USOLWELO 16
16
1Mba nevwile liji linene lia kukatuka ku tembele, Unambe kuli angelo shimbiali ngwo, Yénu, nukamwange misenge ya ufwatulo wa Zambi hashi.
2Mutangu wayile akamwange musenge wenyi hashi; mba kwapwile chilonda chipi ni chikalu hali atu aze apwile ni mufunda wa ngongo, ni waze awayilile kaponya kenyi.
3Mungelo wamuchiali wamwangine musenge wenyi ha kalunga-lwiji; iye walumukine manyinga ngwe a mufu; ni akwa mwono eswe mu kalunga-lwiji afwile.
4Mungelo wamuchitatu wamwangine musenge wenyi ha njiji ni ha mafuji ja meya; o alumukine manyinga. 5Mba nevwile mungelo wa meya kanambe ngwenyi,
Yena uli mukwa ululi, yena hwoli, yena wapwile, mwe Musandu, mumu hiunapatula chocho.
6Mumu amwangine manyinga ja asandu ni aprofeta,
hiunaahe manyinga a kunwa;
mumu kanatelo.
7Mba nevwile chilumbilo chinambe ngwenyi,
Ewa, Mwene Zambi ya Ndundo-Jeswe,
upatwilo we wamwenemwene ni wa ululi.
8Mungelo wamuchiwana wamwangine musenge wenyi ha tangwa; alihelecho kupapa atu ni kahia. 9Ni atu apapiwile ni chivukuminya chinene: mba ashililikile jina lia Zambi, yoze wapwile ni chiyulo ha lamba lino: aiioze kalikonyekene akamuchichimieke.
10Mungelo wamuchitano wamwangine musenge wenyi ha ngunja ya ngongo; ni wanangana wenyi walayile; o ahalangenyene malimi jo ni yikola. 11O ashililikile Zambi wa mwilu mumu ha yikola yo ni yilonda yo, hindu kalikonyekeneko ha yitanga yo.
12Mungelo wamuchisambano wamwangine musenge wenyi ha lwiji munene, ha Ufrateze; ni meya jenyi omine chau, hanga jila ya mianangana a ku chivumbuko cha tangwa yikalulike. 13Namwene munatuhuka mu kanwa lia ndragau, ni mu kanwa lia ngongo, ni mu kanwa lia profeta wa kwonga, maspiritu a luchisa atatu ngwe yula-ya-mbwota. 14Mumu o maspiritu ja ndemoniu, nikulinga yilayi; waze akutuhuka nikuya kuli mianangana ja yifuchi yeswe ya hashi, mukwakungulula ku jita ya tangwa linene lia Zambi ya Ndundo-Jeswe. 15(Talenu, nguneza ngwe mwiji; kawaha yoze malá, yoze mafunga mazalo jenyi, hanga kechi kenda ni uselesele, hanga kechi kamona sonyi jenyi). 16Iye waakungulwile kuma kuze anavulukako mu Hepreu ngwo, Armangendone.
17Mba mungelo wamuchishimbiali wamwangine musenge wenyi ha tetela; mwatuhukile liji linene mu tembele ya mwilu, ku ngunja, ngwo, Hichahwa. 18Mba kwapwile mihenyo ni maliji ni kukulunguza, ni kwapwile minyiko yinene ngwe yize kuyapwile hanga atu apwile hashi, minyiko yipwa haha! 19Ni limbo Hapulikile yihanda yitatu; ni membo ja mavungu apuzukile: ewulukile Babilonia kumeso ja Zambi, mukunwaha musenge wa vinyu ya ufwatulo wa utenu wenyi. 20Ni matungu eswe achinyine, ni milundu kayiwanyineko. 21Ni chiwe chinene cha makelekeshi chapezala ngwe makumi asambano a makilo ni makilo atatu yichiholokela mwilu hali atu; ni atu ashililikile Zambi mumu ha lamba lia chiwe; mumu lamba liacho linene liahiana.
Currently Selected:
USOLWELO 16: Csa
Highlight
Copy
Compare
Share
Want to have your highlights saved across all your devices? Sign up or sign in
Chokwe Bible © Bible Society in Angola, 1975.
