MUKANDA WA FWILIMU 1
1
1Yami Paulu, funge ya Kristu Yesu, ni ndumbwetu Timoteu,
Kuli Fwilimu, tunamuzange chikolo, mukwa milimo-ni-mukwetu, 2ni kuli pangietu Apia, ni Arkipu, swalale-ni-mukwetu, ni ku chikungulwila chize chili mu zuwo lie:
3Vumbi kuli yenu ni sambukila ya kuli Zambi Tata yetu ni Mwene Yesu Kristu.
4Nakusakwila kuli Zambi yami, nikukuvulwoka matangwa eswe mu yilemba yami; 5nikwivwa lufuma wa zango lie, ni Ufulielo uze uli nawo kuli Mwene Yesu, ni kuli asandu eswe; 6hanga kuliendela cha Ufulielo we chikalinge mukutayiza yuma yeswe yipema yize tuli nayo muli Kristu. 7Mumu uwahililo wunji ni kulembejeka nguli nacho mumu ha zango lie ndumbwami, mumu wakuhuzulula mbunge ja asandu.
8Kashika, hamu lieswe nguli nalio muli Kristu kukwamba chize chinalite. 9Hindu mumu ha zango Shinaho ngunaliumbu, se ngunapu Paulu mwe mukulwana, ni haliapwila funge nawa ya Yesu Kristu. 10Ngunaliumbu kuli yena hali mwanami, Onesimu, mwenawo hingunamuseme mu makana jami; 11yoze ha miaka ya kunyima kakufumbwileko, aiioze haliapwila kanafumbula kuli yena ni kuli yami. 12Namutumine cheka nawa kuli yena, iye mwene, te mbunge yami. 13Nazangile kachi asale hamwe ni yami, hanga akakusalakane ha kunguvumbika mu makana ja sango lipema. 14Alioze chazangile kulinga nichimwe shina yena mutá; hanga chitanga che chipema kuchichi kapwa cha kuzangisa, aiioze ha upale wa yena mwene.
15Mumu hanji ha chikuma chino wahandunukine kuli yena ha shimbu, hanga ukamuzuke ndo ku miaka ya mutolo; 16hi ngwe ndungo ko nawa, aiioze wahiana ndungo, ndumbwetu wa zango, kuli yami kuhiana, aiioze kuli yena kuhiana chikolo, ni mu musunya ni muli Mwene. 17Kashika kachi unangumono ngwe sepa, mutambule ngwe yami mwene. 18Alioze kachi hanakulingi chipi, hanji ali ni kongo kuli yena, Usoneke mu mukanda wami. 19Yami Paulu, ngunachisoneka ni kwoko lia yami mwene, kumungukachifweta: alioze, helu lia chino cheswe, chambile kuli yena ngwe chipwe mwono we uli nawo, kongo kuli yami. 20Ewa, ndumbu, nguwahilile muli Mwene hali yena; hwimisa kama mbunge yami muli Kristu.
21Se ukolelo nguli nawo ha kwononoka che, ngunasoneka kuli yena, nikunyingika ngwami, Mukalinga kuhiana chize ngunambe. 22Chikwo nawa ukangululikile zuwo, mumu ngunatalatala akanguhane kuli yenu mumu ha yilemba yenu.
23Epafwa, funge-ni-mukwetu muli Kristu Yesu, kanakumeneka, 24hamwe ni Marku, ni Aristako, ni Ndima ni Luka, akwa milimo-ni-akwetu.
25Vumbi lia Mwene wetu Yesu Kristu likapwe hamwe ni Spiritu ye. Amene.
Currently Selected:
MUKANDA WA FWILIMU 1: Csa
Highlight
Copy
Compare
Share
Want to have your highlights saved across all your devices? Sign up or sign in
Chokwe Bible © Bible Society in Angola, 1975.
