanapu akwa kole mumu hali yenu: alioze ha kutwala ku kutongola cha Zambi, kanaazange chikolo mumu hali tulamba. 29Mumu yawana ya vumbi ni kutambika cha Zambi keshi kulikonyekayo. 30Mumu ngwe yenu chamwenemwene ha miaka ya kunyima kunwononokene kuli Zambi, alioze haliapwila hinunawane keke, mumu ha uhulia wo. 31Chocho wano nawa kononokeneko, hanga ku keke yize anuvwilileyo, o nawa akawane keke. 32Mumu Zambi hanaayiki eswe mu uhulia, hanga akaavwile eswe keke.
33E mana ni yinyingi ya Zambi, chocho yajotoka nikulumbama ngwe upite! Upatwilo wenyi keshi kuhasa kuunyonga weswe! Majila jenyi keshi kuhasa kwafunjika eswe!
34Mumu iya hananyingika kunyonga cha Mwene?
Hanji iya wapwile mukwa kumwaha mana?
35Hanji iya waliangile kumwaha hanga akamukundulule?
36Mumu yuma yeswe kuyakatuka kuli iye, kuyakola ku tachi jenyi, yakuswila muli iye. Uhenya ukapwe kuli iye ndo ku miaka ya mutolo. Amene.
Currently Selected:
A-ROMA 11: Csa
Highlight
Copy
Compare
Share
Want to have your highlights saved across all your devices? Sign up or sign in
Chokwe Bible © Bible Society in Angola, 1975.
