USOLWELO 9
9
1Mungelo wamuchitano wembile chitavwi chenyi, mba namwene lutongonoshi yakatuka kwilu, yaholoka hashi: amuhele sapi ya jondo. 2Iye wázulwile jondo: mwandukile mwishi mu jondo ngwe mwishi wa ku lutengo munene; ni tangwa ni mu tetela yalayile ni mwishi wa mu wina. 3Ni mu mwishi mwatuhukile makumbi hashi, aahele tachi, ngwe tuvwanda twa hashi tachi akwete. 4Achambile kuli ayo kanda akapinjisa mwambu wa hashi, chipwe chuma chimwe cha wisu, chipwe mutondo umwe, aiioze atu waze keshi Chijikilo cha Zambi ha mahuma jo. 5Aahele chiyulo cha kwamwesa lamba tukweji atano, aiioze kanda akaashiha: ni yikola yo ngwe yikola ya kavwanda, muze masuma mutu. 6Ni ha matangwa aze atu makafupa kufwa, aiioze kechi kachiwana nichimwe; mazanga kufwa, aiioze kufwa, muchiachina.
7Kulifwa cha makumbi ngwe tuvwalu a kululika ha jita; ni ha mitwe yo, yipangula ngwe ya oru, ni meso jo ngwe meso ja atu. 8Apwile ni kambu ngwe kambu ja mapwo, ni mazo jo apwile ngwe aze a ndumba. 9O apwile ni yipwiko ngwe yipwiko ya utale; ni lundunjila wa mapulwa jo ngwe lundunjila wa matemba, wa tuvwalu anji nikuzombokela ku jita. 10O michila akwete ngwe tuvwanda, ni munyi jo; ni mu michila yo mujili tachi jo ja kupinjisa atu tukweji atano. 11O mwanangana akwete, mwe mungelo wa jondo: jina lienyi mu Hepreu ngwo, Apandone, ni mu limi lia Ngresia jina ali nalio ngwo, Apoleyo.
12Lamba litangu hilinapalika: lamba Uali muliza kulutwe lia yino yuma.
13Mungelo wamuchisambano wembile chitavwi chenyi, mba nevwile liji lia kukatuka ku mbinga ja chilumbilo cha oru, chize chili kumeso ja Zambi. 14Umwe kanambe kuli mungelo wamuchisambano, yoze wapwile hi chitavwi, ngwenyi, Tusula angelo awana waze akukashiwa ku lwiji munene, ku Ufrateze. 15Ni angelo awana aatuswile waze aalulikile kulu ha ola, ni tangwa, ni kakweji, ni mwaka, hanga akashihe chihanda chimuwika cha ku yihanda yitatu ya atu. 16Chize alwile mbunga ja akwa tuvwalu ngwo, Kulakaji aali a tununu: nevwile chize aalwile. 17Chocho namwene tuvwalu mu usolwelo, ni waze atwamineho, kali ni yipwiko ya kahia, ni jasendu, ni fundanga; nijnitwe ya tuvwalu ngwe mitwe ya ndumba; ni mu makanwa jo mwatuhuka kahia ni mwishi ni fundanga. 18Ku lamba lino litatu, ashihile chihanda chimuwika cha ku yihanda yitatu ya atu, ku kahia ni mwishi ni fundanga, yize yinatuhuka mu makanwa jo. 19Mumu tachi ja tuvwalu mujili mu makanwa jo, ni mu michila yo: mumu michila yo yalifwa ni tupela, kali ni mitwe, ni kakupinjisa nayo.
20Mba masalila ja atu aze kaashihile ni lamba lino, kalikonyekeneko ha yitanga ya moko jo, hanga kechi kawayila andemoniu, ni mahamba ja oru, ni ja prata, ni ja kengelia, ni ja mawe, ni ja mitondo; waze kahashileko chipwe kumona, chipwe kwivwa, chipwe kwenda: 21o kalikonyekeneko ha ungalwe wo, chipwe ha yipandapanda yo, chipwe ha utanji wo, chipwe ha wiji wo.
Currently Selected:
USOLWELO 9: Csa
Highlight
Copy
Compare
Share
Want to have your highlights saved across all your devices? Sign up or sign in
Chokwe Bible © Bible Society in Angola, 1975.
