USOLWELO 18
18
1Kulutwe lia yino yuma namwene mungelo mukwo, kanahulumuka mwilu, kali ni poko yinene ya kuyula; ni hashi hapangulukile ni uhenya wenyi. 2Iye wakololokele ni liji lia ngolo ngwenyi,
Babilonia hiyapuzuka, hiyapuzuka,
hiyapwa muma mwa kutwama mwa andemoniu,
ni zuwo lia ususu lia maspiritu eswe a luchisa,
ni zuwo lia ususu lia tujila eswe a luchisa ni tujila eswe api.
3Mumu mavungu eswe hananu ku vinyu ya ufwatulo wa utanji wenyi,
ni mianangana ja hashi hanalingi nenyi utanji, ni akwa kutalikila hanalipichisa ku tachi ja kuhungumuka chenyi ni yipi.
4Mba nevwile liji likwo lia kukatuka mwilu, ngwo,
Tuhukenumo, atu jami, hanga kunuchi kaliendela ni milonga yenyi,
hanga kunuchi katambula ya ku lamba lienyi;
5mumu milonga yenyi hiyaheta ndo mwilu,
ni Zambi hanewuluka yitanga ya uhenge wenyi.
6Mufwetenu chizechene ngwe hanafwetesa,
ni yisuho yiali, nikulita ni yitanga yenyi;
mu musenge uze hanauchinge, muchingilenu yisuho yiali.
7Ku chize cheswe hanalichichimieka, ni chize hanahungumuka ni yipi,
chocho kuhiana mwehenu kupinda ni kunenganyana,
mumu kanambe mu mbunge yenyi ngwenyi, Nakutwama mwananganawa-pwo,
hi nguli twamishi ko, chichi kamona kunenganyana nichimwe.
8Kashika ha tangwa limuwika lamba lienyi kumulikeza,
kufwa ni kunenganyana, ni kapunga;
kumakamwocha ni kahia; mumu mukwa ngolo, Mwene Zambi yoze wakumupatwila.
9Ni mianangana a hashi waze hanalingi utanji, waze hanahungumuka ni yipi hamwe nenyi, kumakalinyenga, makalila mbimbi hali iye, muze mamona mwishi wa kuwema chenyi. 10Mamana kusuku mumu ha woma wa kupinda chenyi, ngwo,
Mama yami! Mama yami! Lie limbo linene!
Babilonia lie limbo lia ngolo!
Mumu susumuku upatwilo we hiuneza.
11Ni akwa kutalikila ja hashi yalila, yanenganyana hali iye, mumu niumwe malanda makupa jo nawa. 12Makupa ja oru, ni prata, ni mawe alemu, ni kakanga, ni mahina a linyu lipema, ni a ufungo, ni seda, ni ulombo wa ngengu; ni mitondo yeswe ya taimi, ni yuma yeswe ya mazo a njamba, ni yuma yeswe ya mitondo yilemu yahiana, ni ya kengelia, ni ya utale, ni ya mawe alemu; 13ni kanela, ni mulungo, ni insensu, ni yitumbo ya vumba lipema, ni libano, ni vinyu, ni maji, ni wunga wa kufufunuka, ni tiliku, ni yimuna, ni mapanga; ni tuvwalu, ni matemba, ni mijimba, ni alma ja atu.
14Ni mihuko yize mbunge ye yayivwilile usolo, hiyinakatuka kuli yena,
ni yuma yeswe yipema ya uhenya hiyinakatuka kuli yena, kechi kayiwana nawa nichimwe.
15Ni akwa kutalikila yino yuma, waze alipichishile kuli iye, makamana kusuku mumu ha woma wa kupinda chenyi, nikulila, nikunenganyana; 16nikwamba ngwo,
Mama yami! Mama yami! Lie limbo linene
lize liazalile mahina a linyu lipema ni a ufungo ni ngengu,
lialejimine ni oru ni mawe alemu ni kakanga!
17Mumu susumuku upite upwa haha hiwapwa wa hululu;
ni zauli eswe, ni akwa kwenda mu maulungu eswe, ni akwa kwendesa maulungu, ni waze eswe akulinga milimo yo ha kalunga-lwiji, amanyine kusuku. 18O akololokele shimbu atalile mwishi wa kuwema chenyi, ngwo,
Limbo lika mulifwa ni limbo linene?
19O akuwile fufuta ha mitwe yo, akololokele, nikulila, nikunenganyana, ngwo,
Mama yami! Mama yami! Lie limbo linene,
muze waze eswe apwile ni maulungu ha kalunga-lwiji
alipichishile ku ndando yenyi yilemu!
Mumu susumuku hihapwa lia hululu.
20Ivwa chiseke, yena lilu, ni yenu asandu,
ni yenu apostolo, ni yenu aprofeta;
mumu Zambi hanapatula upatwilo wenu
hali iye.
21Mba mungelo wa ngolo wanjile liwe ngwe liwe linene ha kutwa nalio, walinyashine mu kalunga-lwiji, ngwenyi,
Chocho ni tachi kumakanyasa hashi Babilonia,
lie limbo linene, ni kechi kaliwana nawa nichimwe.
22Ni liji lia akwa kwimba tulialia, ni njimba,
ni akwa kwimba ndembo, ni akwa kwimba yitavwi, kechi kulivwa nawa nichimwe muli yena.
Ni chilangaji niumwe wa ulangaji weswawo,
kechi kamuwana nichimwe muli yena;
ni liji lia kutwa kechi kalivwa nawa nichimwe muli yena.
23Ni pangu lia ndeya kulichi kapanguka nawa nichimwe muli yena;
ni liji lia sandungi ni lia ndungi kechi kalivwa nawa nichimwe muli yena;
mumu akwa kutalikila je apwile mahando ja hashi; mumu ni yipandapanda ye apiangwile mavungu eswe.
24Muli iye awanyine manyinga ja aprofeta ni ja asandu, ni ja waze eswe aashihile hashi.
Currently Selected:
USOLWELO 18: Csa
Highlight
Copy
Compare
Share
Want to have your highlights saved across all your devices? Sign up or sign in
Chokwe Bible © Bible Society in Angola, 1975.
